Fautua Senate
ia saili inisiua mo tagi e faasaga i le LBJ
tusia: Ausage
Fausia
Na faamanino
e le afioga i le loia sili o le malo o Amerika Samoa, Fepulea'i
Afa Ripley, e ui e talitonu lona taofi e lelei pe a i ai se Inisiua
mo le falemai, ina ia kava ai soo se tagi e faia e tagata lautele
faasaga i ni faaletonu e tulai mai i le latou tautua, peitai
e i ai lona talitonuga, e aafia ai lava le malo ona o le mafuaaga,
e lei lava le malosi o le tulafono lea na pasia, ina ua avea
le falemai o le LBJ ma pulega tumaoti i totonu o le malo.
O le taeao ananafi,
na iloiloina ai e le komiti o tupe a le maota, se iugafono na
faaulufaleina e le afioga i le alii Senatoa Tuaolo M. Fruean,
e tu'u ai i le LBJ e latou te totogia so'o se tagi e faasaga
i le falemai, nai lo le tigaina toatasi ai o le malo.
Na faamanino
e Fepuleai, o le tulafono o loo i ai, afai e faia se tagi faasaga
i le LBJ ona o se soifua ua afaina e mafua mai i le latou tautua,
o loo aafia ai lava ma le malo tusa lava foi la pe pasia le tulafono
fou lea ua taoto i luma o le maota maualuga, e tumau lava ona
aafia le malo.
"Se'i vagana
ua sui le vaega o le tulafono lea na pasia i le taimi na tumaoti
ai le falema'i, ona faatoa mautinoa lea, e le toe aafia le malo
i le totogiina o tagi nei o loo faia e tagata," o le saunoaga
lea a Fepuleai.
Sa ia ioeina
foi ina ua fesiligia o ia e nisi o alii Senatoa, e na o le pau
lava le auala e mafai ai e le falemai ona totogi tagi nei, o
le faia o se Inisiua, peitai o se tulaga faigata tele i le taimi
nei.
Saunoa nisi o
alii Senatoa, e le o se tulaga talafeagai o loo faia e le LBJ,
o le faaletonu o le latou tautua i le atunuu ma maimau ai soifua
o nisi, ae tigaina le malo e totogi.
"O isi taimi,
matou te fesiligia ai a latou faamaumauga i le itu tau tupe,
aemaise ai o le fia tuuina atu o ni fautuaga mo le manuia o le
latou galuega, ae fai mai e leai se feau a le fono, ae o lea
la ua toe aapa mai ina ua pagatia i tagi tetele nei," o
le saunoaga lea a le afioga Tuiagamoa Tavai. "Ua leai ai
se eseesega ma le upu a le atunuu, na ona mu lava o le lima tapa
loa i le Iaofi."
Na fesiligia
e le tofa Lolo Moliga le loia sili, poo a ni auala ua taumafai
ai le malo e foia le toe tulai mai o nei faaletonu. Na saunoa
le loia sili, na pau le tulaga e tatau i le falema'i ona fai,
o le i ai o se Inisiua ina ia puipuia mai ai i latou mai tagi
nei, aemaise ai o le totogia o loia aua o le taimi nei, o loia
mai le ofisa o le loia sili o loo galulue i le faataunuuina o
nei feutanaiga i le va o le falemai ma le atunuu.
Na fautuaina
foi e le alii Peresetene le loia sili, ina ia fautua i le alii
Kovana pe afai e na o le pau lea o le auala e mafai ai ona foia
nei faafitauli, o le fai lea o se Inisiua mo le falemai, aua
afai ae le taofia lea tulaga, o le tausaga fou o le a oo atu
ai i le tai miliona tagi a tagata ua faia faasaga i le falemai.
O le isi fautuaga
mai nisi o alii Senatoa, e tatau foi ona faasala ma le foma'i
lea na mafua ai le faaletonu, pe o se taotoga e lei lelei ona
faia na mafua ai ona maliu se tasi, e tatau lava ona i ai se
faasalaga i le foma'i lea.
Saunoa le afioga
ia Fiatauaulava I Sauni, afai ae tuu atu le totogiina o tagi
i le falemai, faatasi ai ma le faaee atu o se faasalaga i le
foma'i e tulai mai ai se faaletonu, e i ai lona talitonuga o
le a le toe tulai mai ni faaletonu faapea, aua o le a mataalia
uma foma'i i le faatinoina o latou tiute.
Ae i le talanoaina
ai o le mataupu e uiga i le tagi a Leasuasu Tupuono faasaga i
le falemai ma le malo, na faamanino ai e le teutupe a le malo,
tofa Gaea Perefoti Failautusi, o le taimi nei, toe $113,326.98
le tupe o loo i totonu o le teugatupe lea na faaagaga e totogi
ai tagi e faia faasaga i le malo, ae o le tagi e pei ona tuuina
mai ai se poloaiga mai le faamasinoga, e $147,236.00.
Na faamaonia
foi e le loia sili i luma o le maota, e le na o le pau lea o
tagi o loo faia faasaga i le malo, ona o ni faaletonu na mafua
mai i le falemai o le LBJ.
Fa'afesootai mai le tusitala i le ausage@samoanews.com.
© Osini Faleatasi Inc. dba Samoa News reserves
all rights.
|