E ono tofi
ni komiti teuteu a maota e lua ona o suiga i le pili e sii ai
totogi o faiaoga
tusia: Ausage
Fausia
E ui e le o mautinoa
mai i le taimi nei pe oo ona tofia ni komiti teuteu a maota e
lua, ona o suiga e uiga i le pili lea ua faatulaga ai siitaga
mo totogi o faiaoga, peitai na saunoa le taitaifono o le komiti
o le tupe a le maota o sui, afioga Laolagi Fonoti Savali Vaeao,
afai ae teena e le maota maualuga suiga a le maota o sui, o lona
uiga e tofia komiti filifili taitoatolu.
O le aso ananafi
na pasia ai le pili a le maota o sui i lona faitauina faatolu,
ma ua tuuina atu i le maota maualuga, peitai o le taeao nei,
o le a pasia ai loa e le maota o sui le pili a le senate, faatasi
ai ma suiga a le maota o sui.
I le maota maualuga,
o loo faatali le Peresetene ma le Senate i se faaiuga e tuuina
atu e le maota o sui, e tusa ai o suiga ua latou faia i le tulafono
e sii ai totogi mo faiaoga.
Saunoa le alii
Peresetene o le Senate, tofa Lolo Moliga i luma o le maota i
le aso ananafi, o loo i ai suiga a le maota o sui e ono faia
i le latou pili, ma e ao ona toe tuuina atu mo le faia i ai o
se faaiuga a le maota maualuga.
Afai ae teena
e le maota maualuga suiga a le maota o sui, ona tofia loa lea
o komiti teuteu a maota e lua, ma o ia komiti e taitoatolu ona
sui e pei ona faatulaga mai e le tulafono.
Afai ae le maua
se maliliega i le ulua'i komiti teuteu, ona toe tofia lea o le
isi komiti teuteu e taitoaono ona sui.
E 17-0 le palota
na pasia ai e le maota o sui le latou pili i le aso ananafi,
lea e aofia ai ma le palota na tuuina mai e le Fofoga Fetalai
o le maota o sui.
O le palota a
le Fofoga Fetalai a le maota o sui, e le tau faalauiloaina sei
vagana u fesiligia, pe na te tuuina mai lava i lona finagalo
malie, e pei ona i ai lana palota na tuuina mai i le aso ananafi.
Afai ae teena
e le Senate suiga a le maota o sui, o le aso e tatau ona faatulaga
ai komiti teuteu a maota e lua, peitai o popolega o loo i ai
i taitai o le fono, o lea ua toe tasi le aso o le fono faapitoa
a le kovana o loo totoe.
© Osini Faleatasi Inc. dba Samoa News reserves
all rights.
|