Pasia e le
Senate le pili mo se tulafono e sii ai totogi o faiaoga
tusia: Ausage
Fausia
O le taeao ananafi
na pasia ai e le maota maualuga le tulafono taufaaofi lea na
auina mai i le ofisa o le alii Kovana, e sii ai totogi mo faiaoga,
faatasi ai ma suiga e pei ona tuuina mai i le ofisa o aoga.
E 13-0 palota
na pasia ai e le maota maualuga lenei tulafono, ma ua tuuina
atu nei i le maota o sui mo sa latou faaiuga.
I le pasia ai
e le maota maualuga o lenei tulafono, sa faapea ai foi ona latou
pasia ma ni suiga ua faia ina ia o gatasi ai lenei tulafono ma
le auala o loo laugatasia uma ai tagata faigaluega a le malo.
E tolu suiga
tetele a le maota maualuga ua tuuina atu i totonu o lenei tulafono,
ma o ia suiga e aofia ai le tulaga lea, mo le pasiaina o le komiti
faafoe latou te iloiloina le puleaina ma le faamaoniaina o faiaoga,
ia lava na o le Maota Maualuga e pasia ina i latou nei, ae o
le tulafono na ulufale mai ai, ia pasia e le fono faitulafono.
O le isi suiga,
o le tulaga o faaopoopoga o totogi (Increment), e faalua i le
tausaga sa aumai ai i totonu o le tulafono, peitai ua suia e
le maota maualuga, ia faatasi i le tausaga, ina ia laugatasia
uma ai ma isi tagata faigaluega a le malo.
Ma le suiga lona
tolu, ua aveesea ai le faaupuga e faapea sa i totonu o le tulafono,
"ua faatagaina le matagaluega o aoga a le malo o Amerika
Samoa, latou te faatulagaina ni totogi mo auaunaga e faatau i
le faamalosia o polokalame o tusipasi mo faiaoga, ma o tupe e
maua mai totogi ia, o le a siaki pea ma su'eina i suegatusi a
le matagaluega o tupe a le malo."
Saunoa le afioga
i le alii Senatoa ia Alo Dr. P Stevenson, o ia foi lea o le taitaifono
o le komiti o aoga a le maota maualuga, o lenei tulafono, o se
tulafono taua tele, ma, sa tatau lava ona lava se taimi e iloilo
ma auiliili ai e le maota tulaga uma e uiga i lona faatulafonoina,
aua e aoga mo le lumanai o faiaoga a le atunuu.
Ae peitai ona
o le tulaga utiuti ua i ai le taimi o loo totoe, o le pogai
lea ua manatu ai ua lava ma totoe lenei siitaga ua i ai i le
taimi nei, ae se'i toe i ai se isi manaoga e tulai mai, ona faia
lea i ai o se isi faaiuga.
O le tulaga lava
foi lea sa saunoa i ai le alii Peresetene o le Senate, tofa Lolo
Moliga i le taeao ananafi.
Saunoa Lolo,
ona o se tulafono taua tele lenei, sa tatau ai ona auiliili le
tulaga o le sii maualuga lea o totogi mo faiaoga, aua a lelei
faiaoga, e manuia ma lelei fanau ma le lumanai o le atunuu, ae
ona o le tulaga i le le lava o le taimi o loo totoei, o le pogai
lea ua manatu ai ina ia pasia lenei tulafono ua i ai i le taimi
nei.
Sa lagolagoina
foi e nisi o alii Senatoa le manatu, e tatau lava ona sii i luga
tulaga o totogi o mo faiaoga, ina ia faafaigofie ai ona faatosina
mai faiaoga mai fafo, e galulue i totonu o Amerika Samoa.
Faafesootai le tusitala i le imeli ausage@samoanews.com.
© Osini Faleatasi Inc. dba Samoa News reserves
all rights.
|