Tala otooto o Faamasinoga
tusia: Ausage Fausia
VAA MATUATALA
Na taofia e leoleo le alii o
Vaa Matuatala, ona o tuuaiga i lona lafo oni upu mataga, faapea
ai lona tauaiina o ni atigifagu i le malumalu o le ekalesia a
Iesu Keriso o le Au Paia e Gata ai i Malaeimi.
Na taunuu leoleo i le vaega tonu
o loo tupu ai le faalavelave peitai sa alu i le atoa Vaa ina
ua ia iloaina mai le taavale a leoleo, ma fai ai loa a latou
tuliga, seia maua i tafatafa o le faleoloa o le ACE.
O loo tuuaia o ia i le faatupu
vevesi i nofoaga faitele, ma e $200 le tupe taofia ua faatulaga
e le faamasinoga e tatalaina ai o ia i tua mai le toese. O le
tamaitai loia ia Melissa Simenson o loo tulai mo ia, ae o Nicole
Castro o loo tulai mo le malo.
FAAFEFE LONA TOALUA I LE AGAESE
O se alii na ia faafefeina lona
toalua e ala i lona taumafai e tuu le agaese (tulou) i lona ua
na taofia e leoleo i le faaiuga o le vaiaso, ma tulai ai i luma
o le faamasinoga faaitumalo i le taeao o le aso Gafua na tea
nei.
O loo tuuaia o ia i le faatupu
vevesi i nofoaga faitele, peitai na taua e le loia a le malo,
Nicole Castro, o le a tuuina mai e le malo ni moliaga faaopoopo
pe afai ae maea suesuega o loo faagasolo i le taimi nei.
I faamaumauga a le faamasinoga
na taua ai, na ona atu le ua molia i le po o le aso Toona'i na
tea nei, peitai sa musu lona toalua la te momoe, o le ala lea
na ita ai ma ia faaoolima ai loa ia te ia. Sa ia faaoolima foi
i lona atalii e 6 tausaga le matua.
FOMA'I GALU
O se alii na taumafai e talepe
se taavale sa paka i luma o se faleoloa kolea i Atuu, na taofia
e leoleo ma tulai ai i luma o le faamasinoga faaitumalo i le
taeao o le aso Gafua na tea nei.
O le alii o Foma'i Galu, o loo
tuuaia e le malo i le faatupu vevesi i nofoaga faitele, ma o
loo fuafua le malo latou te failaina ni moliaga faaopoopo faasaga
ia te ia, i le maea ai o suesuega a leoleo o loo faia.
Na fesiligia o ia e leoleo pe
aisea na ia taumafai e talepe le taavale sa paka i luma o le
faleoloa, sa ia taua, sa ita i le alii e ana ia le taavale, ina
ua musu e avatu se $10 e toe faatau ai sana fagupia.
O le alii o Galu, e galue i se
tasi o kamupani i'a i le atunuu, ma ua tatalaina o ia i tua e
faatali ai le aso Gafua o le vaiaso fou, lea ua faamoemoe le
malo e tatau ona oo atu i ai, ua maea suesuega a leoleo o loo
faia.
Faafesootai
le tusitala i le imeli ausage@samoanews.com.
©
Osini Faleatasi Inc. dba Samoa News reserves all rights.
|