Ads by Google Ads by Google

Fagogo: O le Sone Vevela

Vaega: 67

 

Taeao manuia i le maleifua mai o le atunu’u i fanuga lelei o lenei aso fou, malo le soifua, malo fo’i le onosa’i i faiva ma tiute o lo’o feagai ai i lenei aso. Ae alo maia, o le a toe fa’aauau atu la tatou tala e pei ona masani ai, o le Sone Vevela.

 

I tausaga ta’itasi, e sefuluono afe (16,000) manuki e auina atu i totonu o le Iunaite Setete mai itu uma o le lalolagi e fai ai su’esu’ega a ali’i ma tama’ita’i foma’i. O manuki nei, e tu’u ‘ese ina ia faia muamua su’esu’ega pe o maua i ni fa’ama’i pe leai, ona fa’atoa ave lea i nisi nofoga i totonu o le Iunaite Setete e fa’aaoga mo sa’ili’iliga a foma’i.

 

O totonu la o le nofoaga lea e taunu’u muamua ane i ai manuki ma so’o se manu lava e su’esu’e ai, o lo’o va’aia e le ali’i foma’i manu e igoa ia Dan Dalgard. O ia e vala’au i ai le au faigaluega i taimi uma lava e taunu’u ane ai so’o se ‘oka fou o manuki ma so’o se manu i totonu o le Reston Primate Quarantine Unit.

 

E vala’au fo’i le ali’i lenei pe afai e va’ai atu le aufaigaluega ua mama’i manuki ma manu, ona alu ane lea e fai i ai ana su’esu’ega. E foma’i manu fo’i i se tasi o vaega o le kamupani o le Coring lea e fa’aigoa o le Hazleton Washington. O le kamupani lenei e i ai lona nofoga fa’apitoa po’o ona ofisa tutotonu i totonu o Leesburg Pike i Vienna, Virginia, e le mamao tele mai le Reston Quarantine. O lona uiga e faigofie i le ali’i foma’i manu o Dan Dalgard, ona fealua’i i le va lea, ona e felata’i.

 

Fai mai o le foma’i manu o Dan Dalgard, e fiafia tele i galuega e fa’aaoga ai ona lima, e pei la o le isi lea ana mea fiafia, o le fa’aolaina o uati pe a leaga.  O se tasi lea o ana galuega e tua i ai lenei ali’i, e maua ai le filemu o lona loto ae maise o le malosi o lona mafaufau. I taimi paninoa o lona olaga, e o’o ai ona manatu ua fia alu ‘ese mai lana galuega lea o lo’o i ai nei, o le va’aiga lea o manu ae tu’u atoa atu lona taimi e galue i le fa’aolaina o uati ua pe pe.

 

I le Aso Lulu, Oketopa Aso 4, i le tausaga 1989 na taunu’u ai le ‘oka e selau manuki i totonu o le nofoaga a le Kamupani a le Hazleton Reserch Products, mai Filipaina. O le mea na au mai ai manuki nei o se tasi o fa’atoaga e igoa o le Ferlite Farms e le mamao tele mai le a’ai o Manila. O manuki nei e ‘ese’ese vaomatua na au mai ai, ae o le tele o manuki na au mai mai Mindanao.

 

Ua tu’u fa’atasi ma fifiloi manuki aua ua tu’u i totonu o pa ma o le tele o manuki nei e tau’ai misa ma o’o ai lava ina tafe ifo le toto i nisi o manuki nei. Na ave muamua lava i Amsterdam i luga o le va’alele e ave ai uta tetele. Mai Amsterdam na ave ai loa lea i New York. Na taunu’u i le malae va’alele o Ioane Keneti po’o le  John F. Kennedy (JFK) ma na ave ai loa i luga o loli tetele i le itu i matu o Amerika i le nofoaga i Reston ma tu’u ai loa.

 

(Amuia nei manuki, ua o’o i Amsterdam toe o’o i le malae va’alele o Ioane Keneti, ua ta fia alu fo’i i ai, ia a’o tatou, ia tatou onosa’i ia, o lo’o manaia lava nai a tatou va’alele, a alu alu, tutu i luga o le ea, fa’apea atu le ave va’alele i le isi ave va’alele, “Se i au mai a lau afi se i fa’aola ai la’u sikaleti.”)

 

E faia pea …

 

Fa’aliliu: Akenese Ilalio Zec