Ads by Google Ads by Google

E 263 pasese o le malaga lona 4 toe taliu mai Hawaii- le malaga aupito toatele lea


[ata: foa'i]

PAGO PAGO — I se pepa o fa’amatalaga mai le COVID-19 Task Force a Amerika Samoa ua fa’ailoa ai e 263 tagata ua faamautu i le malaga 4 toe taliu mai o loo fuafua e tuua Honolulu i le Aso Lulu, Me 12, 2021. O le au malaga aupito toatele lea o le toe taliu mai talu ona amata le porokalama i nai masina ua tuana’i.  O le aofa’i na amata ai – i latou na amata i le kuarenitini – e 275.  Aepeita’i, ona o nisi na maua i suega ua KOVITI faatasi ma fesoota’iga lalata ma nisi sa maua, ma nisi foi faaletonu e le fesoota’i ma le KOVITI, na pa’ū ifo ai le aofa’i o tagata malaga i le 263. E 105 tagata na tuipuipuia atoatoa ae le’i faatagaina i le nofoaga o le kuarenitini, ma e 43 nisi na tuipuipuia ia Me 6 i Hawaii. O le a ofoina atu le tuipuipui i le au malaga i le i’uga o le kuarenitini 7-aso i Amerika Samoa. 

 

O le a kuarenitini le au malaga i le Faletalimalo Tradewinds ma le nofoaga i Fatuoaiga, sa toe faafouina e tali ai tagata o le porokalama toe taliu mai. O le faasoaina foi o nofoa i le vaalele ua faia ia alaala vaega ma’oti o le kuarenitini i o latou itu faapitoa – pito i luma o le vaalele mo le tasi vaega ma nofoa i le pito i tua mo le isi vaega – e faafaigofie ai ona talaaao i fafo mai le vaalele i le malaevaalele i Tafuna.  E oo foi i a latou ato ma uta, e faailogaina i lanu patino mo nofoaga o le kuarenitini. 

 

I le fono mulimuli a le Faatino Galuega o le KOVITI, na ta’ua ai e le Ta’ita’ifono, Afioga Kovana Lutena Talauega Eleasalo Ale i sui o matagaluega e gafa ma tapenaga ma le aumai mai le vaalele ia faamautinoa pe a taunuu le vaalele, ia le toe taofia pasese. Na ia saunoa faamamafa i le tausia o le saogalemu i le si’omaga na amata mai le kuarenitini i Hawaii. E le tatau ona toe iai se tuai o le aumai mai le vaalele aga’i i totonu o potu o le faletalimalo.   “O le manatu atoa ia tatou faaauau le li’o mai Hawaii ma ou te le fia vaai i ni faalavelave i le li’o lea,” o le saunoaga lea a Talauega. E fautuaina ai le Ofisa o Femalagaa’iga ma le Soifua Maloloina e siaki pepa malaga ma isi pepa o le soifua maloloina i se isi aso o le kuarenitini o le au malga, ae le o le aso e taunuu mai ai. 

 

“Ou te mana’o ia sau le tagata mai le vaalele, oso i le pasi, ma sosoo loa ma le ulu i lona potu i le faletalimalo,” o lana saunoaga lea i le fono. “Na’o faamaoniga o lona igoa ma le potu tou te faia ma fai i ai, ‘Toe fetaui i se taimi.’ Manatua o lea lava e kuarenitini ma e faatapulaa le fesoota’iga i se tulaga e mafai ona oo i ai.” 

 

Malaga Toe Taliu - Toga ma Samoa 

 

O le Aso Lulu, Me 5, 2021 o se aso faapitoa mo tagata malaga ma o latou aiga na moomoo e toe faatasi talu ona valavala i le tapunia o tua’oi i poloa’iga a le Teritori nei ma le Malo o Toga.  E toatolu tagata o le Malo o Toga na tuua le territory i le taeao o le Aso Lulu ina ua silia i le tausaga o faaopeopea i Amerika Samoa. O le afiafi foi lea na toe taliu mai ai le to’afitu o tagata o lo tatou teritori sa faapena foi ona faatalitali i le Malo o Toga.

 

Na saunoa le Taitaifono o le Faatino Galuega o le KOVITI Afioga Talauega Eleasalo Ale ina ua taunuu manuia le faamoemoe, ”Ua ma’ua lagona le loto faafetai ma le Afioga i le Kovana Lemanu ia i latou sa fai sao i le fuafuaga ma faatino le aumaia o i latou ia faatasi ma o latou aiga i le teritori.  E sili ona faafetai ia i latou na malaga ona o le onosa’i i nei masina e tele.” 

 

Sa mana’omia se malaga faaopoopo mai Samoa e faapuupuu ai le taimi e toe utu ai le vaalele ia tusa ma le faatulagaga. Na maua ai foi le avanoa e toe taliu mai ai nisi e to’avalu o Amerika Samoa mai Apia.  

 

Na saunoa le Taitaifono, “E le atoa la ma faafetai ma Kovana Lemanu pe a le faailoa le Susuga Leonaitasi Kuluni o le Ofisa o le Va i Fafo o le Malo Toga sa ia faafoeina lenei talosaga mai le amataga i le i’uga. E faapena foi le Susuga Rev. Tevita Paea o Vaitogi i le tula’i malosi mo lenei taumafaiga.”