Tali faaaloalo
mai Ao Mamalu malo Samoa i le faigamalo Tutuila a Manu'a
tusia: Leua
Aiono Frost
Ona o tulaga
fa'a-Taiulu o Faigamalo, ma fa'aaloaloga e masani ai Tupu ma
Tamali'i o Samoa na lua, na a'e ai se finagalo tula'i o lana
afioga le Ao Mamalu o le Malo o Samoa, Tuiatua Tamasese Tufuga
Taisi Tupuola Efi ma le Faletua o Filifilia Imo - Tufuga ma Aiga
e tali fa'aaloalo mai e tusa ai o le masi'i atu o le afioga le
Kovana Sili Togiola Tulafono e avea ma sui o le tatou Malo i
le sauniga mamalu o lona fa'apaleina o le "Ao Mamalu o le
Malo o Samoa Tuto'atasi."
E le gata ai
na'o lea masi'i fa'aaloalo atu, ae o le o'o atu fo'i o le afioga
le Peresetene o le Fono Faitulafono, Tofa le To'oto'o o le Faleula
Lolo Letalu Moliga ma le susuga le Fofoga Fetalai o le Maota
o Sui, Savali Talavou Ale mulimuli ane.
Na o'o uma fa'aaloaloga
a le afioga le Ao Mamalu o le Malo o Samoa i le fa'auluuluga
o Vaega o Fa'amasinoga i le afio o le afioga le Fa'amasino Sili
F. Michael J. Kruse atoa ai ma le afioga le Faipule o Amerika
Samoa i le Konekeresi a le Malo Tele le tofa Faleomavaega Eni
Hunkin, a'o le'i toe taliu atu i fanua i le va'alele o le 4:00
i le afiafi o le aso ananafi.
"O se mea
matagofie pe afai e fealofani o uso, aua e moni lava le Tusi,
o uo mo aso uma, ae o uso lava mo aso vale." O nisi ia o
fuaitau sa o'o i ai fetalaiga o le aso fesilasilafa'i i Maota
o Ali'i i le taimi na taua'ao ai fa'aaloaloga fa'ale-atunu'u
i le afioga le Kovana Sili ma le Sui Kovana o le Malo o Amerika
Samoa.
E le gata i lea
fa'amoemoe ua fa'ailoa atu i luga, ae sa maualuga le fanoga o
Samoa Tuto'atasi atoa i le Atua ina ia tafa sona finagalo ma
ia alofagia le fa'atafa gasegase o le Fa'aao o le Malo o Amerika
Samoa, lea ua a'e manuia, ma ua tatau ai ona si'i fa'atasi e
Samoa atoa le fa'afetai i le Atua Soifua.
"Afai e
te tiga, ta te tiga fa'atasi, o a lava ni fa'aletonu, tatou te
fa'amoemoe tasi fo'i i lo tatou Atua e alofagia mai a tatou faigamalo
na lua." O nisi ia saunoaga a le Fofoga o le Malaga, Tofa
Fauolo Apevai o le fofoga fo'i o Safotulafai.
O lana saunoaga
lea sa ia fa'apa'i malu ai i fa'atafa gasegase ma tiga sa o'o
i ai le afioga le Kovana Sili o le tatou malo. Peita'i, na i'u
ina matua fa'amalieina itu na lua, ona o faiva o fa'aaloaloga
ma tulaga fa'atamali'i sa tau fai fetufa'i ai i latou i lea fo'i
taeao ua ula.
O nisi o lea
aumalaga sa fa'aafio mai ai Aiga Sa Laulusa mai Moata'a, ma le
susuga le Fa'afeaiga Oka Fauolo ma Aiga Sa Fauolo mai Safotulafai
ma nisi o le pa'ia o Aiga Sa TuiAtua, Tamasese ma Tufuga o lo'o
alaala tumau fo'i i lo tatou nei Malo.
E ese mai lea,
sa i ai se meaalofa taua lava na masi'i mai ma lenei aumalaga.
Ona o lana afioga le Ao Mamalu o Samoa o se tasi o Tusiupu ta'uta'ua
o le atunu'u, o lea ua i ai sana tusi o le a tatala le fa'atauga
i le masina o Aperila i le atu Samoa, o sana lea meaalofa patino
mo sui uma ua aofia i faigamalo a Amerika Samoa.
O le igoa o lea
tusi Pacific Indigenous Dialogue in Faith, Peace, Recconciliation
& Good Governance - "O le Gagana Feso'ota'i a le Pasefika"-
e ala i Fa'atuatuaga, tausiga o le Filemu, Soalaupule i ala e
fa'aleleia ai ma Faigamalo e agava'a i ona Tagata!
Faafesootai
le tusitala i le imeli leua@samoanews.com.
© Osini Faleatasi Inc. dba Samoa News reserves
all rights.
|