Tala o le
Vaifanua
faaliliu;
A. Tuna
FILIFILIA
DR. SETH PENI GALEA'I E AVEA MA PERESETENE O LE KOLISI TUUFAATASI
A AMERIKA SAMOA
O le aso ananafi
sa faalauiloa atu ai i luma o le pulega ma le aufaigaluega a
le Kolisi Tuufaatasi a Amerika Samoa (ASCC) i se fonotaga faapitoa,
ia se faaiuga ua tasi ai nei le Komiti Faafoe o Aoaoga Maualuluga
(BHE), i le filifilia o Dr. Seth Peni Galeai e avea ma Peresetene
o le ASCC, e amata atu i le aso (Me 1, 2008).
I sana tautalaga
ananafi, na saunoa ai Dr. Galeai i lona taliaina ma le agaga
maualalo ma le fa'aaloalo tele, o lenei tofiga ua faapaleina
i o ia. O le susuga Uta Tagoilelagi, le taitaifono o le BHE
sa faalauiloaina atu le peresetene fou i luma o aufaigaluega
a le ASCC, i le aso ananafi.
Na saunoa foi
le peresetene fou, o le a ia galue malosi ina ia faamautuina
le tulaga maualuga ua iai nei le ASCC ma sa ia toe faamanatu
atu i le aufaigaluega ia le misiona a le ASCC, e aofia ai ma
le ofoina atu vasega e aoga mo fanau o le Pasefika pe a faimalaga
atu i Amerika.
O sui o le BHE
na auai i le filifiliga o Dr. Galeai, na aofia ai Uta, Tauiliili
Pemerika - le sui taitaifono o le BHE, Lauifi Tauiliili, Mine
Pase, Sapini Siatuu ma Faye Panama. E ui o le Faatonusili o
Aoga, le tamaitai fomai ia Dr. Claire Poumele, o se tasi o totino
o le BHE na tatau ona auai i lea lava filifiliga, ae peitai,
sa ia le auai ona e aiga i le peresetene fou o le Kolisi.
Na saunoa le
susuga Uta, e lua aso na o latou fono ai e saili se tasi ua agava'a
e avea ma peresetene fou o le Kolisi.
TOE SII TAU
O LE SUAUU
Ua atoa le lua
vaiaso talu ona pa'u le tau o suauu i le na'o le 4 sene, ae peitai,
o lo'o ua iai se talitonuga, i le toe faatulagaina o tau sii
atoa o suauu i totonu o Amerika Samoa, o le a faapea ona o'o
atu tau o suauu i le $4.
O le tau sii
atoa ua iai nei le kesolini, ua $3.62 i le kalone, ae peitai,
ona e toe faaopoopo iai e pamu kesi le latou 40% pe a o'o atu
le suauu i pamu kesi, o lea ua iai se talitonuga, o le a siitia
tau o suauu i pamu kesi, i le $4.05 i le kalone. O tau o suauu
i pamu kesi i le taimi nei, e $3.94 i le kalone.
Na saunoa le
susuga Sione Kava, mai i le Ofisa o le Suauu a le malo (OPM),
e le na'o Amerika Samoa ua tula'i mai ai lenei faafitauli, ae
ua faapea foi ona si'i tau o suauu i isi motu o le Pasefika,
e aofia ai ma Hawaii faapea nisi setete o Amerika, lea ua o'o
i le ta'i $4 pe sili atu foi, le tau o le suauu.
Na saunoa foi
Kava, o se taimi muamua lenei i tala faasolopito o Amerika Samoa,
pe afai ae o'o i le $4 le tau o le suauu.
FUAFUA LE
TAPUNIA O TAUAOFIAGA FAAPITOA A LE FONO I LE ASO FARAILE
Na faalauiloa
mai e taitai o le Fono i le aso ananafi, le iai se faamoemoega
mo le tapunia aloaia o tauaofiaga faapitoa a le Fono Faitulafono,
i le aso a taeao, pe afai ae o'o atu iai e le'i faauluina e le
Faigamalo ia isi mataupu sa faamoemoe e iloiloina i lenei tauaofiaga.
Ua maea ona pasia
le afioga Tufele Li'amatua e avea ma se tasi o sui o le komiti
faafoe a le falemai faapea le pili palota lotoifale a le militeri,
ma e na'o le pau ia o mataupu ua maea ona o'o atu i le Fono.
Ae o lo'o faatalitali
nei le Fono mo iugafono e faatatau i totogi o faiaoga, o le pili
mo le polokalama a le Medicare a le falemai faapea le mataupu
tau 'copyright' mo le Fa'aaliga o Aganuu a le Pasefika ia Iulai.
Na saunoa le
afioga Savali Talavou Ale, le Fofoga Fetalai o le Maota o Sui,
afai e le faauluina e le Faigamalo nei iugafono i le aso, o le
a fono loa ma le Peresetene o le Senate, le tofa Lolo M. Moliga,
mo le tapunia o nei tauaofiaga i le Aso Faraile.
Na saunoa Lolo
i le aso ananafi, o se tasi o iugafono o loo faatali nei iai
le Fono, e pe a ma le 50 laupepa ma e tele se taimi e manaomia
e le aufaigaluega a le Fono i mataupu tau tulafono, e iloilo
ai lea lava iugafono, ae e le'i faauluina i totonu o maota e
lua.
Ae peitai, sa
talosagaina e le afioga Senatoa Salanoa Aumoeualogo ia taitai
o le Fono ina ia toe liuliu le tofa e tusa ai ma lenei tulaga,
ona e 10 aso na taloina ai e le kovana nei tauaofiaga faapitoa,
ma e tatau i Fono ona mulimuli iai. Na ia saunoa foi, afai ae
maua mai nei pili ae le lava se taimi e iloilo ai, e mafai lava
ona toe taatia seia tatala aloaia tauaofiaga lona 4 a le Fono
Faitulafono ia Iulai.
Na saunoa Lolo,
o le a maua mai se faaiuga a taitai o le Fono e tusa ai ma lenei
mataupu i le aso a taeao.
Faafesootai
le tusitala i le imeli evaga@samoanews.com.
© Osini Faleatasi Inc. dba Samoa News reserves
all rights.
|