Tatala aloaia tautua fou a le faletupe ANZ mo teugatupe a le atunuu tusia: Ausage Fausia Na faatumulia le nofoaga autu o le faletupe a le ANZ i Fagatogo i le mamalu o le atunuu, na lolofi atu mo le fia molimauina o le tatala aloaiaina o le amataina o se tasi o tautua fou a le faletupe o le atunuu, aua lava le faafaigofieina o teugatupe mo le atunuu lautele. O lenei tautua fou, e le gata o le a mafai ai ona pue ina lou ata ma tuu i totonu o faamaumauga mo lau teugatupe, ae o le a faafaigofie ai foi ona faia isi faamaumauga mo le tulaga o teugatupe. I se feiloaiga a le vaega o tusitala ma le pulega a le ANZ, na faamanino ai e le alii pule o le faletupe, susuga Gary Ayre, o le tautua lenei, ua faia mo le faamoemoe ia faa faigofie ai le tautua e le faletupe mo le mamalu o le atunuu. Saunoa Ayre, o le tautua lenei, ua suia ai le tuatua tuai a le faletupe, lea ua silia ma le 20 tausaga o i ai, ma o se tautua ua mautinoa o le a fiafia i ai le toatele o le atunuu. "Aua e le gata o le a pueina lou ata, ae o le a mafai ai foi ona maua uma faamaumauga e uiga ia te oe ma lau teugatupe," o le saunoaga lea a le susuga Ayre. Na taua foi e le susuga Ayre, e silia i le $5miliona le vaega tupe na faatupeina ai lenei suiga, ona o le naunau lava ia mafai e le faletupe ona tautua le atunuu, tusa lava poo ai faafitauli e tulai mai i le auaunaga, ae o le mea sili, ia mafai ona tautuaina le mamalu atoa o le atunuu. E toatele le mamalu o le atunuu na mafai ona pueina a latou ata ma tuu i totonu o latou teugatupe, ma, soo se taimi lava e te agai atu ai mo le talaina pe o le teuina o sau teugatupe, o le a otomeki lava ona faaali mai lou ata i luma o le masini komipiuta. E le gata foi i lea, o le a sui foi tulaga o pepa faatumu mo le talaina o lau tupe, aemaise ai o le pepa faatumu i le teuina o tupe i totonu o teugatupe. Na faalauiloa foi e le susuga Ayre le toatele o le mamalu o le atunuu ua faaalia lo latou lagolagoina o lenei tautua, ua faa faigofie ai le tulaga o le talaina ma le teuina o tupe. Faafesootai le tusitala i le imeli ausage@samoanews.com. © Osini Faleatasi Inc. dba Samoa News reserves all rights.