Tapa Komiti
Faufautua mo Vaomatua i le Fono mo se fesoasoani
Tusia: Fili
Sagapolutele
O lo'o ua i lumanei
o le Peresetene o le Senate, le tofa Lolo M. Moliga, se talosaga
mai i le Komiti Faufautua mo Vaomatua, mo le faauluina o se tulafono
taufaaofi e faatulagaina ai se vaega tupe e fesoasoani e faatauina
ai mai le aiga o Haleck se vaega o le fanua o loo i ai vaomatua
faasaoing i Ottoville.
I le aso 24 o
Aperila sa tusi atu ai le taitai fono o le komiti, le susuga
lmo Tiapula ma faailoa atu ia Lolo faapea ua tauaaoina e le vaega
e gafa ma vaomatua a le Kolisi Tuufaatasi a Amerika Samoa, se
tinoitupe e $994,000 mai le feterale e faatauina ai lea fanua
faasao i Ottoville.
Ae peitai, e
le mafai ona fa'aaogaina lea vaega, seia vagana ua maua atu e
le malo o Amerika Samoa se tinoitupe e $248,500 e faaopoopo iai
i le tupe mai i le feterale.
Ma o le mea lea
o loo manaomia ai e le komiti se tulafono, pe o se pili e faauluina
ma pasia e le Fono mo se tupe faaagaga e $248,500, i se taimi
vave, a leai, o le a toe sei e le feterale le latou $994,000.
Na saunoa Tiapula,
o le vaega tupe feterale na maua mai i le tausaga e 2006, ma
ua leva ona maua e Amerika Samoa le avanoa e faatauina ai lenei
fanua faasaoina, ae le'i faia lava se faaiuga.
I se iloiloga
a le Fa'amasinoga Maualuga sa faia i le vaiaso lenei i le mataupu
lava lenei i le fanua i Ottoville, sa faailoa ai e Avamua Dave
Haleck ia Faamasino Sili Michael Kruse e faapea, ua leva tele
ona faia feutagaiga a lona aiga ma le malo - tusa nei i le 10
tausaga - i le faatauina pe lisi o lea faanua. Ae peitai e na
o le tasi lava le faalapotopotoga ua mafai ona mauaina se vaega
tupe e ala mai lea i le polokalama ale fetarale mo vaomatua faasaoina.
O le aso 22 o
Aperila sa faia ai se faaiuga a Kruse e faasaina ai i se taimi
le tumau ia Avamua mai lona aiga ona faamamaina pe atinae foi
lea vaega o eleele i Ottovile. O lea faatonuga mai ia Kruse e
tumau se ia maea se faaiuga maumaututu a le faamasinoga pe tatau
i le aiga o Haleck ona faia se pemita e kilia ai le laueleele
lea e i ai le vaomatua faasaoina.
I lana tusi ia
Lolo, sa taua ai e Tiapula e faapea, ua ofoina atu e le aiga
o Haleck se fesoasoani i le faatauina o le fanua, ae peitai o
se maliliega maumaututu i le faatauina o le fanua e le'i faia
lava.
Na saunoa foi
Tiapula, e 19 eka o vaomatua faasaoina o loo i lalo o le puleaga
a le aiga o Haleck ma o se vaega o lea fanua e mafai ona faatulagaina
e avea ma laufanua faasaoina, ae peitai e fuafua lava i luga
o le tau e faatauina ai.
Taua foi e Tiapula
e tele penefiti a Amerika Samoa e maua mai i le faasaoina o lenei
vaomatua ma o le mea lea e tatau lava i le malo ona faatulagaina
se tupe e faatauina ai. Ma e le gata i lea, e toatele o loo mananao
i lenei laufunua ma e le mafai e le aiga o Haleck ona faatalitali
pea seia faia se faaiuga a le malo.
O kopi o lenei
tusi sa tufatufaina i afioga i Senatoa. I le aso ananafi sa saunoa
ai le afioga ia Senatoa Pulefaasisina Tuiasosopo i le aoga tele
o nei laufanua faasaoina ma e tatau ona puipuia, ma o le mea
lea e tatau i le Fono ona iloiloina lelei le tusi a Tiapula ma
faia se faaiuga lelei.
O le taimi nei
o loo iloiloina e le Ofisa o le Peresetene lenei tusi ma atonu
e oo atu ia Iulai ua tumau se faaiuga o le mataupu i le faauluina
o se pili aua se vaega tupe e fesoasoani i le faatauina o lea
laufanua i Ottoville.
Faafesootai
le tusitala i le imeli ausage@samoanews.com.
© Osini Faleatasi Inc. dba
Samoa News reserves all rights.
|