Faaleaoga
e le faamasinoga le moliaga mamafa na tuuaia ai George Neru
tusia: Ausage
Fausia
I le maea ai
ona faafofoga o le faamasinoga i le molimau e toatasi na tuuina
atu e le malo, faapea ai ma faafinauga mai itu e lua o le mataupu
faasaga ia George Neru, na tuuina mai ai loa le faaiuga a le
afioga i le alii faamasino sili lagolago, Lyle L. Richmond, ina
ia faaleaoga le moliaga mamafa e tasi lea na tuuaia ai o ia e
le malo.
O le susuga Neru,
o se tasi o alii faipisinisi i le atunuu, na tuuaia i lona taumafai
lea e tuuina atu se taui tau tupe i le alii leoleo, susuga Det.
Lui Fuifatu, ao taumafai le alii leoleo e suesueina le mataupu
e uiga i ni katuni sikaleti e faapea sa gaoia ma faatau atu i
lona faleoloa.
I faamaumauga
a le faamasinoga na taua ai, o le aso 5 o Iuni, 2007 na malaga
atu ai le alii leoleo o Fuifatu i le faleoloa o le CCG i Iliili,
lea faleoloa lea a Neru ma lona toalua, e suesue le mataupu e
uiga i sikaleti na ave faagaoi e nisi ma faatau atu i lona faleoloa.
Ao i ai Fuifatu
i le faleoloa o Neru, na talosagaina ai o ia e Neru, pe mafai
ona la talanoa i totonu o se tasi o potu. Sa taua e Fuifatu i
lana molimau i luma o le faamasinoga i le taeao o le aso Lua
na tea nei, ao la talanoa ma Neru e uiga i katuni sikaleti na
ave faagaoi, na faapea ona aofia ai i le la talanoaga se faamatalaga
mai ia Neru, e uiga i se tasi o mataupu o loo i luma o le faamasinoga,
lea o loo aafia ai nisi o ana fanau Saina (Chinese Children),
ma masini komipiuta ia sa ave faagaoi.
I lea mataupu,
na talosagaina ai e Neru se fesoasoani mai ia Fuifatu, ae o lea
o le a ia (Neru) talanoa i lana fanau Saina, ina ia tuu atu se
$500 ia te ia (Fuifatu).
Na taua e le
susuga Fuifatu i lana molimau, na te lei taliaina le talosaga
na tuuina atu e le susuga Neru ia te ia, ae sa ia toe savali
loa i le taavale a leoleo, lea o loo faatali mai ai le isi ana
paga, o le susuga lea i le alii leoleo ia Lutu.
Na fesiligia
e le loia a Neru, Sharron Rancourt le susuga Fuifatu, pe aisea
na le aofia ai i le tusi saisai na tuuina atu mo Neru le mataupu
e uiga i le la talanoaga lea ma Neru aemaise ai o le $500.
Na tali Fuifatu,
e lei aofia i le tusi saisai le tulaga lea, peitai o loo i totonu
o lana ripoti na saunia ma tuuina atu i luma o le faamasinoga.
Ina ua maea le
molimau a le malo i le aso Lua na tea nei, na talosagaina ai
loa e le tamaitai loia o Rancourt le faamasinoga ina ia solofua
le moliaga o loo tuuaia ai Neru, ona e le o lava mau a le malo
e lagolago ai le gaioiga sa ia faia, aemaise ai, e le o mafai
e le malo ona faamanino i lalo o le tulafono, aia tatau o tagata
faigaluega a le malo na faaleagaina e le ua molia.
O lea talosaga
na teena e le alii faamasinoga i le aso Lua na tea nei, ona sa
saunoa Richmond, o loo lava mau a le malo e lagolago ai le latou
moliaga.
Peitai i le taeao
ananafi ina ua toe faaauauina lenei mataupu, na faailoa mai ai
loa e le afioga Richmond, i le maea ai ona latou auiliiliina
faamaumauga uma e uiga i le molimau ma ripoti ua i luma o le
faamasinoga, ua faaiugafonoina ai, e le o lava mau e lagolago
ai le moliaga faasaga ia Neru.
Faafesootai
le tusitala i le imeli ausage@samoanews.com.
© Osini Faleatasi Inc. dba
Samoa News reserves all rights.
|