Ads by Google Ads by Google

Lagomau le “Vaopunimatagi” Bishop Quinn Weitzel i Chigago Ilinois


Le tina o Ivona Manga, ua leva tausga sa avea ma fesoasoani fa’apitoa ia Epikopo John Quinn Weitzel i le Pule’aga Samoa Pago Pago, fa’atasi ai ma le faipule o Amerika Samoa i le Konekeresi, Uifaatali Amata, i le Sa o Bishop Quinn i le taimi o le misisa o le maliu i le aso lua i St Luke’s Parish, River Forest, Illinois. [ata foa’i]

Pago Pago - AMERIKA SAMOA

 

O le aso Lua, Ianuari 17, 2023, na lagomau ai lana afioga le Epikopo (Bishop) Malolo Manumalo o John Quinn Weitzel i lona aiga i Chigago Illinois, ma sa auai ai le afioga Epikopo Peter Brown mai le Pule’aga Samoa Pago Pago, i le vasega o le Aufaigaluega sa fa’atautaia lona toe Misasa.

 

O le sauniga lea ua molimauina ai e le to’atele, ma e to’atele fo’i sui o le Ekalesia Katoliko mai Samoa sa auai. E to’alua sui sa saunoa fa’apitoa mo se molimau i lona soifua galue i le Pule’aga Samoa Pago Pago, le afioga Epikopo Peter Brown ma afioga le Faipule o Amerika Samoa i le Konekeresi, Uifa’atali Aumua.

 

O nisi sa maua avanoa e fa’atasi ane ai sa malaga mamao mai Washington DC, nisi mai Hawaii ma isi setete uma, aua sa latou manatu ina ia auai i se tasi o ta’ita’i ua loa lana auaunaga i Amerika Samoa ma Samoa fo’i, e ala i le avea ai ma ulua’i ta’ita’i o le Pule’aga Samoa Pago Pago.

 

I le vaitau o le avea fo’i o Katinale Pio Taofinuu ma ta’ita’i o le Pule’aga Samoa e aofia ai ma Pago Pago nei, sa amata ai le auaunaga a Bishop Quinn i Samoa, i le tausaga e 1986,  lea sa ia va’aia ai le Pulega i Falealupo.

 

O iina sa galue mulimuli ai i Samoa, a’o le’i tofia mai e na te ta’ita’ia le galuega i le amataga lava o le Pule’aga Samoa Pago Pago e pei ona tulai ai nei ma ua lauolaola. I se vaitau o lana pulega o le Epikopo o le Pule’aga Samoa, sa fa’asuafaina ai o “Vaopunimatagi”.

 

Peita’i i le nofoga mo le Aufaigaluega ua litaea mai tautua ma ua tausia lelei e le Ekalesia Katoliko Roma i New York, ua maliu ai o ia, ia Tesema 30, 2022. Ua fa’amauina fo’i na soifua a’e o ia i lona aiga i Chigago Ilinois ia Me 10, 1928. I lona maliu ua atoa lona 94 tausaga o le soifua.

 

Ona o lona fanoga fa’amaumau, ua manatu o ia e lagomau fa’atasi o ia ma ona tua’a i lona aiga i River Forest Illinois, lea fo’i sa amata mai ai lona olaga a’oa’oina i le Taleleli.

 

Ua fa’ailoa mai o lona toe sauniga mamalu o le Misasa lea, o lona falelauasiga i St. Luke’s Parish, River Forest, Illinois na fa’a-Samoa nisi o vaega o lea sauniga mamalu i saunoaga o molimau fa’apea ma vi’iga a’o le’i amatalia le sauniga. 

 

O le naunautaiga, ina ia fa’amau atili le auaunaga ua loa Epikopo Quinn Weitzel, i le Puleaga Samoa ma le Pule’aga Samoa Pago Pago, lea na fa’ai’u ai lana tautua i lona Atua ma le Ekalesia Katoliko.

 

Na malaga mamao atu lava Epikopo Peter Brown, faatasi ai ma nisi na tofia o le Ekalesia Katolio, ae le o vaoia ai nisi e to’atele e fia auai i lenei sauniga.

 

O i latou patino na tofia e malaga ua aofia ai Ivona Mauga, Melania Fiso, o se tasi sa avea ma ana tausima’i ma lana tama teine o Melania Shelly fa’atasi loa ma le vasega o e uma ua manatu e auai mai setete eseese o le malo tele ae maise o nisi e vavalalata latou mafutaga ma lenei Tama i le Ekalesia Katoliko.

