Tala i Vaifanua
SN/Le Lali
TOE SI'I TAU
O SUAUU
Ua si'itia nei
tau o kesolini i pamu kesi a le teritori, e pei ona sa molimauina
e se sui o lenei nusipepa i le Aso Toonai, ma ua fa'ailoa mai
e le susuga Sione Kava, mai i le Ofisa Suauu a le Teritori, o
se tulaga e le mafai ona pulea e le teritori, ona ua si'i tau
o suauu i le lalolagi atoa.
I tau si'i atoa
o suauu e pei na sa faatulagaina i le amataga o le vaiaso, ua
vaaia ai le si'i o le kalone kesolini i le $3.48 (o se faaopoopoga
e 21 sene mai i tau si'i atoa na iai), o lona uiga ua latalata
i le $4 le tau o le kalone kesolini i pamu kesi.
Ua toatele nisi
o le atunuu ua fa'aalia lo latou faasea i le tulaga ua iai le
suauu, aemaise i latou o lo'o faafoeina taavale tetele. E na'o
le pau le fautuaga mai i le susuga Kava mo le mamalu lautele,
o le tu'u o taavale i le fale i nisi o taimi, ae fa'aaoga pasi.
Ua faapea foi
ona si'i tau sii atoa o isi oloa tau suauu, e pei o kiso (diesel)
ua faaopoopo iai le ta'i 21 sene, lea ua o'o ai kiso auala (road
diesel) i e $.78 i le kalone, o suauu mo afi tetele ua $3.46,
mo vaa fagota $3.26 ma isi ituaiga vaa $3.38. O suauu mo vaalele
faapea le kalasini, ua $3.47 i le kalone.
I lenei si'i
ua faapea ona faapopoleina ai i latou o lo'o galulue i ofisa
vaalele, ona ua iai se talitonuga, o le a avea ma tulaga o le
a toe si'i ai tau o pasese mo femalagaiga i luga o le ea.
FAAULU FAIGAMALO
PILI PALOTA MO MILITERI
Ua i luma nei
o sui faitulafono se i'ugafono taufa'aofi na faaulufaleina e
le afioga i le Kovana Sili, e mafai ona aofia ai tama fanau o
Amerika Samoa o lo'o i totonu o vaega'au, i palota lotoifale
(absentee).
Na ta'ua e le
afioga Togiola Tulafono i se tusi na auina atu i taitai o le
fono faitulafono i le aso 14 o Mati, na ia ta'ua ai le avea o
lenei iugafono ma avanoa e mafai ai e alo ma fanau a Amerika
Samoa i totonu o vaega'au, ona auai i palota a le teritori, a'o
iai i latou i atunuu i fafo.
Ua talosagaina
e Togiola ia le latou galulue faatasi ma taitai o le Fono Faitulafono
ina ia mafai ona pasia vave lenei iugafono.
FAALAUILOA
LE AVEA O AFOA MOEGA LUTU MA VELEGA SAVALI MA SUI TAUVA PALOTA
NOVEMA
O le Aso Toonai
na se'i mavae atu, na faalauiloa mai ai e le afioga Afoa Moega
Lutu, le avea o ia ma e afioga Velega Savali ma sui tauva mo
le tofi Kovana ma le Lutena Kovana, i le palota o loma nei ia
Novema.
Na saunoa Afoa
e faapea, e le o se faaiuga faigofie le tau sailia o se tasi
e la te toalua i lenei faamoemoe, ae ua ia filifilia Velega ona
o lona faamaoni, loto maualalo ma le amiotonu. E pei ona saunoa
Afoa, o se tootoo e savali i ana upu.
Na fa'aalia e
Velega lona agaga faafetai ona o le manatu atu o le afioga Afoa
ia te ia, ua ia talosagaina ai le avea o ia ma ana paga i lenei
faamoemoe.
O le vaiaso fou
ua fuafua e faataunuuina se fonotaga i le va o uo, aiga ma i
latou ua lagolagoina le kemupeni a Afoa/Velega.
Faafesootai le tusitala
i le imeli ausage@samoanews.com.
©
Osini Faleatasi Inc. dba Samoa News reserves all rights.
|