Pasia Senate Tufele avea
ma totino komiti faafoe LBJ
tusia: Ausage Fausia
E 14-2 le palota na pasia ai
e le maota maualuga i le taeao ananafi, le afioga i le Alofioamoa,
afioga Tufele Li'amatua e avea ma se tasi o totino o le komiti
faafoe a le falemai, e tusa ai ma le tofiaina o ia e le alii
Kovana. Ma sa tuuina faatasi atu i ai ma ni fautuaga mai afioga
i alii Senatoa, ina ia silasila toto'a i le tele o faaletonu
o loo tulai mai i le falemai i le taimi nei, lea ua pagatia ai
le atunuu.
O nisi o mataupu na aofia i felafolafoaiga
sa faia i le taeao ananafi, e aofia ai le auina atu o gasegase
i fafo mo togafitiga, iloiloina o agavaa o tagata o loo tofia
e galulue i tofiga maualuluga a le falemai, faapea ai ma faaletonu
i le itu tau tupe, lea foi o loo faaauau pea ona feagai ma le
falemai.
Saunoa le afioga i le alii Senatoa
ia Fiatauaulava I. Sauni, "E le iloa poo a tonu gasegase
e tatau ona ave i fafo mo togafitiga, e le iloa fo'i poo a gasegase
e le manaomia le auina atu i fafo, ma ua avea ai nei faaletonu
o se faafitauli tele i le va o le atunuu ma le falemai, ae o
loo faaauau pea ona pagatia le atunuu."
Sa ia talosagaina le afioga Tufele,
ina ia silasila toto'a ane i nei faaletonu, ao galue ai i lona
tiute fou.
I le tulaga o le le lelei ona
tofia ma iloilo o agavaa ma tagata tonu e tatau ona nofoia tulaga
taitai o le falemai, o le faafitauli numera tasi lea o loo mafua
ai le tele o faaletonu, e pei ona saunoa le afioga i le alii
Peresetene o le Senate, tofa Lolo Moliga.
E le gata i lea, na saunoa Lolo,
o se tasi o faafitauli o lo'o tulai mai pea, o le taumafai atu
o le Senate e fautua i le komiti ona o a latou faaiuga, ae fai
mai ua aia tele le Fono i tiute a le falemai.
"Sa matou fai atu foi e
iloilo lelei agavaa o le tamaloa lea na tofia muamua e fai ma
CEO o le falemai, ae aumai le latou tala e aua le faalavelave
i a latou tiute, o fea la na i'u i ai, e lei umi lava ona nofoia
e le tamaloa le nofoa ae alu ese," o le saunoaga lea a le
tofa Lolo.
Sa ia taua foi, o lea lava o
loo faaauau mai pea i le taimi nei lea faafitauli, o le tofi
lea o le tagata i se tofiga e leai sona agavaa. Saunoa le tofa
Lolo, o lea na tofia le teutupe a le falemai fou o Patricia Tindall
e galue i le tiute o le Teutupe (CFO), peitia, o lea ua tofia
o ia e avea ma pulesili (CEO), ae le o i ai sona agavaa i le
tiute.
E le gata i le tulaga lea, ae
o le tulaga i le $9miliona lea o loo tau totogi e le falemai
i le taimi nei.
"O faaletonu nei ua leva
ona tatau i le komiti ona foia, peitai, e le mafai, ona latou
te le mafafai ona faalogo i se fautuaga o loo tuuina atu e le
Fono, le maota o tama o le atunuu," e pei ona saunoa Lolo.
Saunoa le afioga Tufele Li'amatua,
e le o se gasegase e fou i le atunuu lenei faaletonu o loo feagai
ma le falemai, peitai e mafua ona faaauau ona o le fai e le isi
vaega o tiute e le tatau ona latou faia.
Saunoa Tufele, e lua lava vaega
mavaevae o loo i ai, o le pulega ma le komiti faafoe, peitai
o le mea ua tupu, ua taumafai le komiti faafoe latou te faia
tiute a le pulega, ae latou te le mafai, ae ua faatamala foi
i latou i le faatinoina o latou tiute.
Saunoa Tufele, afai o le tiute
o le komiti faafoe o le iloilo lelei o tofiga a le pulega i le
tulaga o agavaa poo talafeagai, e tatau ona ave i ai la latou
faamuamua, peitai, e le o tupu lea tulaga ona e le o mafai ona
maua le tulaga o le galulue faatasi.
Sa ia faailoa foi le leai o se
agavaa faa foma'i ia te ia na te talia ina ai lenei tofiga mai
le alii Kovana, peitai i lona talitonuga o ia o se tasi o taitai
e mafai ona ia faia suiga, ua ia manatu ai, e tatau ona ia fesoasoani
malosi i le komiti o loo i ai, mo le faia oni suiga mo le falemai.
O le taimi nei, o loo i ai foi
faafitauli i le va o le komiti faafoe ma fomai, ma o se faafitauli
e tatau ona foia.
Saunoa foi le tofa Lolo, o le
faafitauli lea ua tulai mai i le falemai i le taimi nei, ua latou
mananao e tofi se tagata e faalogo atu ia te i latou ma usitai,
ae ua le tofi se tagata e i ai le agavaa e faatino ai tiute mo
le manuia o le atunuu.
Faafesootai
le tusitala i le imeli ausage@samoanews.com.
© Osini Faleatasi Inc. dba Samoa News reserves
all rights.
|