Tala 'oto'oto
mai i Samoa
faaliliu;
A. Tuna
TOATELE UA
MANUNU'A INA UA OSOFAIA E FANAU AOGA LE TAULAGA I APIA
Na toatele nisi
o le atunuu na tu'ua Apia i le Aso Faraile o le vaiaso ua mavae,
ma le faanoanoa tele, ina ua toatele nisi na manunu'a, na aofia
ai ma leoleo, ina ua osofaia e nisi o fanau aoga ia ofisa, faleoloa
ma isi pisinisi i totonu o le taulaga.
Ma ua faapea
ona tu'uaia ai le aoga a le Don Bosco i lenei faalavelave, ina
ua o latou faasagatau i tamaiti aoga o le kolisi a Avele ma Leifi.
Sa faapea ona faasalalauina i luga o le televise se faatoesega
a le afioga i le Akiepikopo ia Alapati Mataeliga, ona o lenei
faalavelave.
Ua maea ona feiloai
le afioga i le Palemia ma puleaoga o nei aoga, ma o le aso ananafi
na fuafua e faataunuuina ai seisi fonotaga e talanoaina ai se
auala e fofoina ai lenei faafitauli.
E to'a 21 ni
fana aoga a Don Bosco ma se faiaoga e toatasi, na taofia e leoleo
ma o le vaiaso nei na fuafua e tutula'i ai i luma o le faamasinoga
e tali i tuuaiga i le faalavelave na tupu i le vaiaso ua mavae.
Ua taofia uma
taaloga i va o aoga ma e le o mautinoa i le taimi nei le tulaga
o le a iai taaloga faavaoaoga i le lumanai.
Pe a ma le to'asefulu
ni leoleo na manunu'a i lenei faalavelave.
MU SE TEINEITITI
AOGA I POMU NA FA'AAOGA I OSOFAIGA A TAMAITI AOGA O LE TAULAGA
O lo'o faataotolia
nei i le maota gasegase i Motootua, ia se tamaitai e 17 tausaga,
e aoga i le Kolisi a Leififi, na faamanu'alia i se faalavelave
na tupu i le Aso Faraile o le vaiaso ua mavae, ina ua osofaia
e nisi o tamaiti aoga ia le taulaga i Apia.
Ua ripotia mai
le a'afia o se vaega tele o le pito i luga o le tino o si nei
tamaitai aoga ina ua tau ai se fagu kalasini sa fa'aaoga e i
latou na osofaia le taulaga, ma mu ai ona lavalava, a'o tutu
lenei tamaitai i tafatafa o le maketi i'a i Fugalei.
Sa faamatalaina
mai e se tasi o le aiga o lenei tamaitai i le Newsline e faapea,
e tusa ai ma le faamatalaga a le mafine ua faataotolia nei i
le maota gasegase, a'o tutu i luga o le taligalu, na pasi atu
se taavale laupasese o iai ni tagata i totonu, ma sa togi mai
e se tasi o le pasese se pomu ua ta'ua o le "Molotov bomb",
o se fagu kalasini po o se fagu suauu, ua ta'ai i se ofu tino,
ona susunu lea.
Na tau lenei
pomu i le tino o le tamaitai ma amata ai ona mu ona laei ma sa
taumafai o ia ma ana uo e tineia le afi e ala i le sasaina i
ato aoga. I lea lava taumafaiga, na manunu'a ai foi uo a lenei
tamaitai, a'o taumafai atu e lavea'i lenei tamaitai.
E le o manino
pe na iai se mafuaaga na togi ai e i latou na i totonu o le taavale
ia le pomu i lenei tamaitai, ae o lo'o iai se talitonuga a lona
aiga, ai ona o le ofu aoga a le tamaitai sa faia i le taimi na
tupu ai le faalavelave.
FILIFILIA
ELE OPELOGE MA TAGATA TA'ALO O LE TAUSAGA 2007
Ua filifilia
nei le tamaitai siisii u'amea mamafa, o Ele Opeloge, e avea ma
Tagata Ta'alo o Samoa ma le Tamaitai Ta'alo o le tausaga e 2007.
Ae ua filifilia lona uso laititi o Mary Opeloge, o se tasi
foi e siisii u'amea mamafa, e avea ma tagata ta'alo talavou o
le tausaga e 2007.
O le alii o Aunese
Cureen ua filifilia e avea ma Alii Taalo o le Tausaga e 2007,
ona o le tele o ana pine auro sa ausia i le vaitaimi o Taaloga
o le Pasefika.
O le Faiaoga
o le Tausaga, ua filifilia ai le susuga Fuimaono Titi Tafua,
lea na faafoeina le au lakapi faavaomalo ta'ito'afitu (Nationa
Rugby 7's) seia o'o mai i le tausaga ua mavae, lea na faamavae
ai mai i lona tofiga.
Ae ua aloaia
foi le 'au lakapi sa ia filifilia, e avea ma 'au sili ona maoae
o le tausaga e 2007.
O le tamaitai
o Noumea Simi, le peresetene o le 'au Netball, ua filifilia e
avea ma taitai taaloga o le tausaga.
(O tala mai
Samoa ua mafai ona maua mai ona o le tautua a le Samoalive/Newsline)
Fa'afesootai
mai le tusitala i le
evaga@samoanews.com.
© Osini Faleatasi Inc. dba
Samoa News reserves all rights.
|