Tala o le Vaifanua SN/Le Lali ASO FAA SAMOA A FANAU AOGA O AOGA TULAGA MUAMUA Sa faatumulia nisi o aoga tulaga muamua a le teritori, i matua, o aiga, uo, taitai o aoga faapea faiaoga, aua le molimauina o taunuuga o tapenapenaga a alo ma fanau i masina ma vaiaso ua tuana'i atu, mo a latou aso faa Samoa. I le aoga tulaga muamua a Siliaga i Aoloau sa faapea ona vaevaeina ai le aoga atoa i ni vaega e fa aua a latou faafiafiaga faa Samoa, na aofia ai mauluulu faapea ma sasa. Sa faapea foi ona faia ai ni fa'aaliga o taumafa Samoa sa tolaulauina mai e fanau ma e pei ona masani ai tu ma aganuu Samoa, sa amataina le taeao i le ava o feiloaiga, e pei ona alo atu iai fanau aoga. I le aoga tulaga muamua a Alofau sa faapea ona faataunuu ai ni tauavga tulatoga, folafola sua o toana'i, faapea ni ta'aloga faa Samoa na afia ai 'aiga popo, lalagaina o ma'ilo faapea 'ato fu'e umu. I le vaevaeina o lenei aoga, i ona vaega faafiafia sa faapea ona faaigoa ai vaega eseese ia Manu'a, o Upolu, Savaii ma Tutuila. O le aoga a Tafuna muamua sa faapea ona fa'aautuina le latou polokalama o le Aso o le Pasefika 2008 ma na vaevaeina vasega ta'itasi i motu eseese o le Pasefika, na aofia ai Guam, Niu Kaletonia, Papua Niu Kini, Fiti, le atu Kiribati, o Toga faapea Tahiti. Ae o le vasega 8 na tu'uina iai le atunuu o Samoa ma o i latou ia na talimalo i lea aso. E pei ona molimauina e le toatele na mafai ona auai i nei polokalama eseese, le matagofie o sauniuniga a alo ma fanau ma sa vaaia le mitamita o matua i a latou faafiafiaga na faataunuuina. Ae le gata i lea, o le tele o tu ma aganuu Samoa na mafai ona aoaoina e alo ma fanau. 66 sui fou o le nhs a le aoga maualuga a tafuna O le afiafi o le Aso Tofi o le vaiaso ua mavae, na faatautoina ai ni alii ma tamaitai aoga e to'a 66 a le aoga maualuga a Tafuna, i totonu o le 'National Honor Society', i se polokalama polokalama na faataunuuina i le fale ta'alo a le aoga. O lenei polokalama sa fa'aautuina e faapea, "O le amataga fou" ma sa fautuaina nei alo ma fanau ae e le'i fa'atautoina i latou, ina ia avea lea lava afiafi ma amataga fou mo i latou, e atina'e ai ni amioga sili atu ona lelei. FOA'I E LE 'SCIENTOLOGY' TUSI MO LE FALETUSI A LE MALO Ua iai nei i totonu o le faletusi a le malo i Utulei (Feleti Barstow Library) ia ni tusi e faatatau i le tapuaiga fou lea ua taunuu mai i fanua o Amerika Samoa, lea e ta'ua o le "Scientology". E pei ona fa'ailoa mai e le taitai o lenei faigamalaga i le Samoa News, o Matthew Andrews, e pe a ma le 18 ni tusi e faamalamalama ai le latou faalapotopotoga, ua maea ona tu'uina atu i a'ao o le pule o le faletusi i ni nai vaiaso ua mavae, o Cheryl Morales-Polataivao. Na saunoa Andrews, o le a mafai ona maua e tagata o Amerika Samoa ia le avanoa e latou te suesue ma malamalama ai i ni auala e mafai ona fofoina ai ni faafitauli o feagai ma i latou. MOLIA SE ALII SAMOA I KALEFONIA ONA O FUALAAU FAASAINA O le Aso Tofi na faapea ona molia ai se alii Samoa i faamasinoga i Honolulu, i lona umia o se aupega malosi ma pulufana, faapea ma lona umia ma se faamoemoe e faatauina atu, o ni fualaau faasaina. O le Aso Tofi na tula'i ai i luma o le alii faamasino o Kevin S.C. Chang ia Mario Tuua, po o Sia Unutoa po o Tala Pasena e tali i ona moliaga, ma ua ia te'ena tulaga uma e pei ona tu'uaia ai o ia. O lo'o taofia nei o ia i le falepuipui e faatali ai sona iloiloga i le vaiaso nei. O lenei alii sa ave faapagotaina e leoleo i le afiafi o le aso 7 o Mati i le taulaga i Honolulu, ina ua molimauina lona faatauina atu o ni fualaau faasaina. O lo'o masalomia le togiina e Tuua o se taga i totonu o se vaitafe, ina ua agai atu iai se leoleo. Ma i totonu o lenei taga na maua ai ni fualaau faasaina, o se aupega ma pulufana faapea se tinoitupe e $13,000. O Tuua sa faapea foi ona lokaina i Kalefonia ina ua ta'usalaina i nisi solitulafono. Faafesootai le tusitala i le imeli evaga@samoanews.com. © Osini Faleatasi Inc. dba Samoa News reserves all rights.