Ads by Google Ads by Google

Falepuipui Wayne Smith mo le 15 tausaga i le toese


[ata: SN]
ausage@samoanews.com

E  15 tausaga lea ua fa’asala ai e le Fa’amasinoga Maualuga ia le susuga a Wayne Otto Smith e taofia ai i le falepuipui i Tafuna, ina ua fa’amaonia e le fa’amasinoga moliaga mamafa e 3 o le fai’aiga ma se tama’ita’i e aiga i ai.

 

O le fa’asalaga a Smith na tuuina mai lea e le afioga i le Fa’amasino Sili, Michael Kruse, fa’apea ai ma ana Fa’amasino Lagolago, afioga Fa’amausili Pomele ma Muasau T. Tofili.

 

O le tama’ita’i loia sili lagolago ia Christy Dunn na tula’i mo le malo, ae o le ali’i loia tua ia Richard deSaulles na tula’i mo Smith, lea na taofia mai lava i le masina o Iulai o le tausaga na te’a nei ina ua pu’e fa’apagota o ia e Leoleo ma molia e le malo.

 

E 17 moliaga na ulua’i tu’uaia ai e le malo ia Smith, o ia moliaga e aofia ai moliaga e 3 o le fai’aiga fa’amalosi; 2 moliaga o le faia o uiga fa’asotoma; 6 moliaga o le tagofia o itutinosa o se tama’ita’i i le tulaga muamua; 3 moliaga o le fai’aiga ma se tagata e aiga i ai, o moliaga mamafa uma ia. Fa’atasi ai ma moliaga mama e 2 o lona faia lea o ni gaioiga e lepeti ai le ola maloloina o fanau laiti.

 

Ae i lalo o se maliliega na sainia e le ua molia ma talia e le fa’amasinoga maualuga, na tali ioe ai Smith i moliaga e 3 o le fai’aiga ma se tama’ita’i e aiga i ai.

 

A o le i tuuina atu le fa’asalaga a le fa’amasinoga, na maua le avanoa e fa’atoese ai le ua molia e tusa ai o lana solitulafono, atoa ai ma lana talosaga sa tuuina atu mo se fa’asalaga mama mo ia.

 

E silia i le 10 minute na fa’aalu e Smith e fa’aleo ai lana fa’atoesega, e ala i lona faitauina o se tusitusiga sa tusia i se pepa.

 

Na fa’ailoa e Smith i le fa’amasinoga lona ma’asi’asi i lana solitulafono sa faia i lona afafine fai, lea ua mafua ai ona afaina le la aiga ma lona to’alua. Sa ia fa’atoese i le fa’amasinoga, o le malo, atoa ai ma tagatanu’u o Amerika Samoa e tusa ai o lana solitulafono. Sa ia fa’atoese fo’i i lona to’alua, o lona atali’i, aemaise ai lona afafine fai ma lona aiga.

 

Na faailoa e Smith e fa’apea, o lana gaioiga sa faia, o le atavaaia lea o lona fa’atamala, aemaise ai o lona le amanaia o le fa’atuatuaga sa tuuina atu e lona to’alua ma lona afafine fai ia te ia. Ao i ai i le falepuipui, na taua e le ua molia lona fa’aaoga tatau o lona taimi, e galulue ai ma ni isi o Fa’alapotopotoga ma Ekalesia, e fa’atula’i ma fa’amaite ni isi o polokalame e fesoasoani ai i tupulaga talavou o Amerika Samoa o lo o a’afia i fa’afitauli eseese o le olaga, e aofia ai ma i latou e maua i le gasegase o le mafaufau.

 

Sa ia fa’afetai i le Pule a le Fa’amasinoga ma le fa’aiuga e taofia ai o ia i totonu o le falepuipui mo le tele o masina, e le gata ua maua ai se avanoa e toe fa’aleleia ai lona olaga, ae o se avanoa fo’i ua mafai ai ona toe susu’e se isi moemoe fou i lona olaga, ma avea ai o ia ma tagata fou. O lona olaga fa’amaualuga ma le le fia to’ilalo, ua mafua ai ona vava mamao o ia ma le Atua.

 

Sa ia talosagaina se isi avanoa e toe fo’i ai i lona aiga e fa’alelei le la ulugali’i ma lona to’alua, ma tausi lona atali’i e to’atasi.

