Te'ena e
Faipule pili mo le Aso Malolo mo Tina
tusia; Ausage
Fausia
E ui na lagolagoina
e sui o le malo na mafai ona molimau i luma o le maota o sui
le pili mo se tulafono e avea ai le Aso Gafua e sosoo ma le Aso
Sa o Tina, o se aso malolo faalemalo mo le atunuu, peitai na
o latou taua, e i ai lavelave e ono tulai mai ai i lea tulafono,
ona e manaomia ai foi nisi tupe faaopoopo e totogi ai i latou
o le a galulue i lea aso malolo, o se molimau lea na tuuina mai
i le ofisa o le Tupe Faasoasoa.
Peitai i le molimau
a le afioga i le Faatonu o le Ofisa o Tagata Faigaluega a le
malo, tofa Mageo Malu Mageo na ia ta'ua ai le taua o lenei tulafono
peitai, e foliga mai o le a faapito na o tina ma lo latou taua,
ae faatuatuana'i ai isi vaega o le atunuu e pei o tama ma fanau.
O se manatu foi
lea na tuuina mai e le loia fautua a le malo, susuga Tasi Tuiteleleapaga
ina ua fesiligia e afioga i alii faipule. Na saunoa Tuiteleleapaga,
e lagolagoina e le malo soo se taumafaiga e aloaia ai tautua
a le atunuu, peitai, e le tatau ona faapito i se vaega, ae tatau
ona tutusa tagata uma.
Saunoa le tamaitai
faipule ia Mary Lauagaia M. Taufetee, o se tulafono taua tele
lenei, e manatua ai le tautua sa faia e tina o le atunuu, ua
tofafa mai tiasa, lea ua aeae ai fanau i nei ona aso.
Saunoa foi le
afioga i le tamaitai faipule ia Fiasili P. Haleck, o se tulafono
e faailoa atu ai le aloaia e le malo ma le atunuu o tautua a
tina uma o Samoa, peitai na saunoa le afioga i le alii faipule
ia Paopaoailua J Fiaui, e faailoga lanu le tulafono pe afai na
o tina ae leai se aso malolo mo tama.
Faafesootai
le tusitala i le imeli ausage@samoanews.com.
©
Osini Faleatasi Inc. dba Samoa News reserves all rights.
|