Tumau pea le leai o se faiaina a Teina o le Pisisami Tusia e THA Na fa'atumulia le malae i Faga'alu i le afiafi o le Aso Faraile i le vaiaso ua te'a atu nei i le maimoaina o le ta'aloga a teine o le 'Pisisami' mai Vaitogi, ma teine o le 'Pago Girls' mai Pago Pago. Na i ai mafaufauga a nisi o tagata e le umi se taimi e tago ai ia teineiti o le taulaga i teineiti 'o le malie ma le laumei' ae pei o le o a le laumei ua leai sa'ana pa'aga o le malie. Ae fai mai isi, 'ia o le mea lena fa'ato'a iloa lava i le malae kirikiti po'o ai o le a fai lana pa'aga'. Aso Faraile - MATI 14, 2008 Na vili le seleni ma maua ai o le a tata muamua teineiti mai le itu i Sisifo, ae talitua'a teine o le taulaga, ma amata loa i se tataaga pei lava na'o aoga ia na faia i le latou malae i le afiafi. Fa'ato'a maua ane le ulua'i pe ae ua maua lelei fo'i 'ai e tolusefulu iva (39), ma fa'aauau ai lava seia o'o ina atoa lelei 'ai e selau (100) ae fa'ato'a atoa pe e sefulu fa (14). Na tonu loa lea i le laulau o le Komiti Kirikiti o le Fu'a 2008, o le 'a tuli 'ai, leaga ua alofa fo'i le Komiti i le leva ona fa'atauga nai teine o le Pago Girls i le la. E le'i tu'umamaina fo'i e Pago Girls ia nei 'ai e tele, ona pau lava le mea leaga o le to'atele o pe ia na totoe. Na tata le 'au a le Pago Girls ma na ova fo'i i le selau 'ai, e tusa e selau ma le iva (109) ae ua uma lelei le latou 'au ona tata. Na toe tata lea o teine o le Pisisami e saili ai 'ai e iva, ma manumalo ai loa teine o le Pisisami i teine o le Pago Girls. Ua iai se talitonuga, o 'au ia o le a su'e fusi, po o le to'afa lea o le a saili ai le siamupini i taaloga ua fuafua mo le malae a le malo i Iliili (Veteran Stadium). Ae o le a saili mai nisi 'au se lua, e atoa le fa lea ua i ai Pisisami ma Pago Girls lea ua mautinoa avanoa I le sailiga fusi. Aso To'Ona'I - MATI 15, 2008 Na toe fetaui ai fo'i teine o le Pisisami ma le 'au A Leone o le Moso'ipala, leaga sa tutusa le la'ua ta'aloga lea na fai muamua. Lea la na toe ta'aalo ai fo'i i le Aso To'onai i le ulua'i ta'aloga, ma sa tu'u loa la e fa'apea e ta'i-tolu teine e mafai ona tata i le 'au tasi. Sa muamua ona tata teine o le Pisisami, ma tulai mai ai 'ai e sefulu ono (16), ona tuli lea e teine o le Mosoo'ipala, ma o i'ina sa toe fa'aali ai le talituaa a teine o le 'Pisisami' aua na o le fitu (7) 'ai na maua e teine o le Mosoi'pala. Ma na manumalo ai teine fo'i i lena aso ia teine o le Pisisami. TAMA O LE MUA'AU MA LE MANU'ULA O se ta'aloga na toetoe lava a leai se tasi o Vatia ma Faleniu na toe nonofo i fale, ua o mai uma afioaga nei e tapua'i i tama fanau aua le alo faiva atu i le fetauiga. O le taimi tonu lava nei o le 'au talepe-fale i aiga ia na o'o uma atu I le malae i Fagaalu. Na malo le 'au a Tama o le Mua'au i le viliina o le seleni, ona filifili lea i le pate po'o le muamua fo'v tata. Ma o se tataaga na tula'i mai le lelei tele ona sa latou mauaina ni 'ai e selau ma le lua (102). Ma i le 'au o le Manu'ula na toe vaaia fo'i ua amata te'a mai i le amataga le pea lua o Su'emalo ma Enesi, ae o sui-te'a