Sauni atu
le Asosi Fusu a le teritori mo sailiga o au fusu mo le Olimipeka
tusia: Leua
Aiono Frost
E fitu paga fa'apitoa
i le paga a tamaitai na faipele i le ta'amilosaga o fusuaga e
tapena ai se aufusu mo le Ta'amilosaga a le Olympic Qualifying
Tournament lea ua fuafua e faia ia Aperila 21-23, i Apia.
"O se mea
fou lea i le soifuaga o tamaitai Samoa pe afai ae avea i latou
ma sui e suia Amerika Samoa i faipelega fa'avaomalo. I le taimi
nei ua atoa le lima tausaga talu mai ona amata fusu tamaitai
Samoa i faipelega fa'avaomalo ma e tele lava ina maua e i latou
pine." O se tala mai lea a le susuga le Failautusi, Tau
Tanuvasa o le Asosi Fusu a Amerika Samoa.
O le aufusu ua
faamoemoe le Asosi Fusu e auina atu, o le a taumafai ai e atoa
uma paga e 11 mo ali'i ma le lima mo tamaitai.
Ona o lea e latalata
mai ia i tatou le nofoaga e fa'atautaia ai fusuaga fa'avaomalo
ale Oceania lea ua suia nei lona fa'aigoaina o le Olympic Qualifying
Tournament, ua ao ai ina fa'ao'o uma le fanau faipele i fetauiga
fa'avaomalo, e vave ai ona atia'e lo latou tomai fa'afaipele.
Mai le fitu o
paga sa faipele fa'apitoa i le afiafi o le Aso To'ona'i na te'a
nei, sa iloga ona si'itia le tomai o alo o lo'o tauva i lea fa'agatama,
ma o le a saunia lelei i latou mo fetauiga fa'avaomalo i le taimi
o le a tauva ai i Samoa ia Aperila.
I le vasega o
tamaitai, e na'o le tasi le paga sa fusu faapitoa i lea afiafi,
e ui ina valavala pauna o nei tamaitai, ae na manumalo le tamatai
mama ona pauna ona e lelei fo'i ona lima i le fusu.
O le paga na
amata ai le ta'amilosaga fusu o le fusuaga lea i le va o Vai
Faleliu e 146 pauna le mamafa mai le Kalapu Fusu a le Star Kist
Samoa, ma le ali'i o Talatia Tuitama e 150 pauna le mamafa mai
le Kalapu a le Coconut Point Boxing Club. E le'i uma ta'amilosaga
e fa o lea fusuaga, ae taofia ona ua sela tele le ali'i o Vai,
ua le mafai ona toe fa'aauau, ma na lafo le manumalo ia Talatia
Tuitama.
O le paga lona
lua i le va o Tino Tuisa e 192 pauna le mamafa mai le Kalapu
a le Pe'ape'a ma Pene Paua'a 176 pauna le mamafa mai le kalapu
a Nuuuli Central.
Na taofia fo'i
lea fusuaga ona ua matua iloga mai le sela tele Tino ma ua le
mafai ai ona fa'aauau ma lafo ai le manumalo ia Pene Paua'a.
O le paga lona
tolu, na fetaui ai Imo Aieti (151 pauna) mai le kalapu fusu a
Maliu Mai ma le ali'i o Sio Feterika e (154 pauna) mai le kalapu
a Nuuuli Central.
O le fa'ato'a
manumalo ai lea o se tasi mai le tulimanu lanu mumu i lea lava
po, peita'i, o le susuga lea ia Imo Aieti. Na uma lelei lava
ta'amilosaga o lea fusuaga e ta'i 2 minute.
O le paga lona
fa sa fetaui ai Togafau Aieti mai le Maliu Mai (147 pauna) ma
le ali'i o Henry Fola e (163 pauna) mai le Kalapu Fusu a le Coconut
Point, o lea fusuaga sa fe'eseesea'i fa'aiuga a ali'i fa'amasino
ma tu'uina atu le manumalo ia Henry Fola.
Na manumalo fua
Malologa Masau mai i le Nu'uuli Central, ina ua le auai atu le
alii o Aaron Aleaga o le kalapu a le Air Base, mo le la fetauiga
i lea afiafi.
O le paga sa
fa'afiafia ai le mamalu na auai i lea lava ta'amilosaga o le
paga lea i le va o le tamaitai o Olomanu Matau (147 pauna) mai
le kalapu Fusu a Okesene ma le tamaitai o Sugalu Lino (180 pauna)
mai le Kalapu fusu a le Star kist. E ui lava ina sesela tele
ma sauea le fetogiga o tu'i, ae mau lava tu'i 'aiga lelei, mau
isi tu'i e le taitai ona au.
O le toe paga
na fetaui ai Robert Fanolua ma le ali'i o Alema Vaele ma sa eseese
fa'aiuga a fa'amasino ma avatu ai le manumalo ia Alema Vaele.
Faafesootai
le tusitala i le imeli leua@samoanews.com.
© Osini Faleatasi Inc. dba
Samoa News reserves all rights.
|