O SINA MA LE FA’ATA TAULAITU

Na iai se tamaitai talavou e igoa ia Sina ma o se afafine o se tamaloa mau’oa ma le loto alofa.  O taimi uma lava e sau ai se aisiga i lenei tamaloa, e le tuli’esea lava e le tamaloa.  O ai lava e fia ‘ai pe fia inu e afea le maota o lenei tamaloa mau’oa, e le gata i le fafagaina ma faainuina, ae toe tapena lelei se taumafataga e toe fo’i ma lea tagata.

Ae o le Penina tau tele a lenei tamaloa, o si ona afafine o Sina. Ma o se aiga fiafia ma le fealofani, le aiga a lenei tamaloa mau’oa ma lona to’alua ma le teine o Sina.

I se tasi o aso, a’o laititi pea Sina, na maliu ai si ona tina.  Sa ufitia lenei aiga i se ao pouliuli mo se taimi umi lava.

Ae na o’o mai le aso, na tonu ai i le tamaloa mau’oa, ua manaomia ona toe seisi ona toalua e fesoasoani i le tausiga o Sina.  Ua faapea loa ona fai le filifiliga a le alii mau’oa ma toe fai loa sona toalua lona lua.

E le’i umi ona fai le faaipoipoga a le alii mau’oa ma lona to’alua lona lua, ae ona fa’ailoa atu i si ona afafine o Sina, le mea o lo o mamafa i lona loto.  Ona ua gasegase o ia, ma e le toe umi aso o lona ola.  Sa faamatala e le alii mau’oa i si ona afafine, sa fetu’u o ia e se tasi o ona fili ma ua ma’i ai, ma e leai se fofo o lona gasegase.

Na amata mai i lena aso, e le i toe va’aia lava ni laufofoga fiafia o le tamaitai o Sina.  Ma ua fai ma ia le masani o le alu i lalo o la’au ma nofonofo ai, ma faasoa atu ona lagona faanoanoa i la’au.

O le tina fou a si teine o Sina, e fai o lona le alofa ia Sina, ae ita tele le loto ae va’ai atu o fa’aali le alofa o le alii mau’oa i si ona afafine.  E o’o lava i le tago atu o le tamaloa e milimili le ulu o si ona afafine, pe fusi mai, pe ave foi ia Sina ni meaalofa taugata, e u ai nifo o lenei mafine i lona ita.

Ae ua matua’i atamai lava lenei fafine leaga e nana lona ita, ae fa’aali ona uiga fiafia ma le alofa pepelo ia Sina. 

O se tasi aso sa tutu faatasi ai le alii mau’oa ma lona toalua fou ma si teine o Sina i tafatafa o se tanoa vai, na lagona ai e le tamaloa le tiga o lona fatafata ma taumafai ai e saofa’i i lalo.  Ina ua tau te’a ese atu le tiga, sa ta’ita’i loa e Sina i totonu o le fale ma fa’ata’oto i lona moega ma fa’aafu i se ‘ie mafanafana.  Na faapea atu le tamaloa i lona afafine, “Tu’u a’u se’i fai sa’u malologa ae alu i lou tina.”

Na toe fo’i atu Sina i le mea o tu mai ai le to’alua fou a lona tama ae na fa’ate’ia Sina ina ua vaai atu o lo o talatalanoa le fafine i se lulu tele lava, o lo o tu mai i luga o se la’au.

Ina ua iloa mai e le fafine le savali atu a Sina, sa ia a’apa atu ma toso mai le lima a Sina ma toso atu o ia i tafatafa o le fa’amalama o le potu lea o lo o ta’oto’oto mai ai le tamaloa.  Na vaaia le fiafia o le tamaloa, i lona vaai mai i fafo, i le u’ulima atu a lona afafine ma lona to’alua fou.

Ae sa le i lagona mai e le tamaloa le tala a le fafine ua fai ia Sina, “Tu ai iina se’i vaai mai lou tama ia ta’ua.  E faapea ai out e alofa ia te oe.  Ae o le tala moni, o a’u, ou te matua’i inoino lava ia te oe.”

