Le pasia e le Senate pili e toe fo'i ai i le malo puleaga o le eletise ma suavai Tuaolo: E sili ai ona taugata le eletise pe a toe tuu mai i le malo tusia: Ausage Fausia E 9 i le 8 le palota na mafai ona maua ina ua faitau faatolu le pili mo se tulafono, e toe faafoi mai ai le puleaina o le eletise ma le suavai mai le ASPA i le malo, i le taeao ananafi, ma ua tulai mai ai le teena o lea tulafono ua le pasia e le maota maualuga. Ao lumanai le tuuina atu o lenei mataupu mo le palota, na tofu avanoa uma sui mai itumalo ta'itasi, mo le faailoaina o latou finagalo e tusa ai o lenei mataupu, sei vagana ai le afioga i le alii Senatoa ia Alo Dr. P. Stevenson, o ia foi lea o le taitaifono o le komiti a le ASPA mo le maota maualuga e lei faaalia sona finagalo, e ui na tuuina atu i ai e le alii Peresetene o le Senate le avanoa. Na vavala mai i saunoaga a taitai o itumalo, o le totonugalemu o finagalo na faaalia, o le faia lea o se mea lelei mo le atunuu, aua o le mafuaaga lea na totofi ai i latou e nofoia nofoa o latou itumalo, ina ia faia se mea lelei mo le atunuu. Na tatala felalolafoaiga i se fesili a le afioga i le alii Senatoa ia Tuaolo M Fruean le maota, pe faamata a toe tuu atu le puleaina o le eletise ma le suavai i le malo, e mafai e le malo ona fai ia lelei, " o la'u tali i ai, e leai," o lana toe tali mai lea. Saunoa Tuaolo, "e faapefea ona fai mai e toe tuu atu i le malo, sa i le malo muamua foi le puleaina o le eletise, e na o le pe, pe, pe, pe, i le olaga atoa le mea sa i ai, ou te manatua lava na aso, e tele atu taimi na pe ai le eletise nai lo taimi e ola mai ai, o le a faapefea la ona fai mai e toe faafoi i le malo?" Na ia ta'ua, e tatau i le maota ona latou talia suiga ua i ai le soifuaga i le taimi nei, e ala i le tautua lea ua tuuina mai e le ASPA, mo le sapalaiina o le atunuu mo le eletise, ma "o tagata o loo pito sili ona faasea i le taugata o le eletise, o tagata totogi maualalo ae o loo faaalu vale a latou tupe e taaalo Bingo ai." Sa ia taua, o loo tulaga lelei le eletise i le taimi nei, ma, e le tatau foi ona avea le i ai o ni itu e le fiafia ai i tagata o loo pulea le ASPA ma itu e faia ai faaiuga faapea, e aunoa ma le iloilo lelei. Sa ia saunoa foi, o le taimi lava na ulufale mai ai lenei tulafono i totonu o le maota, sa ia lagona ai le manatu alofa i le atunuu, ona o le isi foi avega o le a toe faaee atu i ai. Ae i le saunoaga a le afioga Senatoa Tulifua Tini Lam Yuen, na ia taua ai, o le isi faafitauli ua mafua ai ona taugata le eletise, ona o loo i ai isi galuega o loo ave e le ASPA e pei o le suavai lafoa'i ma le suavai taumafa, ae afai e tusa ai ma finagalo o alii Senatoa, pe le mafai ona aveese muamua mai le suavai taumafa mai le ASPA, mulimuli ane aveese mai le suavai lafoa'i, ona taoto ai loa lea na o le eletise i le ASPA latou te galulue ai, ina ia mafai ai ona latou faailoa mai i le atunuu, pe moni la latou mau o le tele o a latou tiute tauave o loo mafua ai le maualuga o le tau o le eletise. Na tulai le afioga i le alii Senatoa ia Salanoa Aumoeualogo, o ia foi lea na faaulufaleina lenei tulafono, ma faamanino i le maota le aano moni na mafua ai ona fau lenei tulafono. Sa ia saunoa, e moni o isi mafuaaga ua ala ai ona taugata le eletise ona o le tulaga taugata o totogi a tagata faigaluega, aemaise ai o isi tautua, peitai o le aano moni o le tulafono, ina ia toe faafoi ese mai le eletise i le malo ona e le o suia lava lona tau. Saunoa Salanoa, talu mai le 3 tausaga talu na o latou ulufale mai ai i le Fono, na folafola ai e le ASPA, o le maualuga o le tau o le suauu o loo mafua ai, "o fea la o i ai ia folafolaga,?" o lana fesili lea i luma o le maota, "o lea lava ua oo i le tausaga lona fa o le tatou nofoaiga, e le o ia i lava se suiga ua faia, ae na o le atili ai ona alu i luga le tau o le eletise, e tiga foi ona pau le tau o le suauu i isi masina, ae tumau pea le taugata o le eletise." I finagalo o isi afioga i alii Senatoa, na o latou lagolagoina ai le taofi, e le na o le tau o le eletise ma le maualuga o le suauu e tatau ona aapa ia i le maota, ae ao foi ona aapa i le tulaga o totogi o tagata faigaluega, lea ua maitauina le maualuluga tele, e pei ona faailoa atu e le afioga i le alii Senatoa ia Tuitele Tony Tuitele i luma o le maota. Sa ia taua foi, e leai se mea o le a tau aumai ai fua le puleaina o le eletise i le malo, aua o loo i ai lava le aia a le malo i le ASPA i le taimi nei, "peitai o le itu e tatau ona tatou aapa atu i ai, o le tulaga i le puleaina ma le faagaioia o tiute a le ASPA, aua o le isi lea auala o loo mafua mai ai le tele o faaletonu." Na fautuaina e le alii Senatoa ia Tago Afeleti ia le faia o se sailiiliga loloto i le mafuaaga tonu o lenei mataupu, aua e i ai lona talitonuga, o le a aafia tagata faigaluega ona o le leaga o i latou o loo puleaina galuega. Sa ia taua foi, o le mea o loo tupu, o le toatele o papalagi o loo galulue i le ASPA e aunoa ma ni galuega o loo latou faia, ae o loo lelei o latou totogi, ae o le mamafa o galuega ma le avega o loo amo e tama fanau a le atunuu, ae faaletonu totogi. I le teena ai e le maota maualuga o lenei tulafono taufaaofi, na fautuaina ai e le alii Peresetene o le Senate, tofa Lolo Moliga le maota ina ia toe sailiili aua le tulaga o le mataupu lenei, ma e mafai foi ona toe fau le tulafono ona toe aumai lea i luma o le maota. Faafesootai le tusitala i le imeli ausage@samoanews.com. © Osini Faleatasi Inc. dba Samoa News reserves all rights.