 

Na fa’ailoa e Smith ma loimata i le fa’amasinoga e fa’apea, o le tausaga lenei na fa’au’u ai lona atali’i mai le Vasega 8, ma ua sauni nei o ia e ulufale atu i aoga maualuluga. Na ia talosagaina se avanoa e fia mafuta ai ma lona atali’i, ma ia fesoasoani e fa’ailoa i ai uiga leaga o le olaga, atoa ai ma le ‘alo ese mai i le mea sese sa ia faia. Sa ia taua fo’i lona to’alua o loo fa’aauau pea lana aoga, ma ua fa’amoemoe e fa’au’u i se taimi o lenei tausaga mai lana fa’ailoga o le B.A.

 

Na talosaga le loia a Smith ia deSaulles i le fa’amasinoga ina ia fa’asala le ua molia i se fa’asalaga mama. Sa ia taua e fa’apea, e 11 masina na taofia ai Smith i le falepuipui ao faatali ai se faaiuga o lana fa’amasinoga. Ua ia lagona lona salamo moni e tusa ai o lana solitulafono, ma ua avea fo’i o ia ma tagata ua suia atoatoa lona olaga.

 

Na taua e le loia a Smith ni isi o tusi sa tuuina mai i tagata e masani ia Smith, e aofia ai ma lona afafine fai sa a’afia i lenei mataupu, lea ua avea nei o ia ma sui o Vaega ‘au a le malo o Amerika. I lana tusi, o loo ia taua ai lona fa’amagaloina o le ua molia, atoa ai ma lona talitonuga ua ia aoaoina se lesona taua mai le mea leaga sa ia faia.

 

E le i taliaina e le loia a le malo le fa’afinauga mo se fa’asalaga mama. Na finau Dunn ina ia fa’asalaga Smith i le fa’asalaga pito mamafa o loo fa’atulaga mai e le fa’amasinoga, ona o le matuia o lana gaioiga sa faia. E le gata sa ia fa’ataumaoi le olaga mama ma le teine muli o lona afafine fai, ae sa ia faia uiga fa’a tiapolo ina ia pulea ai lona olaga atoa, ona o le naunau e fa’amalie ona lagona tu’inanau.

 

O le itu e pito sili ona mataga e pei ona finau i ai le loia a le malo, o le fa’aali lea e le ua molia o ata mataga i le la mafutaga ma lona afafine fai i luga o le “Facebook”, ma ua avea ai ma auala ua maasiasi ai le na a’afia.

 

A o le i tuuina mai le fa’asalaga a le fa’amasinoga, na fa’ailoa e Kruse mau fa’amaonia e uiga i le mea sa tupu.

 

Saunoa Kruse e fa’apea, o le mafutaga a Smith ma lona afafine fai, na alia’e mai i le va o le Mati, 2013 ma Fepuari, 2016. O lea mafutaga sa aofia ai ma se mafutaga fa’afeusuaiga mo le umi e 2 tausaga, i le va o le ua molia ma lona afafine fai, ina ua fa’atoa 15 tausaga o le tama’ita’i. O le tele o taimi e fa’atino ai lea mafutaga i totonu o le fale, ae o isi taimi o totonu o le ta’avale a le ua molia, pe a alu e piki mai le tama’ita’i mai le aoga.

 

O le naunau tele o le ua molia i le la mafutaga ma lona afafine fai, na i’u ai lava i lona faia o se itulau i luga o le “Facebook”, ina ia mafai ai ona ia iloa poo ai o loo fa’auo i ai lona afafine fai. O se tasi o taimi, na ia tuu ai i luga o le “Facebook” ata mataga o loo i ai o ia ma le tama’ita’i. O ata ia na mafai ai ona iloa e uo a le tama’ita’i, o le tamaloa o loo i totonu o ata mataga nei, o le ua molia, ma fa’ailoa ai loa i Leoleo lenei mataupu.

 

Saunoa atili Kruse e fa’apea, e tusa ai ma le ripoti a le Ofisa Faanofovaavaaia, o Smith, o se tagata na te tulituliina tama’ita’i laiti mo feusuaiga.

 

O le fa’asalaga a le fa’amasinoga, e ta’i 5 tausaga e loka ai o ia i le falepuipui mo le moliaga e tasi mo moliaga uma e 3 e pei ona ta’usala ai o ia, o ia fo’i fa’asalaga e tuli eseese. Lona uiga, e 15 tausaga lea o le a falepuipui ai o ia. Ua poloaina fo’i le lesitalaina o lona igoa i le lisi o tagata ua ta’usala i le faia o uiga mataga i tama’ita’i talavou.