Lagomau susuga Rev. Ofisa
Ia Galea'i i lona oliolisaga tumau
tusia: Ausage Fausia
I le maea ai o alofaaga ma talotaloga
mo toe taimi o le susuga i le alii faifeau, susuga Elder Rev.
Ofisa Ia Galea'i mai uo ma aiga, tainane ai taitai o le malo
e aofia ai ma sui o le Fono Faitulafono, o le te'a laititi o
le itula e 1 i le aoauli ananafi, na auina atu ai loa lona Sa
i lona nofoaga tumau, ma lagomau ai loa e faatalitali ai i lona
Matai.
O le susuga Rev. Eveni Mamoe
na taitai le sauniga lotu puupuu mo ona toe sauniga.
O le susuga Rev. Ofisa, na soifua
mai i le aso 4 o Setema, 1913, ae o le aso 28 o Fepuari, 2008
na faamanavaina ai e le Atua ana galuega, ina ua 94 tausaga o
lona soifua, e pei ona faamaonia mai e se tasi o ona alo, le
susuga Ta'ilele Ieremia Ofisa.
Na taua e le susuga Ta'ilele,
ina ua maea aoaoga a lona tuaa i Tutuila nei, na malaga atu ai
loa i le Kolisi o Leulumoega i Upolu na faaauau ai ana aoaoga,
sosoo ai loa ma le ulufale atu i le Kolisi Faafaifeau i Malua
i le tausaga e 1942.
O le tausaga e 1947 na faauu
mai ai o ia mai le Kolisi faafaifeau i Malua, ma taliu atu ai
i Fitiuta, Manu'a e tausi le aiga, ma valaauina ai loa o ia i
le tausaga e 1951 na te tausia le ekalesia i Fitiuta ina ua leai
se faifeau.
Peitai, na toe suia le auala
o lana auaunaga i le Atua ma le atunuu, ina ua tofia e le itumalo
o ia e fai ma o latou sui i le Fono Faitulafono i le Maota o
Sui i le tausaga e 1952, i le nofoaiga lona tolu lea talu ona
faavae le Fono Faitulafono a Tutuila ma Manu'a, lea na ia tuua
ai loa le galuega faa faifeau ae talia le finagalo o le afioaga.
Peitai ao i ai o ia i le faatinoina
o ona tiute i le Fono Faitulafono, na valaauina ai loa o ia e
le afioaga o Alao i le masina o Iuni, 1953, ina ia avea o ia
ma o latou faifeau, ma o iina na amata ai loa lana galuega faa
faifeau, seia oo ina faamavae mai ma le galuega i le ekalesia
i Alao i le tausaga e 1988, ona o gasegase o le tino.
E faamavae o ia mai le galuega
a le Atua i Alao, ua 35 tausaga o lana tautua. Ao avea o ia ma
faifeau i Alao, na tofia ai o ia e avea ma Sui Failautusi o le
Sosaiete a le Autaumafai mai le 1978-1980, ae o le tausaga e
1980-1988 na tofia ai o ia e fai ma Faifeau Toeaina a le Pulega
a Vaifanua.
O le tausaga e 1981 na tofia
ai o ia galue i le Komiti o Nuu eseese a le ekalesia, faapea
ai ma le komiti Fai Galuega a Toeaina.
Na taua e le susuga Ta'ilele,
o le susuga i le alii faifeau ia Rev. Ofisa, o ia o se tasi o
faifeau na galue i le taimi na faavae ai le Tutoatasi o Tutuila
ma Manu'a, o ia o se Toeaina i le uluai nofoaiga a le au Toeaina
talu ona tutoatasi le ekalesia a Tutuila ma Manu'a, ma o ia foi
o le toe Utaia o le nofoaiga lona tolu a le Fono Faitulafono
a Tutuila ma Manu'a.
"Matou te fiafia lava ina
ua valaau le Atua i lana auauna, ua afu lana tautua, ma o ia
o se tama e loto alofa i soo se tagata, e faapelepele foi i le
galuega a le Atua," o le saunoaga lea a le susuga Ta'ilele.
E toa 124 i latou na tupuga mai
i le susuga ia Rev. Ofisa, faapea ai ma ona alo e to'a iva o
loo soifua mai i le taimi nei. O loo soifua mai foi lona faletua,
Luisa Tovia.
Ia faamaise le Agaga Paia o
le Atua i le aiga loto faanoanoa.
Faafesootai
le tusitala i le imeli ausage@samoanews.com.
©
Osini Faleatasi Inc. dba Samoa News reserves all rights.
|