Amata faamasinoga
o le leoleo tuuaia maliu o se tamaititi
tusia: Ausage
Fausia
O le taeao ananafi
na amataina ai le faamasinoga autu o le alii leoleo o lo'o tuuaia
i le faalavelave na tupu i luma o le faleoloa o le Family Mart
i Nu'uuli i le po o le aso 28 o Ianuari 2007, lea na maliu ai
se tamaititi e 12 tausaga le matua, o Neemia Leusoga.
O le susuga ia
Makuisa Amotai, o loo tuuaia e le malo i le moliaga mamafa o
le ave taavale faatamala ua oo ai le maliu i se tagata, faapea
ai ma le moliaga mama o le ave taavale le faautauta.
I le maea ai
ona faailoa atu e le faamasino sili, afioga Michael Kruse o tiute
tauave mo le vaega iloilo iuga e toa 7 lea ua tofia latou te
iloiloina se faaiuga mo lenei mataupu, na tulai ai loa le loia
a le malo, susuga Aaron Masser mo le tuuina atu o lana ulua'i
folasaga.
Sa saunoa Masser,
o lenei mataupu, e leai sona lavelave tele, e le tutusa foi ma
le tele o isi mataupu faa faamasinoga, e tau saili mai le amiotonu
ma le moni o molimau, aua e le tau fesiligia le pogai o le faalavelave
lea na maliu ai Neemia Leusoga, ina ua so'a e le ua molia i lana
taavale, ona o lona faatamala tele.
Sa ia taua foi,
na tiga lava ona iloa mai e le ua molia se taavale o loo tu atu
i le laina kolosi ona o loo savali Neemia i luga o le laina kolosi,
ae sa ia le manatu mamafa i ai, sa ia le amanaiaina foi, ae na
sau sa'o lava lana taavale ona o le saoasaoa, ma so'a Neemia
ma lelea ese atu i le isi itu o le alatele.
Ae i le faafinauga
na tuuina mai e le susuga Fiti Sunia, le loia o loo tulai mo
Amotai, ao faagasolo ai lenei mataupu, o le a faafofoga le vaega
iloilo iuga, i le mea moni, e le o Amotai na aveina le taavale.
Sa ia fautuaina
foi le vaega iloilo iuga, ina ia o latou fesili ane ia i latou
lava, i le mafuaaga ua latou nofoia ai le nofoa o le vaega iloilo
iuga, ma su'esu'e ane i le taua o le latou tiute o le a faia,
e ala lea i lo latou tuuina mai o le faaiuga amiotonu, ma faailoa
mai, e le nofosala Amotai i lenei solitulafono, ma o ia foi o
se tagata e le ta'usalaina lava.
O le ulua'i molimau
na valaau e le malo, o le uso o Neemia, o Simalu Tofa, 17 tausaga
mai Nuuuli, na ia taua ai, ina ua so'a e le taavale a Makuisa
lona uso, sa alu atu ai loa le taavale ma tu mai i luma o le
Family Mart.
Sa ia vaaia le
matala mai o le faitotoa i le itu o loo i ai le ave taavale,
ma ia iloa ai Makuisa ua oso mai i fafo mai le itu o le ave taavale,
ae o le taimi lea o loo ia taumafai e omiomi le manava o si ona
uso, o loo taatia i lalo ma taumanava i le fiaola.
Na taua e Simalu,
ina ua fo'i mai Neemia mai totonu o le faleoloa o le Family Mart
i lea afiafi, tusa o le 7:30, sa fai atu loa ia te ia ma isi
o ana uo, latou te o i le fale, peitai sa latou lei o faatasi
ae ua latou nofonofo ai lava i luma o le faleoloa, ona faliu
loa lea o Neemia ma savali agai atu i le laina kolosi.
"Na ou iloa
atu lo'u uso (Neemia) ua kolosi i luga o le auala, ona matou
talanoa lava lea ma a'u uo, peitai, na ou te'i ina ua ou faalogo
i se pao tele lava, ma ou iloa atu ai se mea o loo lelea mamao
atu i luma o le taavale, toe lelea maualuga, faapea lava a'u
o se pasika, ae ua ou te'i ina ua manino la'u vaai, e le o se
pasika, o lo'u uso," o se vaega lea o le molimau a le alii
o Simalu.
O le aso e toe
fa'aauauina ai lenei faamasinoga.
Faafesootai
le tusitala i le imeli ausage@samoanews.com.
© Osini Faleatasi Inc. dba
Samoa News reserves all rights.
|