Pasia e le
Fono pili palota mo tama fanau a Amerika Samoa i totonu o le
militeri
Taoto vaega e aofia ai faifeau seia o'o ia Iulai
Tusia: Fili
Sagapolutele
O le aso ananafi
sa pasia aloaia ai e le Senate ma le Maota o Sui se pili e tuuina
atu ai le avanoa i alo ma fanua a le atunuu o loo i totonu o
vaega au a le malo tele e mafai ai ona lesitala ma palota i le
tofi kovana/lutena kovana ma sui o le Maota o Sui o le Fono.
O lea faaiuga
ina ua maea i le Aso Lua se komiti teuteu a maota e lua e talanoaina
ai suiga a le Maota o Sui sa tuu i totonu o lea pili. O ia suiga
e tuuina atu ai le avanoa i susuga i faafeagaiga ma o latou aiga
o loo alala i fafo ona palota i le tofi kovana/lutena kovana
ma faipule o le Maota o Sui.
I se fonotaga
a le komiti teuteu sa teena ai e le toatele o sui o le komiti
suiga a le Maota o Sui ma o la latou lipoti i lenei faaiuga sa
tuuina atu i luma o sui o le fono i le aso ananafi i tauaofiaga
a le Senate ma le Maota o Sui. Sa tulai mautu pea le senate ma
tete'e i suiga a le Maota o Sui ona o talitonuga a le Senate
o le pili mo alo ma fanau a Amerika Samoa i le militeri e tu
maoti lava mo le militeri.
Ina ua lauina
le lipoti a le komiti teuteu, sa lagolagoina lea faaiuga e le
Senate. Saunoa le afioga ia Senetoa Tuaolo M. Fruean o le faaiuga
moni lea o lenei mataupu, e tumau pea le tino o le pili e pei
ona i ai muamua, ina ia faatulagaina mo alo o le atunuu i le
militeri.
Saunoa le afioga
ia Senetoa Pulefaasisina Tuiasosopo faapea o se tasi lenei o
pili taua tele i lenei nofoaiga a le Fono, ona o lenei pili o
le sao lea o le Fono mo tama fanau a le atunuu i totonu o le
militeri ae maise i latou ua maliliu ona o la latou tautua i
totonu o le militeri.
O le faaiuga
a le komiti teuteu, e pei ona lauina i le Maota o Sui sa tulai
mai ai nisi o manatu ona talu ai e toalua nisi o faipule sa lagolagoina
i le taimi o iloiloga a le komiti teuteu, le teena o suiga a
le Maota o Sui.
Saunoa nisi o
faipule i le le fiafia ona ua le tutu faatasi uma sui o le Maota
o Sui i lenei mataupu i le taimi na faia ai iloiloga a le komiti
teuteu, ma iu ai ina teena a latou suiga.
I le saunoaga
a le afioga i le faipule ia Agaoleatu Charlie Tautolo sa ia taua
ai faapea e tatau loa ona talia le lipoti a le komiti teuteu
e teena suiga a le Maota o Sui.
"E fai aso
le Ali'i," o upu faaopoopo ia mai le afioga i le faipule
ia Gaoteote Palaie, ma ia lagolagoina ai foi le manatu o Agaoleatu.
Sa tuuina atu
le faafetai a le Fofoga Fetalai, Savali Talavou Ale i le mamalu
o faipule sa galulue i lenei mataupu ma faamalulu atu ai foi
i sui o le Maota ona o le faaiuga ua oo i ai e teena a latou
suiga i le pili.
Saunoa foi Savali
faapea e matamuli foi ona o le toatele o faipule o le Maota o
Sui sa i ai i le iloiloga a le komiti teuteu ae mulimuli ane
ua teena a latou suiga.
O le taimi nei
ua lesitalaina nei i faamaumauga a le Fono Faitulafono le pasiaina
o lenei pili ona tuuina atu lea i le kovana ma sana faaiuga.
E i ai le faamoemoe e sainia e le kovana le pili, ma afai o le
tulaga lea o lona uiga o lea tulafono e amata i le palota ia
Novema o le tausaga lenei.
PILI FAIFEAU
Ua le gata i
le matapu i le pili o le militeri, sa talanoaina foi e le Senate
sa latou pili lea e faatagaina ai susuga i faafeagaiga ma o latou
aiga, e palota mai fafo i tofi o le kovana/lutena ma faipule
o le Maota o Sui. O lea pili e talia ai manaoga o le Maota o
Sui ina ia mafai ona palota mai fafo faifeau ma o latou aiga.
Ma o le faaiuga
a le Senate e faataoto i le taimi nei le pili e palota ai mai
fafo faifeau ma o latou aiga, ae se'i oo i se vaitaimi o i luma
ona toe iloiloina lea. O lona uiga ua fuafua le Senate e iloilo
lenei pili ia Iulai pe a amata le tauaofiaga lona fa a le Nofoaiga
30 a le Fono.
Saunoa le tofa
ia Lolo M. Moliga, peresitene o le Maota o Sui, e manaomia le
lava o le taimi e iloiloina ai lenei pili faatasi ai ma se pili
foi o loo faamoemoe le Maota o Sui e faauluina mo faifeau ma
o latou aiga.
Atonu foi e oo
atu ia Iulai ua mautu mai se manatu o le Ofisa o Palotaga i lenei
mataupu mo faifeau ma o latou aiga. O le tauaofiaga faapitoa
o loo ia nei a le Fono Faitulafono, lea sa amataina i le Aso
Gafu, e na o le 10 aso ae ua talitonu le tofa ia Lolo e le lava
le taimi e iloiloina maoti ai lenei mataupu.
Faafesootai
le tusitala i le imeli fili@samoanews.com.
©
Osini Faleatasi Inc. dba Samoa News reserves all rights.
|