Tala otooto o Faamasinoga tusia: Ausage Fausia IOE SE ALII FAIAOGA MOLIAGA O LE GAOI O le taeao ananafi na ioeina ai e se alii na faiaoga i le Nu'uuli Polytech le moliaga e tasi o le gaoi, ona o se faalavelave na tulai mai i le masina o Me o le tausaga na tea nei, ina ua ia ave faagaoia se siaki a se isi alii faiaoga. I faamaumauga a le faamasinoga o loo taua ai, le aveina e Don Aga o se siaki e $406.43 a se alii faiaoga sa i luga o le laulau a le tamaitai faitotogi a le aoga, ona e lei aoga le e ana ia le siaki i le aso na maua ai totogi, peitai o le aso na soso'o ai, sa ia alu atu ai e piki mai lana siaki, peitai ua le maua, ae ina ua sailiili lenei mataupu, na iloa ai, o le ua molia na faia lea gaioiga. Ua talia e le Faamasinoga Maualuga le tali ioe a le ua molia, ma ua solofua ai loa ma le isi moliaga mamafa na tuuaia ai o ia e le malo, o lona faia lea o ni faamaumauga sese. O le aso 2 o Me ua faatulaga e fofogaina ai lona faasalaga, ma ua poloaina foi o ia e le faamasino sili ina ia saini i aso Gafua uma i le ofisa o lana loia fautua, seia oo lava i le aso e fofogaina ai lona faasalaga. FALEPUIPUI MO LE 15 ASO INA UA IA FAAFEFEINA LONA TOALUA O se alii na taofia i le toese i Tafuna talu mai le vaiaso i ona tua atu ina ua tuuaia i lona faafefeina o lona toalua i se naifi, na faasalaina e le Faamasinoga Faaitumalo i le vaiaso na tea nei, e nofosala i le toese mo le umi e 15 aso, ina ua ia ioeina le moliaga o le faaoolima i le tulaga tolu. E tusa ai ma faamaumauga a le faamasinoga, na mafua lenei faalavelave i le va o le ua falepuipui ma lona toalua, ina ua manava atu lona toalua, ae fesiligia e le ua molia poo fea sa i ai. Na taua le uu mai e le ua molia o se naifi fai meaai ma faafefe ai lona toalua. Na faatoese ma loimata le ua molia i lona toalua e tusa ai o se gaioiga sa ia faia. Sa ia talosaga ia te ia ina ia faamagalo o ia, ae na te manaomia le toe sosoo o le la aiga ma toe fuata'i se isi amataga fou, e le gata foi i lea, sa ia faatoese foi i le malo faapea ai lona aiga. Peitai na faailoa e le loia a le malo i le faamasinoga, o loo tumau pea le talosaga a le toalua o le ua molia, ina ia faaauau pea le nofo ese o le ua molia mai ia te ia. E 2 tausaga lea ua faanofo vaavaaia ai e le alii faamasino ia Elvis Patea le ua molia, ma talu ona taofia o ia i lenei faalavelave, ua 13 aso ua taofia ai o ia i le toese, ma o le a avea ia aso ua maea ona tuli e tau i lona faasalaga e 15 aso, peitai, o le a faamalumalu aso e 2 o loo totoe ai, faavae lea i luga o lona usitai o tuutuuga ma poloaiga mai le faamasinoga. E $100 le sala tupe ua poloaina o ia e le faamasinoga na te totogiina i totonu o le 30 aso, ma ia auai ini aoaoga e faatonutonu ai le tulaga o le ita vave ia te ia. LENNON SAGAPOLUTELE O le Aso Faraile na tea nei na taliaina ai e le Faamasinoga Maualuga le talosaga na tuuina atu e le alii loia ia Asaua Fuimaono, mo se poloaiga mai le faamasinoga e le toe avea ai o ia ma loia mo Lennon Sagapolutele. O Fuimaono na tofia e le afioga i le alii faamasino ia John Ward II na te tauaveina le mataupu faasaga ia Sagapolutele, ina ua tuuaia o ia i le faalavelave lea na maliu ai le alii o Nicholas Afa i le masina o Me o le tausaga nei, peitai o le taimi nei, ua galue nei Fuimaono o se tasi o loia mo le ofisa o le loia sili, poo le itu a le malo. Ua poloaina e le faamasinoga le ofisa o le loia fautua mo tagata lautele, ina ia latou tauaveina le mataupu a Sagapolutele i le taimi nei, ao tuliina ai lona faasalaga i le falepuipui. JANE SOLIAI O le aso Faraile o le vaiaso na tea nei na faila ai e le malo le moliaga faaopoopo faasaga i le tamaitai o Jane Soliai, o le faaoolima lea i le tulaga tolu, suia mai ai i le faatupu vevesi i nofoaga faitele, e pei ona tuuaia ai o ia ona o se faalavelave na tulai mai i le aso 2 o Mati i Tafuna. O loo tumau pea tuutuuga e pei ona tatalaina ai o ia i tua mai le toese, ma ua faamoemoe o le taeao o le aso Tofi o le vaiaso nei i le itula e 8:30 o le a toe fofogaina ai lona faamasinoga. O Soliai, na taofia e leoleo ona o se faalavelave na tulai mai i Tafuna i le aso 2 o Mati, ma auina atu ai i le toese i Tafuna, peitai na toe tatalaina i tua ina ua talosaga ona matua i le susuga i le taitai leoleo, Leseiau Laumoli i le le talafeagai ona taofia o ia i le toese. I lea gaioiga, na fesiligia ai e le alii faamasino fesoasoani, susuga Roy Hall Jr le itu a le malo, pe o se faatonuga a ai na mafua ai ona tatala o ia i tua e ese mai i le pule tutasi a le faamasinoga. Na ioeina e le susuga Laumoli, i le tulafono o loo i ai, e le mafai e soo se tasi ona tatala i tua se isi ua taofia i le toese sei vagana o se poloaiga mai le faamasinoga. Faafesootai le tusitala i le imeli ausage@samoanews.com. © Osini Faleatasi Inc. dba Samoa News reserves all rights.