Lagomau tamaloa
Kolea i fanua aiga sa Satele
Atoa tausaga o taoto i le fale maliu a le LBJ
tusia: Ausage
Fausia
Na avea le feiloaiga
a le Senate ma le Loia Sili a le malo, afioga Fepulea'i Afa Ripley
i le taeao ananafi, e tusa ai o le tulafono mo le tuuina atu
o tagi o loo faia faasaga i le falemai e totogi lava e le falemai,
ma avanoa na auala atu ai se fesili mai le alii Peresetene o
le Senate, ona o se tamaloa Kolea o loo taoto pea i le taimi
nei lona tino maliu i le fale maliu a le falemai i Fagaalu, e
aunoa ma se fuafuaga ua faia i ai.
O lea tamaloa
e tusa ai o se faamatalaga mai le falemai, na taofia i le falemai
a le LBJ ina ua gasegase, ma i'u ina maliu ai i le masina o Me
o le tausaga na tea nei, peitai, e leai ma se isi o lona aiga
na aga'i atu mo le faia o ni feutanaiga mo lona tino maliu.
Na saunoa le
tofa Lolo Moliga, o se mataupu ogaoga tele lenei mataupu, aemaise
lava o lea ua lata i le tausaga talu ona maliu lenei tamaloa,
ae lei faia iai e le malo ma le falemai se gaioiga.
"Aua tatou
te manatu e le o se Samoa, ae tatau ona tatou manatu, o ia foi
o le tagata ola e pei o tatou, sa i ai le ola a le Alii,"
o se saunoaga lea mai le tofa Lolo. Sa ia saunoa foi, e ao i
le malo ona faaeteete mai le soona faia o ni uiga faapea i ituaiga
tagata nei, aua e le iloa pe sa i ai se sao a lenei tamaloa sa
faia mo le malo ao lei maliu o ia.
Saunoa Lolo,
"Ave lelei o ia e fai se lotu ma saili ane se fanua a le
malo e teu ai lona tino, ina ia faailoa atu i ai le aganuu a
Samoa, e iloa faaaloalo ma iloa alofa i soo se tagata, aua o
le mea moni, a taoto ai lava faapea lenei tamaloa, e oo atu lava
i le 10 tausaga e lei faia lava i ai se fuafuaga."
Na ta'ua e Fepulea'i,
o le mataupu e uiga i le tamaloa Kolea lea, ua maea ona fai i
ai feutanaiga a le falemai ma lana sponsor, ma o loo faia pea
ia tulaga ina ia tusa ai ma ala o le tulafono.
Peitai na toe
saunoa Lolo, e sili ona taoto tulaga ia o feutanaiga ma le sponsor
e fai mulimuli, ae fai muamua se fuafuaga vave i le tino maliu
o le tamaloa ua loa aso ma masina o taoto i le falemai, aua o
le tali lava foi lea a le falemai na tuuina mai i le Fono i le
tausaga na tea nei ina ua fesiligia, ae fai mai o loo faia feutanaiga
ma le sponsor.
Na fesiligia
le tofa ia Muavaefaatasi Ae Ae Jr i le aso ananafi, ona o loo
i ai se faamatalaga o ia le isi o loo fesoasoani malosi i le
unaia o lenei mataupu, aemaise ai o le sailia lea o se fanua
e teu ai le tamaloa kolea e pei ona taua.
Saunoa le tofa
Muavaefaatasi, ina ua ia maua le tala e uiga i le tamaloa Kolea
ua toeititi atoa le tausaga talu ona maliu, sa ia taumafai e
faafesootai nisi o tagata Kolea e masani i ai, ma faatalatalanoa
le tulaga o le mataupu, ona o le tamaloa ua maliu, o se tasi
o ana uo mamae i aso ua te'a.
I le iuga o lea
feutanaiga, ua mafai ai ona eli le tuugamau mo le tamaloa kolea
i le fanua o le afioga Satele Galu Satele i Vailoa, i le maea
ai o se feutanaiga a Satele ma sui o le faalapotopotoga o tagata
Kolea i le atunuu.
Na faamaonia
mai e le tofa Muavaefaatasi, o le Aso Lua na tea nei na eli ai
le tuugamau ma o loo i ai le fuafuaga o le aso e teuina ai le
tino maliu o le tamaloa Kolea lea ma lagomau ai i le nofoaga
e pei ona saunoa e le afioga Satele Galu Satele ma lona aiga.
Sa ia faafetaia
foi le galuega alofa a le afioga Satele ua mafai ai ona ofo ina
mai lona fanua ona o lenei tagata ese. Saunoa Muavaefaatasi,
"o le upu a le Tusi Paia, ia tatou alolofa atu i tagata
ese o loo mau ma i tatou."
Faafesootai le tusitala i le imeli ausage@samoanews.com.
© Osini Faleatasi Inc. dba Samoa News reserves
all rights.
|