Faamaonia
i suesuega le a'afia o fanau i mafatiaga o le sauaina i totonu
o aiga ma nuu
tusia; A.
Tuna
I le to'a 125
o ni tagata sa fesiligia i se suesuega na faia i le tausaga e
2006 e uiga i lenei mataupu o sauaga i totonu o aiga ma nu'u,
e lata i le to'a 100 na ioe o lo'o a'afia po o iloa foi nisi
fanau, o a'afia i mafatiaga o sauaga. Ae peitai, e lata i le
to'a 20 na ta'ua i lea lava suesuega e tasi, e le tele se sauaga
o aafia ai nei fanau.
O lenei suesuega
na faataunuuina i le masina o Aperila i le tausaga e 2006, e
auiliili ai lenei faafitauli o lo'o tula'i mai i totonu o le
teritori, e pei ona sa faamanino mai e le faletua ia Fa'aalu
Faletoese Iuli, o le failautusi o le faalapotopotoga e faasagatau
i sauaga i totonu o aiga (ASCASDV).
O i latou ia
na galulue faatasi ma matagaluega o le DHSS faapea nisi vaega
mo le tautuaina o le mamalu lautele (Social Services Division-SSD),
i le faataunuuina o lenei suesuega. Ma e to'a 125 nisi na mafai
ona auai i lenei suesuega, na aofia ai ni tamaitai/tina e to'a
79, o ni alii se to'a 39 ma leisi vaega (others) e to'a 7.
Ae na faato'a
mafai ona tu'ufaatasia ma faavasegaina lenei suesuega, e le tamaitai
o Sara Krosch lea o lo'o galue nei i le vaega o le Kanesa (ASCCN).
Ma ua galulue faatasi foi Krosch ma Iuli i le toe faatula'ia
o se faalapotopotoga na faavaeina e Iuli ma nai faletua o Diana
Ameperosa ma Flo Ainuu, sa faaigoaina o le ICAN, po o le OU TE
MAFAIA.
O le autu po
o le misiona o lenei suesuega, ina ia mafai ona nofo malamalama
e tusa ai ma lenei faafitauli, o a uiga o tagata o lo'o fa'aalia,
po o tupu so'o lenei faafitauli ma po o faapefea ona fofoina
e tagata nei faafitauli.
Mai i le to'a
125 na fesiligia i lenei suesuega, e pe a ma le to'a 100 na ioe,
e latou te malamalama i le uiga o le faia o amioga mataga i isi
tagata po o fanau, ae e le atoa se to'a 100 o i latou, o lo'o
malamalama i le uiga o lenei faamatalaga "sauaga i totonu
o aiga". Ae lata i le to'a 20 i latou e le malamalama i
lea lava faafitauli o 'sauaga i totonu o aiga'.
E silia laititi
ma le to'a 80 i latou na ioe, o lo'o iai sauaga i totonu o nu'u
ma afioaga, ae peitai, ua o latou talitonu, e le o se faafitauli
tele lea tulaga. E to'a 20 ua talitonu, e le o iai ni sauaga
i totonu o nu'u ma afioaga, ae e lata i le to'a 10 e le iloa
se tulaga e tasi.
Na fesiligia
foi lenei to'a 125 pe o a'afia fanau i lenei faafitauli, e lata
i le to'a 100 na tali mai i le ioe, ae pe a ma le to'a 20 na
tali i le leai. I le vaega na tali i le ioe, o le toatele lava
o i latou, o tina po o tamaitai. Na toe fesiligia i latou nei,
pe o se faafitauli tele lenei faafitauli, e lata i le to'a 20
ni tina/tamaitai na tali e le se faafitauli tele, ae lata i le
to'a 15 ni tama/alii, ua talitonu, e le o se faafitauli tele.
E lata i le to'a
80 i latou na mafai ona fa'ailoa mai lo latou molimauina pe na
va'ai tino o tutupu nei faafitauli, i tulaga o sauaga, i totonu
o aiga. Ma e silia ma le to'a 100 na tali ioe, ina ua fesiligia
po o latou sailia ni vaifofo pe a tula'i mai nei ituaiga faafitauli.
Na suesueina
foi i latou nei, i ituaiga fesoasoani o le a o latou sailia pe
afai ae tula'i mai se faafitauil. E lata i le to'a 35 i latou
na tali mai, o le a sulufa'i i le ofisa a leoleo, ona soso'o
mai ai lea ma le toatele e sulufa'i i ofisa a le malo (DHSS)
ae tali tutusa le aofa'i o i latou o le a sulufa'i i se uo po
o le maota o le faafeagaiga, ma o le toatele foi o nisi, e sulufa'i
i aiga.
Sa fa'ailoa mai
foi e nisi le mana'omia o nisi tautua faale malo po o faalapotopotoga,
e mafai ona sulufa'i iai tagata i taimi o mafatiaga. E toatele
i latou, e le o malamalama lelei i tautua o iai nei, e mafai
ona sulufa'i iai mo se fesoasoani. Ma e pei ona sa talatalanoa
mai o Krosch ma Iuli, atonu o se tasi nei o mafuaaga, o lo'o
tupu mai ai pea lenei faafitauli, ona o le le nofo malamalama
o tagata po o le le fia o'o atu o tagata i ofisa ua maea ona
faatuina, e fesoasoani i ituaiga faafitauli faapenei.
Ua tu'uina atu
nei ia faaiuga o nei suesuega i aao o le pulega ma le aufaigaluega
a le DHSS ina ia mafai ona auiliili atili ni auala e mafai ai
ona u'unaia le mamalu lautele ina ia fa'aaogaina tautua ua faatuina,
aua se fesoasoani po o se vaifofo i nei faafitauli.
Faafesootai
le tusitala i le imeli evaga@samoanews.com
© Osini Faleatasi Inc. dba
Samoa News reserves all rights.
|