Talimalo
Amerika Samoa i le sailiga o se lalelei o le Pasefika ia Oketopa
faaliliu:
Ausage Fausia
I le umi ai o
se taimi o faatali Amerika Samoa mo le faataunuuina o lana taligamalo,
aua le sailia o se lalelei o le Pasefika mo lenei tausaga, o
le aso ananafi na faalauiloa mai ai, o le masina o Oketopa ua
faamoemoe e faia ai lenei faamoemoe.
Ua tuuina atu
foi le faatuatuaga atoa a le komiti aemaise ai le taitaifono
o le komiti o lo gafa ma le tapenaina o lenei faamoemoe, tofa
Faleseu Eliu Paopao, o le a lagolagoina e le atunuu atoa lenei
faamoemoe.
I le fonotaga
lea sa usuia i le masina o Novema i le tausaga na tea nei i Apia,
e sailia ai se atunuu latou te faatautaia le faamoemoe o le Pasefika
mo lenei tausaga, na manumalo ai Amerika Samoa ina ua fulisia
sui o le komiti e talimalo le atunuu i le isi Miss South Pacific
o loo lumanai nei.
Ua maea ona faailoa
atu e le tofa Falesui i le taitaifono o le komiti o Miss South
Pacific, afioga i le sui Palemia o le malo o Samoa, Misa Telefoni
Retzlaff ma ona sui totino e toa13, o le aso 19-25 o Oketopa
o le a faataunuuina ai lenei faamoemoe i laufanua o Amerika
Samoa.
O le po o le
aso 24 o Oketopa i le maota o le Lee Auditorium ua faatulagaina
ai le faataunuuina o le faamoemoe mo lenei tausaga, o le aso
Faraile lea, ina ia maua ai e isi sui tauva mai isi atunuu mo
le Pasefika le avanoa e toe malaga ese atu ai i le aso Sa, mo
le pu'eina o a latou vaalele i Apia, aua le toe foi atu i o latou
atunuu.
Ae i le sailia
ai o se lalelei o le Pasefika mo lenei tausaga, o le tamaitai
o Tessi Leila Toluta'u, 20 tausaga mai le malo o Tonga ua faamoemoe
e faamaeaina ai i lea aso lona taimi sa ia tauaveina ai le pale
mo le lalelei o le Pasefika.
E ese mai ai
ia Amerika Samoa lava ia, o isi atunuu ia ua faamaonia le auina
mai o latou sui e aofia ai Papua Niu Kini, Samoa, Atu Kuki,
Tonga ma Niue.
O loo galulue
le komiti o loo tapenaina lenei faamoemoe, mo le faatulagaina
o a latou faailoga, ina ia tutusa ma faailoga i le taligamalo
o le tausaga e 2004, lea sa $5,000 na mafai ona maua e le o le
a manumalo i le pale o lea po.
I le avea ai
o Amerika Samoa ma atunuu o loo latou talimalo mo le faamoemoe,
e tatau ona latou sauni mo le tuuina atu o se totogi mo le umi
e vaiaso atoa, aua le faafiafia ina o sui tauva, e ala i a latou
taumafataga, aemaise ai o auala o le a femalagaa'i ai.
E ui e le o se
faamoemoe e faigofie, peitai ua tuuina mai lava le faatuatuaga
a le komiti i le atunuu, ina ia latou lagolago mo le faamatagofieina
o le faamoemoe, aemaise ai, o loo sauni foi le atunuu mo lana
taligamalo i le faaaliga o Tu ma Aganuu a le Pasefika.
Faafesootai
le tusitala i le imeli ausage@samoanews.com.
© Osini Faleatasi Inc. dba Samoa News reserves
all rights.
|