Talosaga
Soliai e taofi le tulafono lea e faataga ai ona palota mai faifeau
tusia: Ausage
Fausia
Ua taatia nei
i luma o le Senate, se talosaga mai i le afioga i le Maopu ia
Soliai Tuipine, le Komesina o le Ofisa Palota, mo le taofia o
le tulafono na faaulu i luma o le Fono Faitulafono, i le fono
faapitoa a le Kovana, e faataga ai ona palota mai faifeau o loo
galulue i fafo i le palota lautele a le atunuu.
I le faateia
ai o le afioga i le Maopu i le faanatinati o lenei tulafono,
aemaise ai o le le lava o se taimi e feiloa'i ai ma loia a le
Ofisa Palota, e tusa ai o le tulafono ma le faamoemoe ina ia
palota mai faifeau o loo galulue i fafo, o le autu lea o lana
talosaga i luma o le Senate i le taeao ananafi, ina ua iloiloina
lenei tulafono taufaaofi, e le komiti lea o loo taitaifono ai
le afioga i le alii Senatoa ia Pulefaasisina Tuiasosopo.
Saunoa Soliai,
o le tulafono lea ua faaulu e palota mai ai faifeau i palota
a le atunuu, o le matua tele lava o le lavelave, ma e le o tulaga
lelei foi le faaupuina o le tulafono, ona, e foliga mai o loo
tuu atu le malosi i le ofisa o lesitala pepa fanau, latou te
iloiloina ai agavaa o faifeau, e mafai ai ona palota mai i le
palota tele a le atunuu.
Na saunoa Soliai,
"O a agavaa o le ofisa o lesitala pepa fanau o le a latou
suesueina ai fua tagata palota, o lea e tuu atu le ofisa o palota
a le malo, o le latou matafaioi tausi lena,?" o se vaega
lea o le saunoaga a le afioga i le Maopu.
"O a la
agavaa o faifeau nei i lalo o le tulafono,?" o le saunoga
lea a Soliai. Sa ia taua foi, o le tulafono lea na pasia atu
e le maota maualuga, e faataga ai ona palota mai alo o le atunuu
o loo tautua i le militeli, o se tulafono lelei, ma e mafua ona
o alo nei ma fanau o loo totogi mai a latou lafoga i le malo,
"ae o faifeau, e leai ni lafoga o latou totogiina mai i
le malo, ma e leai se mea o le a faatusatusa mai ai fua i alo
o loo tautua i le malo, lea o loo i ai lo latou sao."
O atugaluga o
le afioga Soliai i le tulafono lenei, afai e mo na o faifeau
ua faamaonia e mafai ona latou faia faaipoipoga, o lona uiga,
e mafai lava ona sau le tagata mai Amerika talosaga mo sana laisene
fai faaipoipoga, ona agavaa foi lea o ia i lalo o le tulafono
lenei e palota mai ai.
Na faamanino
e le afioga i le alii Senatoa ia Fiatauaulava I Sauni i luma
o le komiti i le taeao ananafi, e le o se finagalo o le Senate
na mafua ai ona faaulu le tulafono lenei mo faifeau, aua o le
vaega lea o le tulafono lea na faaulu mai e mafai ai ona palota
alo o le fanau o loo tautua i le militeli, sa aofia mai ai ma
faifeau, peitai na aveese e le maota maualuga, ma e le tatau
lava ona tuuaia le maota maualuga, o i latou na mafua atu ai
le tulafono fou lea, ae o se finagalo mai le alii Kovana.
Peitai na saunoa
le afioga i le alii Senatoa ia Alo Dr. P. Stevenson, e lavelave
le tulafono pe a tuu faatasi alo o le fanau o loo tautua i le
militeli, ma faifeau o loo tautua i fafo atu o le atunuu, i le
galuega a le Atua, aua e foliga mai, o le a le mulimuli ta'i
le fono i tulafono, ae o le a aga'i atu i le ituaiga tagata ma
lona tulaga.
"O polokiki
mea na ma e le tatau ona ninia faatasia mea aoga ma tulaga e
le o manino i le silasila a le atunuu, aua e le o faatasi le
polokiki ma tulaga o tulafono," o se vaega lea o le saunoaga
a le afioga Alo.
Peitai na saunoa
le Peresetene o le Senate, le tofa i le tootoo ia Lolo Moliga,
o ia foi lea na faaulufaleina lenei tulafono, e le o le faapolokiki
lea o loo mafua ai le tulafono lenei, ae o le naunau ina ia tutusa
tagata uma, ma laina tutusa i le silasila a le atunuu, aua o
aia tatau o tagata e taua, sa ia taua ai, e le o tupe e taua,
ae taua le amanaia o le aia tatau o tagata uma lava.
Na saunoa foi
le afioga i le alii Senatoa ia Tuana'itau F. Tuia, e le tatau
i le maota ona faatamala i le tulafono lea, aua o le mea moni,
e mafai e le tagata lea ua aafia i lenei tulafono ona su le malo,
ina ua le amanaiaina ona aia tatau faaletulafonno.
"Aua tatou
te aveesea le palota mai le tagatanuu e tatau ona ave i ai le
palota, ae aua foi tatou te avea le palota i le tagata e le tatau
ona aveina i ai se palota, aua e mafai e le tagata o le a tatou
aveeseina lana palota ona su tatou," o le saunoaga lea a
le afioga i le Sa'o ia Tuanaitau.
I le maea ai
o felafolafoaiga e tusa ai o lenei tulafono, ua talia ai e le
komiti le talosaga a le afioga i le Maopu, ina ia taofi le talanoaina
o lenei tulafono, seia i ai se aso.
Sa faapea foi
ona talia ai ma le mau na faatuina e le tofa Lolo, ina ia taoto
pea le tulafono i le komiti, ae talosagaina le afioga Solia'i
ina ia aumai i totonu suesuega ia o le a alo atu i ai, ina ia
mafai ai ona faia se faaiuga a le komiti ma le maota, pe a toe
a'e mai le fono ia Iulai.
Faafesootai le tusitala i le imeli ausage@samoanews.com.
© Osini Faleatasi Inc. dba Samoa News reserves
all rights.
|