Le pasia
Senate pili e faasa ai ona tutu saini palota i autafa o auala
tusia: Ausage
Fausia
Ua teena e le
maota maualuga le pili na faaulu mo se tulafono e faasa ai ona
toe faatutu ni saini mo palota i autafa o le alatele, aemaise
ai soo se vaega o nofoaga faitele a le malo, i se palota e 8
(lagolago) i le 7 (tete'e), ae e mana'omia palota e 10 e pasia
ai le iugafono.
O lenei pili
na faaulufaleina e afioga i alii Senatoa ia Alo Dr. P Stevenson
ma Pulefaasisina Tuiasosopo
I le maea ai
o le faitauina faatolu o le tulafono i le taeao ananafi, na tulai
ai le afioga i le alii Senatoa ia Tuaolo M Fruean, ma ia fesiligia
le maota, i le mafuaaga ua a'e ai se tofa e fau lenei tulafono.
Saunoa Tuaolo,
afai na mafua ona fau lenei tulafono, ona o le taumafai ina ia
taofia ai le tulai mai o faafitauli ma vevesi i le va o aiga
ma nuu, na ia saunoa , "e le o se tiute lena o le Fono o
le taumafai e avatu ni auala e foia ai faafitauli i le va o aiga
ma nuu, ae o le matafaioi lena a le Faamasinoga, ae o la'u tatalo,
tatala le avanoa i le atunuu mo lenei tausaga palota, sei faaali
lo latou valevale alofa i e ua latou lagolagoina."
Na aofia foi
i le saunoaga a le tofa Tuaolo lona taua o suafa o afioga i alii
Senatoa ia Fiatauaulava I. Sauni ma Alo Dr. P Stevenson, oi laua
ia na fauina lenei tulafono e faasa ai ona toe faatutu ni saini
mo le palota i tafatafa o le alatele.
Na avea lea saunoaga
ma itu na tulai ai Alo, ma ia talosaga i le alii Peresetene,
ina ia tuu loa le pili mo le palotaina, ona e le toe talafeagai
ni faafinauga o lea ua faitau faatolu le tulafono, e tusa ai
ma tulafono a le maota. Sa ia taua foi, "O tatou o loo
fauina tulafono, ae afai o le ata lea o le a tatou agai atu i
ai, ona lagona ai lea o le lo'u faanoanoa."
Na saunoa foi
Alo, "O le matou itumalo, ua afaina ona o le pili lenei,
ma e i ai ituaiga faafitauli e tatau ona oo atu i le faamasinoga,
peitai o mataupu maaleale faapenei, o le matafaioi tonu lea a
le fono, o le foia o faafitauli nei e mafua mai ona o sailiga
tofi."
Na fa'aalia foi
e le afioga Fiatauaulava ia lona faanoanoa ona ua aafia foi lona
sui faipule ma lona itumalo, ae le o ia e ana ia le tulafono
lea na faaulu, ae ona ua taatia atu i lana komiti, o le ala lea
o le auai i lona manatu i le tulafono, peitai na te taliaina
ma le agaga faafetai le finagalo o le maota e pei ona teena ai
lea tulafono.
Na faamanino
e le tofa Lolo Moliga, e i ai lona talitonuga, o loo manino tulafono
tauave a le maota e lima taitaia ai ana galuega faatino, aemaise
lava i taimi e tulai mai ai mataupu maaleale faapea, ma maua
ai foi le avanoa e lalafo i ai afioga i alii faipule.
Sa saunoa foi
Lolo e faapea, "Soo se tulafono lava e ulufale mai i totonu
o le maota fono lenei, e le toe taua o se tulafono na faaulufaleina
e se Senatoa, ae ua taua o le tulafono a le maota, ma o mea totino
ia a le maota, o le mafuaaga lea e ala ai ona taoto atu i komiti
latou te iloiloina."
Sa ia momoli
foi le faamalo i afioga i alii Senatoa i le onosa'i ao felafolafoa'i
le maota i lenei tulafono taua, ona e i ai lona talitonuga, o
ituaiga mataupu nei e le faigofie, ae i ai lona talitonuga, o
loo mulimulita'i pea le maota i tulafono, ma o le ava fatafata
foi e fai ai galuega a le maota i soo se taimi e usuia ai.
Fa'afesootai
mai le tusitala i le ausage@samoanews.com.
© Osini Faleatasi Inc. dba Samoa News reserves
all rights.
|