PASEFIKA

Sa fa’aalia e le afioga i le Akiepikopo Mosese Vitolio Tui i le Samoa Observer e faapea, ua tolu nei aso Sa talu ona faamaloloina se Patele ma se Tiakono i Samoa, a’o faataunu’uina se su’esu’ega ina ia sailia ai pe iai ni faamaoniga e lagolago ai tu’uaiga ua faia faasaga ia i la’ua.  E le gata i lea, o le fa’aitiitia o le toe tupu o nei ituaiga faafitauli i le lumanai.

O lo’o ua molia lenei patele ma tiakono i lo la a’afia i fualaau faasaina, ma o lea ua faamaloloina ai i la’ua mai i o la tiute i totonu o le Ekalesia Katoliko i Samoa a’o faataunu’uina se suesuega faalotoifale.

Na ta’ua foi e le afioga i le Akiepikopo, afai ae faamaonia i nei suesuega e la te le’i faia se tulaga e pei ona tu’ua’ia ai i la’ua, o le a mafai ona toe fa’afo’i i la’ua i o la tofiga sa iai i totonu o le ekalesia.

Ae afai, e fa’amaonia i su’esu’ega a le ekalesia, e moni nei tu’uaiga, na saunoa le afioga i le Akiepikopo, o le a faia loa tulaga e tatau ai.

Ua mae’a ona fa’amaonia mai e le Ofisa a Leoleo lo latou mauaina o se ripoti o lo’o tu’ua’ia ai nei taitai o le ekalesia, i mataupu e a’afia ai fualaau faasaina.

O nei tu’ua’iaga sa tula’i mai ia Iulai, ina ua molia se tamaititi a’oga i lona umia o se vaega o fualaau faasaina – Aisa – i totonu o le aoga.

O lenei mataupu i le fa’aaogaina ma le fa’atauina atu o vaega o fualaau faasaina, ua avea ma se atugaluga i totonu o motu o le Pasefika.

Lea na saunoa ai le taitai o le Itu Agai a Samoa, le afioga Tuilaepa Sa’ilele Malielegaoi, e tatau ona ta’imua le Malo i le fofoina o lenei faafitauli ua sasao i totonu o le atunu’u.  Sa ia ta’ua ai le va’ava’aia e leoleo o fale o lo’o faatauina ai vailaau, aua o le Aisa e gaosi mai i le fualaau o le ‘Paracetamol’.

Ua fautuaina foi e le Minisita o Tina ma Fanau a le malo o Fiti, ia le toe fa’amalosia o le faasalaga i le oti, mo i latou o lo’o fiafia e faatau atu ia vaega tetele o fualaau faasaina.  O se manatu na tele ni manatu ‘ese’ese sa fa’aleoina mai e le mamalu lautele.

I le iva aso se’ia o’o mai ia Aukuso 17, e to’a 17 i latou na lokaina e leoleo i Tonga ona o moliaga i lo latou la’uina mai i totonu o le motu ia le vaega o fualaau faasina, o le Aisa.  Ma sa ta’ua i le Matagi Tonga nisi o moliaga ua fa’asaga ia i latou nei, e aofia ai le fuafua e faatauina atu ma le tufatufaina o nei fualaau faasaina.

E fa ni osofaiga sa faia e leoleo a le malo o Tonga, na aofia ai le aso 9, 13, 14 ma le aso 17 o Aukuso ma o le aofaiga o fualaau faasaina sa o latou aoina, e 6.1 kilokalama ma o lo’o iai se talitonuga, o nei fualaau faasaina, sa la’uina mai i le Iunaite Setete.

Sa ta’ua ai foi i le ripoti a lea vaega fa’asalalau le molia ai o se tagata faigaluega i le Ofisa o Tiute, o se leoleo o falepuipui, o se pagota, o ni tagata se to’alua e auai i le faalapotopotoga (gang) e ta’ua o le Comanchero faapea ma se alii faipisinisi, i lenei mataupu.

Ua fa’ailoa mai foi le lokaina e leoleo Niu Sila ia lenei faalapotopotoga (gang) atoa, o le Comanchero, i totonu o Christchurch, ina ua maua ai e leoleo i sa latou osofaiga, ia fualaau faasaina, a’upega, pulufana, o se vaegatupe e $250,000 tupe Niu Sila, taavale 11 ma ni fanua i Aukilani. 

O le amataga foi o lenei vaiaso, sa pu’eina ai e leoleo i Niu Sila se alii Kanata e 27 tausaga le matua, ina ua taumafai e ulufale atu i Niu Sila ma ave atu faanana se vaega o fualaau faasina, o le Aisa, i totonu o lana atopa’u.