Tala otooto
mai le Faamasinoga
tusia: Ausage
Fausia
KONE WILLIAMS
E lua vaiaso
lea ua toe tolopo ai e le Faamasinoga Maualuga le mataupu faasaga
ia Kone Williams, ia oo atu ai ua maea ona totogi mai le sala
tupe e $1,000 lea na poloaina ai o ia ina ua lauina lona faasalaga,
na te totogia, ina ua faamaonia le moliaga o le faaoolima i le
tulaga tolu faasaga ia te ia.
E $500 le vaega
tupe ua maea ona totogi e Williams, peitai i le poloaiga na tuuina
atu e le faamasinoga i le aso na lauina ai lona faasalaga, e
tatau ona faia lana ulua'i iloiloga, lea na faia i le vaiaso
na tea nei, ua maea ona totogi le sala e $1,000.
Na faamanatu
atu e le faamasino sili i le loia a le malo, susuga Frederick
J. O'Brien, e tatau i le malo ona mataalia i le faamalosia o
tupe totogi, aua o le isi lea manaoga o loo i ai i le malo i
le taimi nei, o le tau sailia o tupe e totogi ai tagata faigaluega.
"Aua le
na o le nofo ma matamata ae leai se gaioiga e faia," o le
saunoaga lea a le faamasino sili ia O'Brien.
ELIJAH LEASAU
Ua taoto atu
nei i lalo o se fautuaga mai le faamasinoga le faafinauga na
tuuina atu e le loia a Elijah Leasau, susuga David Vargas, ina
ia toe iloilo e le faamasinoga lana faaiuga lea ua faasala ai
Elijah mo le tasi le tausaga i le toese.
O Elijah, na
faamaonia e le faamasinoga lana solitulafono i lalo o se maliliega
na latou faia ma le malo, o lona faaleagaina lea o meatotino
a le malo, ma o lea solitulafono, e tasi le tausaga e ono faasalaina
ai se tasi i le toese, ma le sala tupe e $1,000.
Na finau Vargas,
le loia a Elijah, i lalo o aiaiga o le tulafono, soo se tasi
e faamaonia i se solitulafono, e tatau ona tuli le 2/3 o lona
faasalaga, e ui o le tuuina mai o se faasalaga, o le matafaioi
lea a le faamasinoga.
O loo finau Vargas
i le faamasinoga, sa le tatau ona faasala Elijah i le tasi le
tausaga i le toese.
KITIONA PAUULU
O le vaiaso na
nei na ioeina ai e le alii o Kitiona Pauulu le solitulafono o
le gaoi, ona o se faalavelave lea na laua ave faagaoia ai ni
pusa pia (coors light) mai le nofoaga sa teuina ai oloa a le
kamupani o le G.H.C Reid i luga o le uafu.
Sa ia taua, o
pusa pia na gaoia, sa la taupulepule ai ma le alii o Jacob Tagaloa
la te ave faagaoia ni pusa pia se 12 ma o le tau aofa'i e sili
atu ma le $100.
O le solitulafono
lea, e ono faasalaina ai se tasi i le toese mo le umi e le sili
atu i le 5 tausaga, poo se sala tupe e le sili atu i le $5,000.
Fa'afesootai mai le tusitala i le ausage@samoanews.com.
© Osini Faleatasi Inc. dba Samoa News reserves
all rights.
|