Soso ese,
Aua e te faalavelave!
Tusia THA
Tiga lava le
lelei o ta a tamaita'I o Regina ma Salima o le 'au a le Fetu
mai Sasa'e mai Fagaalu, i le taimi na la tulia 'ai o le Pago
Girls i le latou ta'aloga i le Aso Gafua, ae na le mafai lava
ona mauaina 'ai e selau (100) 'ai ia na mauaina i le latou ta'aloga.
Semanu lava e
le taitai ona o'o i le selau 'ai a teine o le Pago Girls i lena
aso, ae ua laki o le tele o polo sapo a teine o le Fetu mai Sasa'e.
Ua fai si faaletonu
o ta a teineiti o le Pago Girls i lena aso, to'atele le 'au fuamoa
tusa ma le to'avalu, ae tele lava i le ta'ilua ma le ta'itasi
ae vagana ai le tamata'i o Tauia lea na uma lelei lava pe o ta
mai lava.
E fa'afoliga
mai i le va'ai a le Pago Girls ua na'o le Pisisami lava lea e
mafaufau i ai, ae pei e le ano i isi 'au.
E fasefulu ma
le lua (42) 'ai ae fa'ato'a lua pe o le 'au a le Fetu I Sasa'e,
ae o le taimi lava na pe pe ai tamaitai o Salima ma Regina, ia
na gasolo mai i luga o le malae le au-vaega lea e fuafua mo lea
tausaga.
E manaia si 'au
a le Fetu i Sasa'e pe afai e fai-fai ai pea le latou fiafia e
agai atu i le malae kirikiti aua le tausaga o lumanai. So'o se
'au lava e fia avea ma siamupini i se taimi oi luma ia onosa'I
lava i taimi nei.
ASO LUA - MATI
18, 2008
PETESA ma TAMA
O LE MEA'ESE (B)
O le ta'aloga
lenei na iloa ai le 'au o le a fa faiaina ma le 'au e tumau
pea i le tolu faiaina. Le tasi lea o 'au (Petesa-tai) na mafaufau
nisi i le lelei o latou fa'ate'a pe 'a fuafua atu i ai, pe 'ana
lelei uma isi tagata o le 'au.
So'o se taimi
lava e faia ai le ta'aloga a Petesa-tai, e vaaia ai le 'ese o
uiga a latou fa'ate'a. Ae o le taimi e ta ta ai le to'atele o
le 'au, e seasea a vaaia ai le tulaga lelei mai isi tagata ta,
'ae o isi tagata ta e le'i tulaga lelei mai lava i le tulaga
e tatau ona i ai, ae o le 'au atoa pe fitu sefulu ma le lima
pasene (75%) le aofa'i o le 'au lelei ae o le isi aofiaga e le'i
iloa lava ona tulai mai e fa'amoemoe i ai se 'au. Ia o le fai
so'o lava e lei iloa pe o'o atu I le tausaga lea ua selau pasene.
Manaia le alualu
i luma o le 'au laiti lena a le Mea'ese, ma o latou le lumana'i
o le alafaga mo le 'au tele, manaia fo'i tauau a nai faate'a,
malolosi ma o le tagataga'iatu e i ai se vaitaimi e faigata ai
foi nei tama pe'a to'a'aga e te'a le polo i afiafi uma.
E lima sefulu
ma le iva (59) 'ai na maua e le Mea'ese (B) na tuli e Petesa-tai
na'o le sefulu lua (12) pe 'ae maua.
O le aso nei
(Mati 20) o le a fetaui ai le Pisisami ma le 'au a Tula i le
itula e 3:00 i le afiafi, ae o le Aso Faraile o le a malolo ai
aua le Aso Maliu ona toe fa'aauau ai lea i le Aso Toonai i le
ta'aloga muamua (Manu'ula ma Petesa-tai) ona soso'o ai lea ma
(Tama o le Mua'au ma Tula) ae fa'ai'u e le (Papaseugogo ma Pago
Pago 'A').
E fa'amanatu
atu i le mamalu o le atunu'u le fagu pia a Samoa o le Vailima,
lea o lo'o fa'atauina e le GHC Reid Oloa o Leala.
|