Ads by Google Ads by Google

Toe Sa’afi mo le Afioga le Alalagafa

Tauanu’u Fasiota
 

 

“Pe afai e tofa se ali’i taua, e sa ona toe fa’alavelave se tasi, se’i vagana, o se fe’au taua tele. Afai e manatu se tasi ina ia fagua o ia, ona nofo lea ma tata ona tulivae, se’i fa’alogo mai o ia ma ala mai. O lea, ou te le toe tata tuli pe toe fafagu i la’u manamea. Ae na ona ou fa’apea atu, ua vaivai a’u, i lo’u manatu atu,” o upu ia sa amata ai le molimau a le tina loto fa’avauvau, Salamina Ofisa Galea’i, lea ua aofia nei o ia i le fa’alagiga ua masani ai le Tusi Sa, ‘o tina ua oti a latou tane!’

 

I le toe sauniga o le susuga le Tiakono Toeaina o lana Ekalesia i Nua ma Seetaga, sa tutula’i ai molimau a le Malo, le afioga le Peresetene o le Maota Maualuga, e avea o ia ma molimau a le Fono Faitulafono sa tautua ai Tauanu’u.

 

“Afai e te saili se ta’ita’i e le maluelue gofie ana fa’ai’uga, e tu mai i o’u luma Tauanu’u, e te le iloa se mea o le a e ita ai i lea ituaiga o tagata tautua, po’o se ta’ita’i agamalu. Na te fa’aaogaina fautuaga, e mautinoa o lana fa’afofoga i ou lagona fa’aalia e le fa’alavelavetia i ni ona lava manatu, ma o se tasi e le tiga gofie i ni fa’amatalaga e lalafo atu, o le mea moni, o se tasi ua masani ma faiva o le onosa’i ma le agamalu, ae o lo’o ia te ia le uiga to’a o se ta’ita’i fai mea tonu,” o le saunoaga lea a Gaoteote Tofau Palaie.

 

Ina ua tula’i le afioga le Alagafa Paepae Joseph Faiai, sa ia molimau i le la’ua va fa’a-Ta’ita’i o aiga, nu’u ma le itumalo. Sa tutulu o ia, ma molimau i le soifua fesoasoani e fautua i taitai talavou, e i ai lona sui. Peita’i, sa ia iloa lelei, le soalaupule a lenei tama ma lona fo’i tua’a ua maliu, Paepae Faiai, sa la’ua va’ava’alua i le tele o fa’ai’uga lelei o mea e fa’atino mo le galuega ale Atua, le afio’aga ma le itumalo atoa.

 

“O lenei le isi ta’ita’i, sa iloga ai se auaunaga a le Itumalo o Alataua, e le so’ona maua fo’i nei ituaiga o tama o le afio’aga. Fa’afetai i lau fa’asoa mai ia te a’u le atali’i, aua e le o faigofie lava fo’i nei ituaiga faiva, e le’i lava le tofa manino ma le fa’autaga loloto, sa ia fa’ailoa mai ala e fa’amautu ai nei sosia mo a’u, ia faigofie le tausiga o aiga, le nu’u ma le itumalo,” o lana saunoaga lea.

 

“O le agamalu, le gaoia, laufofoga fiafia, ma le loto fa’amaulalo, ae ia mau le tofa, o mea uma nei ua aotelega i lana auauna ua moe malolo nei. Fa’afetai i lou olaga na tu’uina atu ina ia maua ai se ‘ai o lou aiga, nu’u ma le itumalo i vaega fa’aupufai o malo.”

 

Sa usuina le pese matagofie e se tama’ita’i sili ona la’ititi ae siufofoga malie e sula ai le soifua galue o Fasiota - “Ave lou Ola ia Aoga”

 

I le molimau a le tina, ia Salamina, sa ia fa’amatala lona olaga tausi aiga, tausi fanau, ma le naunauta’i ia nofo lelei lona aiga ae maise le la’ua fanau e to’a 17, o fanau a ana fanau e to’a 53 ma fanau a fanau a lana fanau e to’a 32.

 

O lea fo’i sa i ai se vaitaimi o lona soifua sa tautua ai i le militeri, ae ua vala’au nei e malolo, ua mae’a le fe’au mo ia. Fa’afetai tautua Tauanu’u Fasiota. E faigata ona toe maua se tasi e tusa ma oe.

 

O ana auaunaga i le Malo, lona itumalo, lona nu’u ma lona aiga, ua mae’a lisia i se tala na tusia i le i’ugafono a le Fono na tolaulauina ma ua taua’aoina fo’i le kopi i le tina ia Salamina.

 

O lona suafa Tauanu’u, le afioga le Alalagafa, sa ia tau’aveina, ae sa i ai ona uso matutua ia te ia, o se fa’ailo lea o lana tautua i lona aiga, peita’i, e pei ona molimau le tina o le aiga, “E le’i avea lea ma mea e le fa’alogo ai i ona uso matutua. A fe’au mai i ma’ua ma o atu ae otegia mai e lona uso matua, e na’o le punou lava ma fa’alogo. A mae’a, ona fesili lea, Ua uma mai le mea na e le malie ai? Ona fai lea o sana tala malie, ma toe so’o fo’i le fau ma le fau i tala fiafia fa’auso e galo ai na fa’aletonu ia i la’ua. O se tasi e na te fofo mea uma i le loto maulalo ma le fa’alogo i e matutua.”

 

E pei o le tala, “fa’ata’ita’i i ai, ma ia mautu le mafutaga mafana ua tu’ua ai nei outou le fanau e lo outou tama, “E leai se mea e sili ona ou fiafia ai, pe a ou fa’alogo o savavali la’u fanau i le amiotonu.” Fale i le fale o Ieova lo outou nofo fa’anoanoa.”