Vavau o Samoa
O LE FALE
NAI AMOA E LAU I ULA AE POU I TOA
vaega #1
O le muagagana
lenei, na mafua mai ona o le tala e faatatau i le tamaitai tagivale
o Meto ma le tama o Alo, le tama lea na maua ina ua usu le tamaitai
o Sinalefatumoa ia Naisaafa le alii o Amoa. I le agai i uta i
le nuu o Asaga i le motu o Savaii, o loo tu ai le ana e faaigoa
o le ana o le Imoa, ma, fai mai le talatuu a Samoa i aso anamua,
o le vaega tonu o loo i ai lenei ana, sa igoa muamua i le igoa
o Naisaafa, ma o le igoa lea o le tupu o Amoa sa i ai i na ona
taimi.
Fai mai le tala
tuua Amoa, e na o le toatasi lava le tama a le tamaitai o Sinalefatumoa,
e na o le tama o Alo, ma o Alo la lea na alu i se tasi e aso
e utu mai ni suasami mo lona aiga, ae tau atu ai i le nuu o Pu'apu'a,
o fai mai ai le taaloga o le 'faatauga moa'. O le taaloga lenei,
e o tagata aumai moa (toa) e lua, ona faatau lea poo ai e manumalo.
Na avea le naunau
o le tamaititi o Alo i lona fia auai i le faatauga moa lea o
loo fai mai ma itu na toe foi ai loa i lo latou fale, ma tauanau
lona tina e su'e mai sana moe se'i alu e taalo ai i le taaloga
o loo faia i Pu'apu'a, peitai, sa lei fiafia i ai lona tina,
ma i'u ina alu atu ai lona tina ua avatu i ai le manu lenei o
le Ti'otala, ona alu fiafia loa lea o le tama o Alo i tai i le
mea o loo fai ai le tauga moa.
Fai mai le tala
tuu, e leai ma se moa na sao i le Ti'otala a Alo, aua soo se
taimi lava e tau ai le Ti'otala ma le moa, e ta togi uma ai e
le Ti'otala mata o moa ma i'u ai lava ina mate, ma ua le toe
faia ai loa e tagata o le nuu lea taaloga, ae ua sui le taaloga
i le taga ti'a.
Fai mai ua vevela
taaloga taga ti'a i totonu o Pu'apu'a ma ua alu atu ai ma le
tama o Alo talu ai o lona fia vaai i lona tama. Fai mai ua oo
i le isi aso, ona fai atu lea o le tamaitai o Sinalefatumoa i
lana tama o Alo, afai ae i ai se aso e alu ai e saili lona tama,
o le tagata lava e tau atu i ai o nofonofo mai i luga o le ogalaau,
o lona tama lena. Sa le ano tele i ai Alo i le taimi, ona o lea
ua pisi le taaloga taga ti'a, ma o le faiga o le taaloga, o le
tamaititi o Alo e ta ti'a, ae o lona tina e alu e su'e mai.
Fai mai le mau
a Samoa, ua oo i le isi aso, ua vevela ai lava taga ti'a, ona
ta mai ai loa lea e Alo lana ti'a mai le vaega eleele e taua
o Papalaulelei, ma alu atu sa'o lava le ti'a ua ulu i totonu
o le 'ana o Meto i Pu'apu'a, ma o le ti'a lea na mafua ai ona
maua se tasi o muagagana a Samoa e faapea, "o le ti'a ulutonu"
e faamanatu ai le taimi na ta ai e Alo lana ti'a ma ulu i totonu
o le 'ana a le tamaitai o Meto.
(E faia pea)
© Osini Faleatasi Inc. dba Samoa News reserves
all rights.
|