Sa tepa atu Sina i foliga o le fafine, e ui o lo o ata mai, ae o upu o lo o sau mai fafo o ona gutu, na matua’i tuia ai le loto a Sina.  Ae o le taimi foi lena na tagi ai ma le lulu lea na tu i luga o le la’au, ma i le faalogo a Sina, o la e fai mai foi le lulu, “Inoino! Inoino!”

Ina ua iloa atu e le fafine ua moeiini mata o le tamaloa ua moe, sa ia liliu atu loa ia Sina ma faapea atu, “Vaai, e le toe umi le ola o lou tama.  Ma ou te faatalitali lava i le aso e oti ai, aua e oti loa, o mea uma lava ia, o fanua, o le fale, ma ana ‘oa, out e pule ai.”

Oka le faalogo atu a Sina i lona fatu, pei a pa’u ‘ese atu.  Na taumafai Sina e toso mai lona lima se’i tamo’e atu e opo mai si ona tama, ae ua mau ai maiu’u a le fafine leaga lenei, ae o lo o musumusu atu.  “Aua ne’i e pisa aua o le aso lava e te ta’uina ai i seisi ia la’u tama, o le aso lava lena e oti ai ma lou tama.”

O se tasi aso, a’o tutu ia Sina latalata i le togavao, sa ia vaaia ai se manu o lele atu ma se mea o u’u i lona gutu ma sa taia lea mea i le la ma sesega ai mata o Sina.  A’o tu lava Sina ma mata’i le mea o lele aga’i atu ai le manu, ae o le taimi lea o lo o mata’i mai ai o ia e se alii talavou, e masani ona aumai ana ‘oti i luga o mauga i tafatafa o le fale a le aiga o Sina.  Ma e fiafia lava lenei alii i le fealua’i atu ma le toe sau a le teine o Sina, ae o le matamuli o lenei alii talavou, e le taitai lava fai se tala ia Sina.

O le igoa o lenei alii o Fa’afetai.  Na iloa atu e le alii o Faafetai le mata’i e Sina o le manu lea o lo o lele atu ma le mea lea o lo o u i lona gutu ma mulimuli ai loa po o fea e tu ai le manu.  Ma na iloa mamao atu lava e Fa’afetai le pa’u ese o le mea lea sa alu atu ma le manulele, ma ta’atia i tafatafa o se vaitafe.

Ua tamo’e atu nei Fa’afetai ma piki mai luga le mea lea, ma ia iloa ai, o se fa’ata u’u lima.  Na faapea loa ona tamo’e faatopetope mai Fa’afetai i lea mea lea sa tu ai Sina, ma tu’u iai i le teine le fa’ata.  Ae o le taimi lea o lo o iai faatasi Fa’afetai ma se tama matua, o lo o leoleo a la ‘oti, ma sa ia fa’ailoa mai ia Sina ma Fa’afetai, o le fa’ata lenei, o se meatotino a se tagata ta’uta’ua, ua leva na maliu.

Ma sa faamatala e le tamaloa, o le fa’ata e taulaitu, ma o so’o se tasi e tilotilo i lona ata i le fa’ata lea, e fa’aali mai e le fa’ata ona foliga, e pei ona vaaia e isi tagata.  Ae e mafai e le tagata e ana le fa’ata ona iloa ai le agaga moni a isi tagata.  O lona uiga, afai e tilotilo se tagata o lona agaga e ma’a’a pei o se ma’a, o le a fa’aali mai e le fa’ata ia le ata o se ma’a.

Na maofa le tamaitai o Sina i lenei fa’ata ua ia u’uina i lona lima.  Sa tago atu Sina ma tu’u atu le fa’ata i luma o foliga o le tamaloa lea sa fa’amatalaina atu le tala ia te ia, ma ia ona iloa atu ai, foliga o se tagata loto alofa ma le agamalu.  Ina ua tu’u atu e Sina le fa’ata i luma o le alii talavou o Fa’afetai, sa ia vaaia se foliga o se tagata talavou e fiafia e su’esu’e, lotomalu ma le malosi.

