Suesue SSIC
se mataupu faatatau i ni nonogatupe o loo faia i le falema'i
i Tafuna
tusia: Ausage
Fausia
Ua tauaaoina
nei e le komiti suesue a le Senate, le SSIC ni ripoti e uiga
i ni nonogatupe o loo masalomia le faia i le nofoaga o le falema'i
i Tafuna, e faaaoga i ai tupe o loo totogi e le mamalu o le atunuu
mo a latou pili mo le falema'i.
E tusa ai o ripoti
ua i luma o le komiti suesue a le SSIC o loo taua ai, o tupe
o loo maua mai e le falema'i i tupe o loo totogi e le mamalu
o le atunuu, o loo faaaoga o se alagatupe lea e faa aitalafu
atu i tua ma le faamoemoe e toe totogi mai.
Peitai o le itu
e le o mafai ona manino mai i le taimi nei, pe o le a le umi
na amata mai ai lenei faiga, o le nono atu lea i tua o tupe o
loo maua mai i le mamalu o le atunuu, ae o ai foi o loo manuia
ai.
I le alia'e mai
ai o nei tuuaiga, na tuuina atu ai e le taitaifono o le komiti
suesue a le SSIC, afioga Alo Dr. P. Stevenson se tusi i le Teutupe
a le malo, tofa Gaea Perefoti Failautusi, ma fesiligia ai nisi
o faamaumauga tau tupe aemaise ai o nisi lava o faamaumauga e
faamaonia ai suesuega o le a alo atu i ai le komiti.
Saunoa Alo, "Ona
o i tatou o taitai o le atunuu, e tatau ai ona tatou galulue
mo le sailia o tali o faafitauli e pei ona aafia ai le atunuu,
o le ala lea e tatau ai ona tatou suesueina ma le toto'a lenei
mataupu, ina ia mafai ai ona tatou faia se gaioiga maumaututu."
Saunoa foi Alo,
"Faamoemoe o le a le lagolagoina sa matou faatalauula atu,
ina ia tatou galulue soosoo tauau mo le faamaninoina o lenei
mataupu, ma faasa'o ni mea o faaletonu."
Ina ia sailia
le mea moni ma le faamaoniaina o tuuaiga pe moni pe leai foi,
ua talosagaina ai e le SSIC pepa ma kopi mo le teuina o tupe
a le falemai, talu mai le tausaga e 2005 seia oo mai i le taimi
nei.
E le gata i lea,
o le a sailia foi e le SSIC faamaumauga uma mai le falemai i
Tafuna, le Tafuna Health Clinic mo a latou tupe maua ma pepa
sa faamauina ai tupe maua nei, aemaise ai o a latou tupe sa tuuina
atu i le ofisa o le Tupe a le malo.
Saunoa Alo, na
pau le itu o loo taumafai le SSIC e faamanino muamua, pe moni
o loo faia lea ituaiga gaioiga, ae o anafea foi na amata mai
ai.
Faafesootai
le tusitala i le imeli ausage@samoanews.com.
© Osini Faleatasi Inc. dba Samoa News reserves
all rights.
|