Talosaga le Fono i faipule o le Konekeresi e taofi le toe si'i o totogi maualalo tusia: Ausage Fausia O le taeao ananafi na faaulufale ai i luma o le Fono Faitulafono se iugafono malilie faatasi, e talosagaina ai ma le faaaloalo ni faipule se toalua o le konekeresi a le malo tele, o i laua ia o loo faauluulu i ai komiti o loo iloilo le tulaga o siitaga mo totogi maualalo, ina ia taofia le toe aofia ai o Amerika Samoa i le isi siitaga e 50¢ lea o loo faamoemoe e amata faamamalu i le aso 25 o Me o le tausaga nei. O le iugafono a le maota o sui e tutusa lelei ma le iugafono a le maota maualuga 30-22, ma o le taeao ananafi na pasia ai e le maota maualuga la latou iugafono. I le tino o lenei iugafono o loo taua ai, e ui e lei vaaia se aafiaga tele i le tamaoaiga o Amerika Samoa, ina ua faamamalu le siitaga muamua e 50¢ i le masina o Iulai, 2007, peitai ua folafola e kamupani i'a o loo galulue i le atunuu, lo latou tula'i ese ma le atunuu pe afai ae toe faamamalu le isi siitaga e 50¢ lea o loo fuafua e faia i le masina o Me lea o loo lumanai nei. O loo taua foi i le iugafono lea ua faamoemoe e tuuina atu i faipule o le konekeresi, o kamupani i'a o loo galulue i le teritori i le taimi nei, o loo galulue ai le 1/3 o tagata faigaluega uma lava i totonu o Amerika Samoa, ma, o le tulai mai o ni faafitauli o totonu o kamupani i le o ese, pe faaitiitia foi tagata faigaluega, o le a feagai ai Amerika Samoa ma se faafitauli i le tulaga o lona tamaoaiga. Afai foi o le a tula'i mai lenei faafitauli na feagai loa ma Amerika Samoa i se taimi e le o toe mamao, o le a aafia ai ma kamupani eseese o loo faalagolago lo latou tamaoaiga i kamupani i'a nei, aua o loo toatele tagata faigaluega a le atunuu o loo galulue ai, ma o le a le toe mafai ai e faleoloa ma pisinisi ona latou toe maua mai le toatele o a latou tagata faatau sa i ai. Ae mo le malo, o le a feagai ai le malo ma se tulaga faigata i le itu tau tupe, aua o le taimi nei, o loo tau faasoasoa le tulaga o ana tupe faaalu aua totogi o tagata faigaluega, peitai, o le tula'i mai o lenei faafitauli, o se itu faigata lea i le malo ma ona taitai, aua o le a faitau miliona se vaega tupe e manaomia e faafetaui ai totogi mo ana tagata faigaluega. Ma, afai ae tapunia kamupani i'a, o le a vaea tagata faigaluega, o le a tapunia foi nisi o pisinisi, o le a le toe maua foi e le malo tulaga o lafoga maua lea e masani ona maua mai i le atunuu i tausaga ta'itasi, ma ua aga'i atu ai loa le malo i se tulaga faigata, i le tulaga o ana tupe maua, ma o le a maitauina ai loa le toatele o tagatanuu o Amerika Samoa, o le a latou tuua le teritori ae malaga atu i Hawaii ma Kalefonia, e saili galuega ai mo manuia o latou aiga. O loo taua foi i totonu o le tino o lenei tulafono, o le aofia ai o Amerika Samoa i totonu o le tulafono lea na pasia e le konekeresi, ina ia siitia ai tulaga o totogi maualalo i totonu o teritori ma setete o le malo tele, sa faavae lea i luga o le le lava o ni faamaumauga na sailia mai, ina ia iloilo ai le tulaga o le aafia o le atunuu i nei faiga, ma o se tulaga sa faia i luga o le talitonuga, e lei manatu mamafa i aafiaga o le a feagai ma Amerika Samoa. O susuga i alii faipule o loo agai i ai lenei iugafono, o le susuga ia Edward M Kenndy ma le susuga ia George Miller. O le iugafono a le maota o sui na faaulufaleina lea e le afioga i le Fofoga Fetalai, Savali Talavou Ale, ma afioga i alii faipule o Agaoleatu Charlie Tautolo, ma Laolagi Fonoti Savali Vaeao. Faafesootai le tusitala i le imeli ausage@samoanews.com. © Osini Faleatasi Inc. dba Samoa News reserves all rights.