Ads by Google Ads by Google

Aso mo le Paneta ole Lalolagi - 04:22:2012

I le masina o Mati 21, 1969 na fa’aosofia ai ni lagona o nisi o le a’ai o San Francisco i Amerika ma latou o ane i le isi itu o le ala laupapa tele i lea a’ai ma ua latou fa’atuina ai se Asosi a Tagata ua va’ai toto’a i le afaina o le Si’omaga o le latou a’ai, ua fa’aleagaina i le anoanoa’i o lapisi lafoa’i mai fale gaosi oloa a le latou lava a’ai, ua fa’aleagaina ai le suavai mai vaitafe, sami ae maise o le lau’ele’ele.

O i latou nei na latou mua’i fa’ailoa atu lea afaina i a’ai i finagalo o tagata e to’atele, ona o le fa’alapisi ua afaina ai le si’omaga o lea a’ai matagofie. Ua le gata ai i lea a’ai, ae ua aga’i ina matauina ai e tagata e to’atele o latou fo’i si’omaga ma latou fa’amoni ai i le fanoga a lea kalapu.

Ua matauina e i latou le fa’apogai, ua iloga mai, o le naunau o tagata i le tupe, ua so’ona gaosia oloa e fa’atau atu, ae o latou kasa o’ona e puaina mai ai i fafo i nei gaosiga o oloa, ma toega fo’i o le gaosiga o nei oloa, ua avea lea ma vaila’au o’ona fa’aleagaina ai le si’omaga ma le vanimonimo.

O i latou lava nei na latou fa’atuina lea mau, na o’o loa i le tausaga e 1970, latou fa’aigoaina loa le latou manulauti “Aso o le Lalolagi” ma amata ai loa ona fa’alauiloa ma ua aofia ai nei atunu’u uma o le lalolagi i lea Mau lelei. Peita’i, ua fa’aopoopo i ai nisi sui iloga i lea vaega to’aitiiti sa i ai muamua, ma i ai ma sui o tama a le malo,o ni sui fou mai le vaega o fa’aUpufai o Malo.

Peita’i, i lenei tausaga, e ui ina ua fai se leva talu mai ona amatalia lea mau, ae tele mea lelei ua fa’amalosia ai. Ua va’ai toto’a malo ta’itasi uma o le lalolagi, i ala e mafai ona faia ai le gaosiga o so’o se ituaiga o oloa, ae le fa’ateleina ai le fa’alapisia o so’o se vaega o lena atunu’u.

O le aso 22 Aperila, 2012 na pa’u tonu lea i le aso Sa, peita’i, ua le mafai ona iloga mai se fa’atautaiga o ni galuega fa’amama ona o le aso lea ua tapua’i ai le to’atele o ekalesia i le atunu’u. E leai se mea e sili nai lo le si’itia o sau talosaga i le Atua foafoa na ia fa’atula’ia le lalolagi ma mea o tumu ai, le Vateatea ma mea o tumu ai, ma le sami ma mea o i ai, fa’atasi ai ma puna o vai.

O nisi ua latou tu’ua’ia le tele o fale gaosi oloa mo le anoanoa’i o mea ua fa’aleagaina ai le si’omaga, peita’i, e tofu i tatou ma sao e fa’alegaina ai le si’omaga, pe afai e te tia’i sese fo’i lau lapisi mai lou lava maota i aso ta’itasi.

Ia tamau i lou mafaufau lelei, ia le faia se faiga e ono faaleagaina ai le si’omaga e ala i le ea, palapala ma le sami po’o punavai fo’i. Aua ete fa’aalu le suavai lafoa’i o sai pua’a, ma isi otaota o manu fa’apena, i vaitafe ma vaipuna, ae ia gaosia lelei septic mo le sauvai lafoa’i o aiga ina ia toe fa’afo’i lava le sosia o le eleele i le eleele ma ia toe fa’atumauina ai lona lelei  e pei ona fa’atulaga ai e le Atua Foafoa.

