E le'i vaetamaina
a'u e faapologa
vaega #3
(E toe faatalofa
atu i paaga masani a la tatou polokalame i lenei vaiaso, talitonu
sa outou maua se vaiaso fiafia ma le manuia, ae alo mai loa o
le toe faaauauina lenei o la tatou tala faasolo.)
Ua faaauau pea
le faamatalaga a Litia e uiga i lo'u nofo ai i totonu o le aiga,
ae maise ai o le latou maitau mai i le faiga o loo fai ai a'u
e Gisa ma lana fanau. E lei i ai se vaipanoa o le matou aiga
e lei oo i ai le faamatalaga a le fafine o Litia, se fafine foi
ina faitatala, ua moni ai upu a le fafine o Gisa, leitioa a musu
le fafine ou te pipii i ni fafine poo ni tupulaga teine o le
nuu, ona o lea e musu nei o'u iloa mea lililo o loo tupu i totonu
o le matou aiga.
Sa faaauau pea
le faamatalaga a Litia, i le tamaloa na ma'i ai lo'u tina lea
ua maua ai a'u, fai mai o le tama mai Apia sa faiaoga i le aoga
a le itumalo lea e i totonu o le matou nuu, ae ona o le alu o
le fafine o Gisa ma muimui solo tala e uiga i le tama, o le pogai
lea na le fiafia ai le tama ma toe fo'i ai loa i Apia, ma alu
atu ai lava i Niu Sila.
A'o faamatala
mai e Litia le tala atoa e uiga i le matou aiga, ae maise ai
o a'u ma lo'u oo mai i le aiga o le fafine saua o Gisa, sa pei
o se timu to o'u loimata i lea taimi, ona ua ou toe mafaufau
i le ituaiga tagata e i ai a'u, ma le igoa o loo faaigoa ai
e tagata o le matou nuu ituaiga tamaiti faapea, fai mai o fanau
o le pouliuli. Ua iloa e le fafine o Litia ua ou mafatia ma ua
latalata foi le taimi e tuua mai ai le aoga a le fanau a Gisa,
ona manatu lea ua oo i le taimi e tatau ai ona alu ae tuua na
o a'u.
Na ona uma lava
o le sauniga umi sa ia faia, tu tu malie atu lava i luga ma savali
ese atu loa i le toganiu, ma ou le toe iloa atu ai. Ua faigata
ia te a'u ona faatulaga manatu eseese ua oo mai i lo'u mafaufau,
ona fai mai le isi manatu, o le a ou alu ese ma le aiga o Gisa,
o le a ou alu e saili le mea o loo i ai lo'u tina. Sa ou mafaufau
foi, e sili ona ou talanoa i le ulugalii e tusa ai o tala nei
ua ou faalogo ai, ae o le a ou le faailoaina i ai le tagata sa
ia faailoaina mai ia te a'u, ae pe o le a foi se la tali e tusa
ai o lenei mataupu.
I le tulaga o
le matou mafutaga ma nai o'u tei, e faigata tele i lo'u mafaufau
le tulaga lea o le vavae ese atu o i latou mai ia te a'u aua
ou te iloa, sa ou tausi mai lava ia te i latou mai lava i lo
latou laiti seia oo ina matutua, ua ese foi le tulaga le ua i
ai i latou i le taimi nei, aua o lea ua agai atu ai le isi vaega
matutua i le aoga a le itumalo, ae o le vaega laiti lea o le
a faamaeaina a la aoga i le aoga tulaga lua, peitai o au, lea
lava ou te nofo i le fale ma fai feau a le aiga.
O nisi o taimi
e le faigaluega ai le fafine o Gisa ae nofo e faatonu galuega
ma feau ou te faia, ae na o le nofonofo lava i le fale pei o
se masiofo e aunoa ma lona faia o se meaai mo a'u lea e pologa
i le faiga o feau, o upu foi ua amata ona ou faalogo e ote mai
ai ia te a'u, e foliga mai ai e leai sona alofa moni ia te a'u,
sa i'u lava i lona fasi tigaina ina o a'u i se tasi aso, ina
ua pau ia te au se tasi o ana mea tuu teu mata'eta'e, o le meaalofa
na aumai i se tasi o a la uo ma le tuagane o lo'u tina.
Ao fasi a'u e
Gisa i lea aso, na faafuasei ona ma vaaia le afe mai o le taavale
a le ofisa o Kalifa ua manava mai, ae le masani ai. Na ou vaaia
se suiga tele i le pupula a Kalifa i lona toalua ona o le vaaiga
lea ua ia maua mai, ona tu lea o le tamaloa ma fai atu i lona
toalua, "aisea ua e fasi faapea ai lo'u afafine.?"
E faia pea...
©
Osini Faleatasi Inc. dba Samoa News reserves all rights.
|