Ads by Google Ads by Google

Ave le isi Fatuma’a - Tuli loa ma le galuega

O se tina Niu Ioka na mae’a fa’atagaina le foa’ia o le isi ona fatuma’a e ola ai le tama’ita’i e ona lana kamupani o galue ai, ua fa’ailoa mai ua fa’ate’a ese mai lana galuega, ina ua mae’a tu’uina atu lona fatuma’a e fa’aaoga mo le tama’ita’i pule na ia fa’afaigaluegaina o ia.

O se tala fo’i, o lenei tina sa le fa’aaogaina tonu e le tama’ita’i pule lona fatuma’a, ona e le gatusa ma le tino o le tama’ita’i, peita’i, ua aveina atu mo se isi e tulata ane, ae ua fa’alatalata atili ai le tama’ita’i lea i luga o le lisi o e o le a maua vave so latou fatuma’a e ola ai pe a mae’a o latou taotoga fita nei.

O Debbie Stevens ua atoa le 47 o ona tausaga, ma o se tina ua nofo to’atasi ma si ana fanau e to’alua, ua faila nei e ia lana fa’asea i lona pule tama’ita’i lea sa manatu ina ia avatua le fatuma’a o Debbie e ola ai, ae o lea ua le mafai ona talafeagai lea ta’otoga, ma ua foa’iina atu i se isi ina ia latalata ai lona pule i le numera tasi, mo se tasi e maua vave sona fatuma’a e talafeagai ma lona toto, ma lona tino.

O le tama’ita’i e pule ia Debbie, O Jackie Brucia e 61 ona tausaga, o ia o lo’o ia fa’atautaia se isi Kamupani Fa’atau Ta’avale sili ona tele ma o se vaega o le Pisinisi a le Atlanic Automotive Group, o se kamupani e faitau piliona tupe latou te maua ona o se Kamupani fa’atau ta’avale tetele ia o i ai i Amerika. Na fa’ato’a fa’afaigaluegaina e Brucia le tama’ita’i o Debbie ia Ianuari, 2009, o sona fesoasoani i le galuega.

Ua ia fa’ailoa mai, “Ua te’i lava ua so’ona fai mai mea a le tama’ita’i o Brucia ia te a’u, ae sa le masani ai, e faigata atili pe afai ou te va’ai i le itu, sa mana’omia e ia se fatuma’a, sa ou fai i ai, ou te le talatu’u pe afai o se mea lena ua sili ona ia fia maua i lenei olaga. Ae ou te le o fa’atauina fo’i lo’u fatuma’a, ua na’o na foa’i lava i lo’u agaga mama, e leai ma se tupe po’o se mafuaga lea e fa’afaigaluega ai a’u, e leai lava. Ou te le fia fa’apea, ai o le mea lea na fa’afaigaluega ai ita, o le avatu ai o se fatuma’a mo ia! E silasila mai le Atua i lo’u agaga, e le o se mea lena sa ou manatu e fa’apea se tasi na mafua ai ona saili sa’u galuega, pe fa’atumau ai fo’i se fa’afaigaluega o lo’u tagata vaivai.”

 I lona faigaluega ai muamua i le kamupani lea, sa ia tu’ua i le tausaga e 2010 ina ia toe taliu i Florida. Peita’i, na toe fo’i ane e asiasi i lana tama teine i Niu Ioka ma sa fa’apea loa ona toe asiasi ane i le Kamupani Fa’atau ta’avale lea ma sa ia fa’ato’a iloa ai, o lo’o mana’omia se fatuma’a mo le tama’ita’i o Brucia, le pule lea.

O i’ina loa sa ou fa’aalia i ai, pe afai e i ai se fa’aletonu, ae mana’omia lava se fatuma’a mo ia, na ou ofoina i ai le i si o’u fatuma’a e avatu e ola ai pe afai ae fa’aletonu pea se avanoa e maua ai se tasi e ofoina ane sona fatuma’a mo ia.

Sa na’o na ata lava o Brucia ma fai mai ia te a’u, “Ia e iloa lelei, e te le iloa e i ai se aso ou te toe fesiligia ai lau ofo lena po’o tumau pea mo a’u!” Ina ua toe taliu tumau ane Debbie Stevens e nofo mau i Long Island Niu Ioka, sa ia asia loa Brucia ma fa’afesiligia po’o i ai se avanoa i lana Kamupani Ta’avale se’i faigaluega ai, e le’i pe na’o se vaiaso lava, ae talia mai loa e Brucia lea fa’atalosaga.

