Nofovaavaaia se alii leoleo
mo le 2 tausaga
tusia: Ausage Fausia
E lua tausaga lea ua faanofo
vaavaaia ai e le faamasinoga faaitumalo le susuga i le alii leoleo
ia Keneti Lagai, ina ua ia ioeina le moliaga o le faaoolima i
le tulaga tolu, ona o se faalavelave na tulai mai i le po o le
aso 1 o Tesema o le tausaga na tea nei, lea na ia faaoolima ai
ia Kilifoti Papalii.
I le fofogaina ai o le faasalaga
a le faamasinoga i le taeao ananafi, na faaaluina ai e le afioga
i le alii faamasino ia John Ward II se taimi umi, na te faamatalatalaina
ai le taua o le tiute faaleoleo, ma vaega o le tulafono o loo
puipuia ai o latou aia faaletulafono.
Saunoa le afioga Ward, o le tiute
faaleoleo, o se galuega e faigata lona faatinoina, aua e i ai
taimi e ono lamatia ai o latou soifua, aemaise lava pe afai latou
te tali atu i se faalavelave, ae o le tagata o loo tuuaia i le
faatupu faalavelave, o loo ia umia se aupega mata'utia, pe o
se tagata ona foi na te ono faia se gaioiga e ono aafia ai le
soifua o le leoleo.
Peitai a tuu mai loa i le faatinoina
e leoleo o latou tiute, o iina o loo manaomia ai e le atunuu
le tuuina atu e leoleo o le malosi atoatoa mo le puipuiga o le
lautele, ae le o le faia i le malosi.
I le faalavelave ua tuuaia ai
le susuga ia Lagai, na saunoa ai Ward, o le mea na tupu, e toalima
leoleo na agai atu i le taavale, ina ua faailoa mai se faalavelave
o loo tupu i le vaega e paka ai taavale a le fale aiga o le McDonald
i Tafuna, ma e taunuu atu leoleo nei e toalima, o loo taatia
se alii i luga o le sima, e ona, sa fasi e se alii leoleo ofu
savili ma se isi tagata na la to'alua.
"Sa tatau lava i leoleo
nei e toalima na o atu i le taavale, ona latou faia se galuega
fesoasoani i le ua mafatia, pe fesili i ai pe manao e ave o ia
i le falemai," o le saunoaga lea a Ward, "peitai e
le o le mea lea sa tupu, ae ua toe faaopoopo atu i ai isi tiga
i lona tino, ina ua fasi e le ua molia."
I faamaumauga a le faamasinoga
o loo taua ai, o Papalii sa ona i le vaega e paka ai taavale
a le McDonald, ma i'u ina faaoolima i ai se alii leoleo o loo
ofu savili, ma e lei leva ae taunuu loa le taavale leoleo o loo
alu atu ai le ua molia ma nisi o leoleo ma ave ai loa o ia i
le po o le aso 1 o Tesema.
Peitai ao alu le taavale leoleo,
sa maitauina le ona tele o Papalii, ma ia lafoina ai ni upu mataga
i alii ma tamaitai leoleo, o lea na faatu ai loa e le ua molia
le taavale, ae taumafai e faafilemu Papalii, peitai sa faa faigata
pea ona usita'i o ia, o lea na po ai loa e le alii leoleo o ia.
Ua poloaina e le faamasinoga
le susuga Lagai ina ia aua nei ona toe soliina se tulafono, ma
ia asiasi i le ofisa faanofo vaavaaia faatasi i le masina, seia
oo atu i le aso 26 o Setema lea ua faamoemoe e toe iloilo ai
lana faanofo vaavaaia.
E tasi le tausaga ua faafalepuipui
ina ai o ia, peitai o le faasalaga o le a faamalumalu, ae faanofo
vaavaaia o ia mo le 2 tausaga, fuafua lea i lona usitaia o poloaiga
uma a le faamasinoga ua tuuina atu ia te ia.
Saunoa Ward, i le avea ai o ia
ma leoleo, e manaomia le faaaogaina o aoaoga ma lona tomai faaleoleo
sa aoaoina ai o ia, e faatinoina ai ona tiute, ina ia tusa ai
ma ala o le tulafono.
Sa faamaualalo foi le susuga
Lagai i le faamasinoga, ona o le solitulafono sa ia faia. O le
susuga i le alii loia ia Douglas Fiaui na tulai mo ia, ae o le
tamaitai loia ia Nicole Castro na tulai mo le malo.
Faafesootai
le tusitala i le imeli ausage@samoanews.com.
© Osini Faleatasi Inc. dba Samoa News reserves
all rights.
|