Ads by Google Ads by Google

E FA’ATAGA ONA FEOA’I PAGOTA MA NI CELL PHONE?

TATAGI TELEFONI A LE PAGOTA I LUMA O LE ALI’I FA’AMASINO

 

O le telefoni sa i totonu o le taga o le ofu a se alii sa taofia faapagota e leoleo, lea na tatagi a’o faia lana iloiloga i luma o le alii faamasino ia Elvis P. Patea i le taeao o le aso Tofi na te’a nei, na mafua ai ona fesili le alii faamasino i le alii leoleo o le falepuipui na o atu ma le pagota, pe faataga ona feavea’i e i latou o lo o taofia i le toese ni telefoni, ae na tali le alii leoleo, “e leai.”

 

O le alii o Sinipati Tuufaanatu, na taofia e leoleo i le aso Lua na te’a nei ona o tuuaiga i le faatupu vevesi, ma tulai ai loa i luma o le faamasinoga faaitumalo i le aso Lulu na soso’o ai, peitai sa toe poloaina o ia e le alii faamasino ina ia toe tula’i i luma o le faamasinoga i le aso e soso’o ai, o le aso Tofi lea.

 

O le te’a laititi o le itula e 8:30 i le taeao o le aso Tofi na toe valaau ai le mataupu a Sinapati i luma o le alii faamasino o Patea.

 

E lei atoa se minute talu ona amata le iloiloga a Sinapati ae faalogoina loa le tatagi o le telefoni.

 

Na tula’i le Masela a le faamasinoga e su’e poo ai lea ua tatagi lana telefoni, ona e i ai le tulafono a le faamasinoga e faasa ai ona tatagi se telefoni ao faia ni iloiloga, ma afai ae tatagi se telefoni, e totogi le $25 ona faatoa mafai lea ona toe faafoi atu lau telefoni.

 

Ina ua tatagi faalua le telefoni, na manino ai loa o le telefonni a le alii o Sinapati. Sa vaaia le tago o Sinapati i lana taga ma aumai i fafo le telefoni ma tuu atu i lana loia fautua o lo o nofo i ona tafatafa, ma tuu atu ai loa e le loia le telefoni i le alii Masela.

 

Ina ua maea le iloiloga, ma ua faia le faaiuga e taofia pea Sinapati i le falepuipui, sei vagana ua totogi le $500 ona faatoa mafai lea ona tatala o ia, na maua ai loa le avanoa e fesiligia ai e le alii faamasino le leoleo o le falepuipui na o atu ma Sinapati, pe faataga ona feoa’i i latou o lo o taofia i le toese ma telefoni feavea’i, ae na tali le alii Ofisa e leai.

 

Na faalogo le Samoa News o fesili le alii leoleo ia Sinapati pe aisea na ia pepeloina ai o ia e faatatau i le telefoni, ae na tali le ua molia fai mai, o le telefoni a lona uncle sa ia faaaoga e vili ai lona to’alua.

 

Ina ua fesiligia e le Samoa News le Komesina o Leoleo pe faataga tagata o lo o taofia ona feoa’i ma ni telefoni, na tali le susuga William Haleck fai mai, “e leai.”

 

“Soo se tagata e taofia i lalo o le vaaiga a leoleo, e le faataga ona ia umia se telefoni,” o le saunoaga lea a Haleck.

 

“Soo se pagota e auina atu i le fale faamasino mo a latou iloiloga, e tatau ona su’e e leoleo o latou tino ao le’i ulufale i le potu faamasino, e tatau foi ona toe su’e pe afai e maea a latou iloiloga, ina ia mautinoa e leai ni mea o latou tauaveina,” o le sauoaga lea a le komesina.

 

Pe tusa ma le 20 minute talu ona maea le talanoaga muamua ma le alii komesina, ae toe valaau mai o ia i le Samoa News ma faailoa mai e faapea, ua uma ona ia fesiligia le Pule o le Falepuipui e faatatau i le mataupu lea, ma ua faailoa atu e le Pule o le Falepuipui ia te ia e faapea, o le telefoni sa maua i le taga a le alii pagota, o le telefoni a lona uncle sa ia faaaoga e vili ai lona toalua, mo se tupe e tatala ai o ia i tua, ae ai ua galo ai lava le telefoni i le taga a le pagota le telefoni, ma i’u ina tatagi ai i luma o le alii faamasino.

 

Na taua e Haleck e faapea, sa le tatau lava ona maua se avanoa o le alii pagota na te faaaogaina ai le telefoni a lona uncle.

 

“Soo se tagata lava e taofia i lalo o le vaavaaiga a le malo, e le faatagaina ona talanoa i se telefoni pe talanoa foi i se tasi o lona aiga, sei vagana ua maea lana mataupu, ae o le mataupu e pei ona tulai mai, e foliga mai sa iloa lava e le leoleo le telefoni na alu atu ma le pagota ae leai sana gaioiga na faia i ai,” o le saunoaga lea a le komesina o leoleo.