Isaako, Pili ma To'i. O le ta'aloga na vaa'ia ai le tula'i mai o tama tuai i le faiga o le ta'aloga, e fai o Tama o le Mua'au ae fa'apena fo'i le 'au a le Manu'ula. E sa'o le tala a le le isi toeaina, 'E pisi lava tamaiti ae 'emo a'e o se saka ulu toe moto. Ae o tama matutua, e faifai lemu lava 'ae 'emo a'e o umu kalo, ma ni palusami ia ma se size two, ae leiloa po'o fea na aumai ai.' Ona tuli lea e le Manu'ula, sa feololo lava i le taimi lena e ta'i-lima ai a le tagata pe fua i ai. A'o le taimi na tula'i mai ai ia Akeli, o le taimi loa lena na toe sui ai loa 'ai. E maua ane 'ai e selau ma le lua (102) ae toe to'a lua pe na totoe i lalo. Akeli (17), To'I (16), Fareni (15), Mauga (12) ma si tamaititi o Manufili (10). Lea ua foliga mai o le taimi lenei e su'e fo'i i le maso po'o ai o le a le nofo i 'au e fa lea o le su'e ai le siamupini. Ia ae leiloa pe te'i ua o'o taeao ua malosi fo'i le 'au lea na palaai mai i le aso ananafi. MEA'ESE MA ALII O LE SINAPATI Toe lava o Sale, Vala ma le fa'ate'a tuai a Sinapati o Seilala mai le latou 'au lea na valu tausaga o siamupini. O le taimi nei ua tele ina o i fafo tama tuai, ma le to'alua lea e ta'alo mai nei i le Manu'ula (ua mau paolo nei i Vatia) Peti ma Akeli. Ia o aso o le latou malosi, a'o taimi nei ua toe va'aia fo'i le amata ona lelei fo'i Sinapati. Na tata muamua le 'au a Sinapati ma o le mea na o'o i ai, e lua sefulu fa (24) 'ai ae ua fitu pe. Se pei lava o se vavega le mea o'o ai i lena aso. Na tutu atu loa Ionatana ma Malo Fosi ia na tutusa a ia 'ai e ta'i lua sefulu tolu (23) ma le tama o Sale Sua, o le vaega tonu lena na tulei I luga 'ai, lea na o'o ai I le selau sefulu ma le tasi (111) ae fa'ato'a sefulu fa (14) ia pe. Na tuli e tama o le Mea'ese, ma na o le valu selufu ma le iva (89) 'ai, ae uma le 'au. Na leiloa le mea lea na tupu i le 'au a le Mea'ese, fai o le te'i lava ua poloka pe ae ua pa'u leaga fo'i te'a. Na o le pau le mea o le tilotilo atu a le o le sami, ia o fale lea na tutu mai uta i leisi itu ala. E le iloa pe o atu loa i Alofau fai loa ma le vili, po'o le a le mafuaaga ma fa'apea ai le latou 'au. TAMAITI O LE PISISAMI MA PETESA Se ua o'o mai i le taimi lenei ua matua fiu le Komiti Kirikiti o le Fu'a 2008, e tau fuafua le mea moni e i ai le 'au lea a le Pisisami. O le aso ua lelei, o le aso ua feololo, ma o se aso e tula'i mai o le Siamupini i se latou ta'aloga. Ia e pule lava Vaitogi ia i le latou 'au. Na tata muamua Petesa-tai ma na uma ifo pe ua maua 'ai e fitu selufu ma le lima (75). Ia ua taunu'u ai la le tala, ua foliga mai o se 'au siamupini i le latou ta'aloga lea, e sefulu tolu (13) pe ae maua ia 'ai, a (Fala) Wesley (21), Jr Sitau (13), Logovae ma Marcus (9) ma le tama o Setoa (7). ***** Aua ne'i galo ia oe, se fagu Vailima pe a maea ta'aloga ae aua nei inuina i malae o ta'aloga. Aua e lei iloa pe te'i ua e totama'i ia ona loka fo'i lea o oe e Leoleo. Ae manaia lou tala'aao i le tou fale e taumafa ai lou fagu na fa'atau mai ia GHC Reid Oloa o Leala. © Osini Faleatasi Inc. dba Samoa News reserves all rights.