O le to’atele e le o mailoa e i latou i lena vaitau, o lo’o afaina le Lalolagi matagofie na faia e le Atua Foafoa ina ia tatou ola ai, i a tatou aga o lo’o faia, pe ana leai i latou na muaimalae i sailiga o ala e tima’i ai le to’atele ia fa’ataua lea measina a le Atua mo le tagata soifua, semanu e le mafai ona vave toe taumafai le tagata e fa’asa’o lona sasi sa fai.

I le taimi nei, ua matele ina va’aia e i tatou suiga iloga o le tau, ma ua tu’ua’ia pea lava le tele o falegaosi oloa ua latou pua’ina mai i fafo le CO2 po’o le ea ‘kaponitaiotisai’, lea ua atili vevela ai le lalolagi toetoe a mu. O lea lava fo’i le kasa ua fa’amanifinifiina le okesene o lo’o so’imia ai le lalolagi e foliga o sona ‘afu’afu, lea ua sao mai ai ‘ave malolosi o le la i le taimi nei, ua le toe malu ai le lalolagi, ae ua matele ina mama’i ai meaola ona o le a’asa tele o ‘ave o le la.

O isi nei mea, sa le anoanoa e le to’atele o fa’atau’oa, aua ua fa’ateleina a latou tupe maua, ae le ano ai pe le o afaina ea le lalolagi atoa, ona o lou tu’inanau i le oa ia fa’aputu ia tele. Fa’afetai ia i latou na mua i malae, ua latou fa’aoso manatu lelei ma ua afua ai ona lagolagosua le manulauti e le to’atele o le lalolagi, ina ua atagia le afuaga o lenei fa’afitauli ma ua suia ai lagona o le to’atele, ia fa’asaoina le lalolagi mo i tatou ma e fai mai i le lumana’i.

E mautinoa o le suiga va’aia o le tau, ua tatou fa’alogoina ma ua tatou taumafai e ola ai i lenei lalolagi, o le isi lea fa’ailo sili ona amana’ia e tagata e to’atele i le taimi nei. O le tulaga ova o le vevela o le la, ua mautinoa ua o’o mai lona afaina i atumotu o le Pasefika, i Tokelau ma Tuvalu, ua salalau le tala i le lalolagi, e ao i malo tetele o lo’o lava ai le suavai taumafa ona la’u ane i Tokelau e fa’aolaina ai tagata o lea malo, fa’apea fo’i Tuvalu.

O le si’isi’i o le maualuga o le suavai i le sami ua sau fo’i i luma le to’atele o atunu’u ua a’afia ai latou eleele i lea tulaga, ma ua fa’ateleina mafui’e ma ma galulolo ua fa’aletonu ai atunu’u e tele o le lalolagi. O mea uma nei e afua mai ina ua le paleni le natura o mea sa foafoaina e le Atua e tatau ona i ai, ioe i le mafaufau, ua tele suiga ua tatou ola ai nei, sa le tatau ona tatou ola ai, pe ana fa’apea e tatou te fa’asaoina le lalolagi i lona paleni sa foafoaina ai e le Atua.

O le a se vaifofo, ua toe tima’i mai le to’atele o tagata uma o le lalolagi, alolofa toto sau “La’au” i aso ta’itasi, o le a mafaia e lea la’au ona ola ma fa’aaogaina le CO2 lea e toe pua’ina mai ai le Okesene ma o le lava o le okesene o le lelei fo’i lena o le olaola o tatou la’au toto i le fanua.

Va’ai le Uepesite po’o le Upega Tafa’ilagi 350.org, ucsusa.or,climate.org po’o le 350amerikasamoa.blogspot. O nei uepesite uma o le a mafai ona latou fa’ailoa ia te oe afaina eseese o i ai i le si’omaga o latou mafuaga ae maise o se auala e fa’afo’ia ai nei fa’aletonu o le si’omaga

“Ia e faia se galuega lelei, e faaleleia atili ai lou si’omaga, ma ia tumau ai le tatou Lalolagi matagofie!”