Tala o le
Vaifanua
SN/Le Lali
UUNA'IA E
PICED IA MATUA INA IA MAFAI ONA FESOASOANI I AOAOGA A FANAU
O lo'o ua faagasolo
nei se polokalama a le vaega o le PICED mo matua uma o le atunuu,
ina ia mafai ona fesoasoani malosi matua i tulaga o aoaoga a
alo ma fanau, aua so latou lumanai manuia.
E pei ona sa
saunoa mai le susuga Moe Masoe, o ia lea o lo'o faafoeina lenei
polokalama ua faaigoaina i le faaperetania o le Parent Information
Resource Center (ASPIRC), o le autu po o le auga o lenei faamoemoega,
ina ia mafai ona u'unaia matua ina ia a'afia i aoaoga a fanau.
Ua mafai ona
malaga atu le susuga Masoe ma nisi o lana aufaigaluega i nu'u
ma afioaga, e pei ona sa iai se latou fetufaaiga na faia ma nisi
o matua ma fanau talavou o le afioaga o Poloa i le masina ua
mavae.
O le Aso Toonai
na sei mavae atu nei, sa o latou auai atu ai foi i se Mafutaga
a Tina Soofatasi na faataunuuina i le malumalu Metotisi i Fagaima/Tafuna.
Na mafai ai ona fetufaa'i ai le vaega a le PICED ma tina mai
i ekalesia eseese se ono e tusa ai ma le autu o lenei polokalama.
E toaono ni sui
o le PICED ua nofo sauni e galulue faatasi ma matua i auala e
mafai ai ona fesoasoani matua i tulaga o meaaoga a fanau e malaga
atu ma i latou i aiga, faapea le uunaia o fanau ina ia tino u
i a latou aoaoga. E mafai e matua ona ausia ni faailoga pe a
faamaeaina vaiaso faatulagaina o nei aoaoga.
O le vaiaso fou
ua faamoemoe e faaooina atu ai le polokalama a le ASPIRC i matua
i le itu i Sisifo, e ala i se aoaoga ua fuafua e faataunuuina
i le maota o le galuega EFKAS i Vailoatai mai i le 9 i le taeao;
o le Aso Tofi, ua faamoemoe e fa'aauau ai lenei aoaoga mo matua
i le Fagaloa, i le faletalimalo o le afioga Usoagalelei Lago'o
i Faga'alu, i le 9 i l taeao, ae o le Aso Faraile e faataunuuina
ai i Aua, i le hall a le ekalesia Katoliko, ma le Aso Toonai,
o le a faimalaga atu ai sui o le PICED i Aunuu.
Mo nisi faamatalaga
e tusa ai ma lenei polokalama taua a le PICED, e mafai ona valaau
le 699-9822.
TUFATUFAINA
E LE KALAPU ROTARY LE $1,100 MO FANAU AOGA E TOA 11
E to'a 11 ni
fanau aoga a le teritori ua faamoemoe e faauuina mai i aoga maualuga
i lenei tausaga, ua faamanuiaina i se meaalofa tau tupe mai i
le faalapotopotoga a le Rotary, i sa latou faailgoa ua faaigoaina
o le '4-Way test award."
O lenei fa'ailoga
e tufatufaina i tausaga uma e le Rotary ma o le lona 25 lenei
o tausaga talu ona faia le galuega alofa a lenei faalapotopotoga.
O i latou ua
faamanuiaina i lenei tausaga, e aofia ai Paulo Fogamoni mai i
le aoga maualuga a Fagaitua; o Tricia Sataua mai i le aoga a
Samoana; o Suti Suti mai i le Tafuna Poly Tech; o Charity Porotesano
mai i le aoga maualuga a Tafuna; o Malaeoletalu Lobendahn, mai
i le aoga maualuga a Leone; o Jun Wan mai i le South Pacific
Academy; o Bingham Laie mai i le aoga maualuga a Kanana Fou;
o Noemi Suisala mai i le Pacific Horizons; o Gloria Tavita mai
i le aoga maualuga a Iakina SDA; o Talei Apted mai i le Faasao/Malisi
ma Jonathan Tafaoa, mai i le aoga maualuga a Manu'a.
O le Aso Toonai
na sei mavae atu, na faataunuuina ai i le fale'aiga a le Sadie's,
se faatasiga tele mo nei alo ma o latou matua, e tufatufaina
atu ai a latou faailoga. Ua tofutofusia le tamaititi/teineititi
ma se meaalofa tau tupe e ta'i $100 ma se fa'ailoga e aloaia
ai a latou taumafaiga.
AUSIA E BRENT
SCHWENKE II LE FAAILOGA O LE AETO I LE POLOKALAMA A TAMA SIKAUTI
Ua ausia nei
e le alii 18 tausaga le matua mai i Vaitogi, o Brent August Schwenke
II ia le faailoga pito sili ona maualuga i totonu o le polokalama
a tama sikauti a Amerika, le faailoga o le Aeto, ona o ana galuega
lelei sa faataunuuina mo le aoga a le Manumalo Baptist, i Malaeimi.
A'o feagai fanau
aoga ma malologa i le ogatotonu o le tausaga i le tausaga ua
mavae, sa faapea ona faataunuuina se galuega alofa a lenei alii
talavou faatasi ai ma le fesoasoani a lana vaega sikauti Troop
350, o le Ekalesia a Iesu Keriso o le Au Paia o Aso e Gata Ai,
mai i le uarota a Meseta International (MIW), aua le toe faaleleia
o laupapa uma i totonu o potu aoga e 20 a le aoga a Manumalo,
le aoga na faauuina mai ai lenei alii i le tausaga e 2007.
E pei ona sa
ta'ua e lenei alii, na iai sona naunautaiga ina ia toe tu'uina
atu se meaalofa i le aoga na aoga ai, ma ona o le tulaga faaletonu
na iai laupapa mo o potu aoga, o lea na a'e ai se manatu e auala
atu i lea itu lana fesoasoani.
O le Aso Lua
o le vaiaso ua mavae, sa faataunuuina ai le sauniga faapitoa
mo le faapineina o lenei alii. O le faatautoga sa faafoeina
e le susuga Larry Sanitoa, lea ua faauluulu iai le polokalama
Sikauti a Amerika Samoa, ae o le tina ia Tagivale Schwenke na
faapineina si ona alo.
Ona sa le'i mafai
ona auai le afioga i le kovana sili i lea sauniga i le Aso Lua,
o lea na o'o atu ai le alii o Schwenke i le ofisa o le kovana
i le Aso Faraile, e talia aloaia se meaalofa mai i le kovana,
e aofia ai se laupapa (plaque) ma se fu'a a Amerika Samoa.
Faafesootai
le tusitala i le imeli evaga@samoanews.com.
© Osini Faleatasi Inc. dba Samoa News reserves
all rights.
|