 

Ia Ianuari 2011 na amata faigaluega ai loa Debbie i le Kamupani Ta’avale lea, ae vala’au ane loa Brucia ia te ia e fia talanoa i lona Ofisa. O le taimi lea na fia iloa ai e ia, pe mata o tumau pea lana ofo i lona fatuma’a mo ia.

“Ou te le’i tali ‘ese lava i le fanoga sa ou talia muamua, ma ou fai atu i ai, Ioe o afea e te mana’omia ai e fa’ataunu’u?” E le’i faia ina ia maua ai sa’u si’itaga, pe ou te fa’asusususu ai fua i le pule i la’u galuega, ae o le agaga foa’i ma le loto sa i ai.

“E mautinoa, sa ou le mana’o ina ia maumau atu lona ola, ae ou te le’i fesoasoani ia te ia!” Sa faia su’esu’ega fa’apitoa i lo’u tino ma lo’u soifua maloloina, ma ina ua mae’a nei su’esu’ega e tele sa faia, ua iloga ane, e le mafai ona avea lo’u fatuma’a mo Brucia, ae fetaui lelei lo’u fatuma’a ma le isi ma’i sa fa’atalitalia fo’i sona fatuma’a e fa’ataunu’u ai lona ta’otoga. I le faia o lea tulaga, ua fa’alatalata atili ane ai le sui sa ia ofoina atu le fatuma’a i luga i le lisi fa’atalitali.

Na faia lava le taotoga o Stevens e ‘ave’esea ai le isi ona fatuma’a mo le ua atofaina i ai ia Aokuso 10, 2011. Peita’i, sa i ai se sasi i le taotoga, ma ua a’afia ai le uaua malosi o le vae o Debbie i le taotoga na faia, ma ua afua ai ona tele fa’afitauli i le soifuaga o Debbie ona o lea sasi a foma’i.

E fa vaiaso o malolo ai pea Debbie Stevens ona o lea fa’aletonu mai lana galuega, ma o le amataga la lea ona fa’aosofia mai o fa’aletonu e fa’asagatau mai ia te ia, i totonu o le latou Kamupani. “Ua matele ina e’e mai ia te a’u, ua fa’atonu fa’asaua mai lo’u tagata faigaluega, ma ua i ai taimi ua lafo mai lava ma le fa’aupuga, ou te fa’alata!”

“Ua i’u ina o’o i nisi taimi e so’ona fai ai mea a lenei tama’ita’i pule ia te a’u, ua na’o lo’u nofo lava ma tagi!”O i’ina loa na ou manatu ai loa ua tatau ona fa’ao’o i le tulafono nei ituaiga o faiga e le talafeagai ma le alofa ua molitino atu i le mea sa sili ona ia mo’omia, o se fatuma’a. E tusa ma le tasi le vaiaso e va ai lea mea, ae fa’ato’a tuli loa o ia mai lana galuega, ina ua mae’a fo’i ona tu’uina o ia i le isi tulafono

Na fa’ao’o le tusi mai loia a Debbie i le Kamupani Fa’atau Ta’avale, ae ua matua le fia talanoa mai le tama’ita’i Pule Sili o Brucia, peita’i, sa iloa e le nusipepa ma le au fa’asalalau a le BBC ma ua latou fesiligia ai ma le tama’ita’iua fa’asaga i ai le tagi, ae le mafai lava ona faia mai sana tala.

I le tala mai a le ali’i loia mo Debbie, Leonard Leed, ua ia fa’ailoa mai ai, o le a faila e ia i le fa’amasinoga se tagi e fa’asaga ia Brucia ona o lo latou so’ona fa’asaua i lagona o se tasi e agaalofa uiga ese e pei o Debbie. O se taui o le a faitau miliona fo’i mo Debbie ona o lo latou agaleaga i lenei tina.

O lea aofaiga o le seleni e afua mai totogi o Debbie e le’i totogia mai e le Kamupani, o lona afaina i le tino ma le mafaufau ona o nei faiga leaga sa so’ona o’otia ai lona tagata. Peita’i, ia Debbie lava latou, ua ia fa’aalia mai, “Ou te le o fia faia se tala, O a’u ia po’o le a lava ana mea ua fai mai, ae fa’amama lava lo’u loto ma ou va’ai i le lumana’i, taumafai e ola ai i lo’u olaga fou ua i ai nei.”

saunia: Leua Aiono Frost