Gaoteote:
E tatau foi ona i ai se leo maota o sui mataupu i siitaga totogi
faiaoga
tusia: Ausage
Fausia
I le iloiloina
ai e le komiti o le tupe a le maota o sui o suiga a le Senate,
e tusa ai o le tulafono taufaaofi mo siitaga o totogi o faiaoga
i le taeao ananafi, na saunoa ai le afioga i le alii faipule
ia Gaoteote Palaie Tofau, e le tatau ona faamaonia na o le maota
maualuga o le komiti lea latou te iloiloina agavaa ma laisene
o faiaoga, ae tatau foi ona i ai se leo o le maota o sui.
Saunoa le afioga
i le Tamaita'i o le Ao, Gaoteote P. Tofau, e taua foi le i ai
o se leo o le maota o sui, aua e le mafai ona amo pito tasi le
faatautaiina o le malo, ae manuia pe afai e tofu uma itu e lua
o le fono ma o latou finagalo i mataupu faapenei.
"Aemaise
lava i le mataupu e uiga i faiaoga, e tatau foi ona i ai se leo
o le maota o sui aua o le isi lenei vaega o le fono faitulafono,
le tafatolu o le faigamalo a Tutuila ma Manu'a," o le saunoaga
lea a le afioga i le Tama'ita'i o le Ao.
Sa lagolagoina
e le afioga i le taitai komiti, Laolagi Fonoti Savali Vaeao le
manatu, e tatau ona aofia ai ma le maota o sui i le faamaoniaina
o totino o le komiti faapitoa lea.
O lenei feiloaiga
a le komiti o tupe a le maota o sui, sa faia ina ua latou iloiloina
suiga a le maota maualuga, e tusa ai i le tulafono e faatulaga
ai totogi mo faiaoga.
I suiga a le
maota maualuga o loo taua ai, ia lava a na o le maota maualuga
latou te faamaonia le komiti e toatolu ona sui, lea e tofia e
le kovana latou te iloiloina tulaga o agavaa mo faiaoga ma latou
laisene, ia faatasi foi i le tausaga ona maua e faiaoga totogi
faaopoopo (Increment) ina ia tutusa ai ma isi tagata faigaluega
a le malo, ma ia faaleaogaina uma le vaega o le tulafono e faapea,
"ua faatagaina le matagaluega o aoga a le malo, latou te
faatulagaina ni totogi mo auaunaga e faatatau i le faamalosia
o polokalame o tusipasi mo faiaoga, ma o tupe e maua mai ai,
o le a siaki ma sueina i suegatusi a le matagaluega o tupe a
le malo."
I ia suiga, ua
teena e le maota o sui, ma ua tuu ai i totonu a latou suiga,
ma o latou suiga la nei.
I le suiga muamua
a le Senate, ia na o i latou e faamaonia sui e toatolu a le komiti
latou te iloiloina laisene ma tusi faamaonia mo foma'i, ua suia
e le maota o sui, ai aofia uma ai maota e lua, poo le Fono Faitulafono
ina ia o gatasi ai ma tulafono tumau a le fono.
I le suiga lona
lua ia faatasi i le tausaga ona maua totogi faaopoopo, ua finagalo
le maota o sui ia toe faafoi i le mea sa aumai ai le tulafono,
ia faalua i le tausaga, aua o lea ua maea ona faamanino e le
Kovana le pogai na mafua ai ona naunau ina ia faalua i le tausaga
ona maua lenei totogi faaopoopo.
Ma le suiga lona
tolu, ua finagalo le maota o sui ina ia toe faaaoga le vaega
mulimuli o le tulafono lea na aveesea e le maota maualuga, e
tuuina atu ai le malosi i le ofisa o aoga latou te faatulaga
ai totogi mo le faia o aoga mo tusipasi, ma o ia vaega tupe o
le a sueina i suegatusi a le malo.
O le taeao ananafi
na pasia ai e le maota o sui le pili a le Senate i le faitauina
faalua, faatasi ai ma suiga, ma ua faamoemoe o le taeao nei lea
o le a faitau faatolu ai.
Faafesootai
le tusitala i le imeli ausage@samoanews.com.
©
Osini Faleatasi Inc. dba Samoa News reserves all rights.
|