Ua toe fo’i nei Sina ma le fa’ata taulaitu i le latou fale, ma lona manatu, atonu e mafai ona fa’aali mai e le fa’ata le gasegase lea o lo o mafatia ai lona tama.  Ua la taunu’u i le fale, ona ave lea e Sina ia Fa’afetai e feiloai i lona tama.  Na va’aia e le tamaloa mau’oa le fiafia o foliga a si ona afafine ma ia faatonuina ai ana auauna, e tausi faalelei ia le uo fou a si ona afafine, le alii o Faafetai.

Ua faatopetope atu auauna a le tamaloa mau’oa e aumai se mea’ai mo Fa’afetai ma na a’ai ma talatalanoa fiafia le tamaloa ma si ona afafine, ma le alii o Faafetai.  Ae savali atu loa le to’alua fou a le tamaloa, ma ona mat aua a’asa i le ita i lona va’ai atu i le a’ai ma talanoa fiafia mai a le to’atolu lea.

Ua fa’aali atu nei e Sina lana fa’ata lea na maua mai e Fa’afetai ae e la te le i faamatalaina i le tamaloa mau’oa, o le fa’ata e faataulaitu po o le mea e mafai ona fa’aali mai e le fa’ata.

Ina ua tu’u atu e Sina ia le fa’ata i luma o foliga o si ona tama, e tilotilo ai, sa va’aia e Sina ia se foliga lototele ma le alofa.

Ae o le taimi lena, ua savali mai ai le tina fou a Sina ma tilotilo foi o ia i totonu o le fa’ata.  Na toeititi lava oso si teine o Sina i fafo o le faamalama ina ua ia vaaia foliga moni a le fafine i le fa’ata.  O ona foliga moni, o foliga o se lane lapo’a lava, ae tautau i ona tau’au ni gata papa’e se lua.  O iina na mautinoa ai e Sina, o lona tina fou, o se fa’ataulaitu moni lava.

O le taimi lea, na geno atu ai le alii mau’oa ia Fa’afetai e sau se’i faanofo atu o ia i luga.  Ina ua saofa’i mai le tamaloa, na faapea atu loa ia Fa’afetai e ta’ita’i atu o ia i fafo i le mea o iai le togala’au se’i fa’asavili ai.  Ua agai atu nei le to’atolu lenei i fafo ma faasa’o ifo le alii mau’oa i se nofoa.

A’o tu le teine o Sina i tafatafa o lona tama, na oso mai se lagona ia te ia, e si’i i luga se ma’a tele o lo o ta’atia i luga o le mutia, latalata i le mea o nofo ai le tamaloa.

Ua fai atu loa Sina ia Fa’afetai, Se’i e tago lava e fuli ese atu le ma’a lena.”  Na matua’i fa’ate’ia lava ia Sina ina ua fuli ese atu e Faafetai le ma’a, ae o latou va’aia ai se lane lapo’a lava, e lua ona ulu.

Ua valaau atu le alii mau’oa i si ona afafine, “Faga le lane lena, faga ia pe!”

Na ona a’apa atu lava o Sina i le fana a u a lona tama sa i tu i autafa o se la’au i totonu o le fa’ato’aga, ma ta’i agai i le lane ma fa’alele atu loa le a u ma’ai ma tau lelei lava i le fatafata o le lane.  Ae o le taimi lea i le vavave o le gaioi a Fa’afetai, ua fa’ameme’i foi ma lana a u, ma soso’o atu a u e lua i gata e lua sa i le ua o le lane.  Ma mamate uma ai le lane, ma gata e lua.

Na fa’afuase’i ona malamalama atoa le togavao i le mea o nofo ai le alii mau’oa ma na va’aia e Sina le tu malosi mai i luga o lona tama ma savali atu ia la’ua ma Fa’afetai, ma opo mai la’ua, ona ua toe maua lona malosi.  O se taimi mulimuli ane, na iloa ai e le tamaloa mau’oa, o lona to’alua lona lua o se faataulaitu ma o ia lena o le lane lapo’a lea sa o latou faaumatiaina.

[IA MANUIA TOE FUAFUAGA O LENEI VAIASO]