Feagai Amerika
Samoa ma se faafitauli tele ona o le faatupulaia o tagata mai
fafo
tusia: Ausage
Fausia
O le faatupulaia
o tagata mai fafo o loo ulufale mai i totonu o le teritori o
Amerika Samoa, ma faaipoipo atu i isi tagata nuu e le o ni Amerika
samoa ma fananau ai a latou fanau, o se popolega tele lea na
faaalia e le afioga i le alii Senatoa ia Alo Dr. P Stevenson
i luma o le maota maualuga i le taeao ananafi, o le a feagai
ma Amerika Samoa i ni nai tausaga e le o toe mamao.
Saunoa le afioga
Alo, o le a se fuafuaaga a le malo ua faia i tagata mai fafo
ia ua fananau a latou fanau ma avea o Nesionale o le Iunaite
Setete?
I le taimi o
folafolaga a le maota maualuga i le taeao ananafi, sa ia faaleoina
ai lenei mataupu, ona o se mataupu ua maitauina ai le agai ina
faatupulaia i totonu o Amerika Samoa.
I tausaga uma
lava, o loo ulufale mai tagata mai fafo atu o le atunuu, e le
gata e galulue i totonu o Amerika Samoa i lalo o ni polokalama
faapaaga a le malo ma kamupani, ae o tagata foi o loo talosaga
mai e fia agai mai e aumau ma nonofo i totonu o Amerika Samoa.
Peitai o le faafitauli
o loo tulai mai i le taimi nei, e le o i ai se tulafono e aiaia
ai fanau a tagata nei, ia ua fananau i totonu o Amerika Samoa,
pe o le a le ituaiga faatulagana e tatau ona i ai i latou, aua
o le mea moni, e ui o latou na fananau i totonu o Amerika Samoa,
ma ua otomeki foi ona avea ma Nesionale o le Iunaite Setete,
peitai e le o ni tagatanuu o Amerika Samoa tuaa o fanau nei,
ma o se popolega tele lea ua i ai i taitai o le atunuu.
Saunoa le afioga
Alo, e tatau ona i ai se tulafono e puipuia ai lenei tulafono,
ina ia faafaigofie ai ona faamalosia ma faamanino le tulaga o
tagata nei, aemaise ai o latou leo ma aia tatau i totonu o le
malo ma le atunuu.
E lei mamao atu
foi na faaulufaleina ai se tulafono i luma o le maota maualuga,
e faamataina ai le uiga tonu o le upu, O ai tonu Nesionale o
le Iunaite Setete?
I le tino o lenei
tulafono o loo manino mai ai, o Nesionale o le Iunaite Setete,
o tagata ia na fananau i totonu o Amerika Samoa, mai matua o
tagatanuu o Amerika Samoa.
I le tulaga la
lea, na saunoa ai loa le afioga Alo, e tele le faaletonu o loo
tulai mai i le tulaga lea i le taimi nei, aua o lea o loo toatele
fanau ua fananau i totonu o Amerika Samoa, mai matua e le o ni
tagatanuu o Amerika Samoa, "ae o le fesili, o le a se gaioiga
a le malo o faia i ai."
Ua i ai le faamoemoega
o le afioga Alo, o le a aumai i luma o le fono faitulafono lenei
mataupu, poo se tulafono foi, pe a toe ae mai le Fono ia Iulai
o le tausaga nei.
"Afai e
le mataala taitai o le atunuu i le taimi nei, e ono feagai Amerika
Samoa ma se faaletonu uiga ese i le lumanai, ma o se faaletonu
o le a faigata ona toe foia," o le saunoaga lea a le afioga
i le alii Senatoa ia Alo.
Fa'afesootai
mai le tusitala i le ausage@samoanews.com.
© Osini Faleatasi Inc. dba
Samoa News reserves all rights.
|