 

LE SOIFUA GALUE

 

O le auau o le galue a lenei Ulua’i Tama o le Pule’aga Samoa Pago Pago, “Faia mea uma i le Alofa!” O le auau fo’i lea na ia fa’ailo e amatalia ai le tula’i mai o le Pule’aga Samoa Pago Pago ina ua mae’a tapena e fa’atu ma’oti ese mai le Pule’aga Samoa.

 

E vala’auina Epikopo Quinn Weitzel o avea o ia ma Patele e tautua i Chigago, lea ua toe lagomau ai nei. O ia o le ituaiga o patele o le Marylnoll ma na avea lea ma Epikopo i le tausaga e 1986 ma ua tautua se’ia oo ina mae’a ai lana auaunaga i le tausaga e 2013, i ni tausaga ua silia ma tausaga e tatau ai ona tautua faa-Epikopo se tasi i le Ekalesia Katoliko Roma. O lona uiga ua leva na tatau ona litaea o ia mai ona tofiga, ae malolo manumalo e pei ona i ai nei mo le isi 9 tausaga. fa’ato’a tu’ua le malo.

 

O Tesema 30, 2022 ua fa’amauina ua tu’ua ai e ia le mafutaga fa’atasi ma isi Epikopo ma Katinale litaea o le Maryknoll i le latou nofoaga fa’apitoa i New York, ma ua atoa lelei fo’i le 94 tausaga o lona soifua.

 

Na muai faia le sauniga amata o ona toe sauniga ina ua mautinoa ua tuumalo o ia, i Maryknoll New York, o lona sauniga sa auai atu ai nisi sa loa le latou mafutaga ma le Epikopo Quinn, lana tausima’i sa va’aia leleia o ia a’o tautua i le Puleaga Samoa Pago Pago, Melania Fiso ma lona alo tamaitai o Melania Fiso Shelly, sa malaga ane mai North Carolina lea ua i ai nei ina ia auai fa’atasi i lona ulua’i sauniga mamalu ina ua maliu o ia i Maryknoll, New York.

 

Ua fa’ailoa mai, o se tasi o measina a le atunuu, sa taua’aoina mo ia ina ua mae’a lana tautua ma sa malaga ma ia, o le a avea lea ma afuelo o lona va’a i lona sauniga mamalu lea.

 

I lana mavaega tusitusia ua ia fa’amauina ai lona fanoga mo ona toe taimi, e ufita’i ai lona Sa o lana folauga i le Ietoga na mavae ai ma lana Pule’aga Samoa Pago Pago, aua o ia o se Matai na ta’ita’ia le Lafu mo tausaga e tele.

 

Mai le 67 tausaga o le soifua Epikopo Quinn Weitzel sa avea ai o ia ma se Patele i le Ekalesia Katoliko. Mai na tausaga e tele e 36 tausaga sa avea ai ma Epikopo, ae 29 o tausaga o lana nofoa’iga o le Epikopo sa avea ai ma ulua’i ta’ita’i o le Pule’aga Samoa Pago Pago.

 

I lana ta’ita’iga o le Pule’aga Samoa Pago Pago sa ia matua galue malosi e fa’atula’ia le Hope House i Fatuoaiga, fa’atula’ia fo’i ma aoga, tuufa’atasia a’oga maualuluga a Fa’asao High ma Marist High, ae maise o le Montessouri ma le Day Care i Fatuoaiga ma fa’aauau fo’i le tele o mea lelei e atinae ai le soifua tapua’i o tupulaga i le Ekalesia.

 

I lana ta’ita’iga lava fo’i sa fa’atula’ia ai ma le auaunaga faufautua i totonu o tautua lautele a le Ekalesia, le latou Catholic Social Services e fesoasoani lea i le va fealoa’i o le mamalu lautele o le atunu’u, ae le na’o le Ekalesia lava.

 

E i ai lona naunau ina ia talenia le tupulaga talavou a le Pule’aga, o lea sa ia amatalia ai le Fa’aili Pu mo le fanau talavou. Na amatalia lea fa’amoemoe i ana lava tupe sa ia fa’asoa ane i ai, ona soso’o lea ma le maimoaina e le mamalu lautele o le tula’i mai fo’i o lea fa’aili i aso fa’ailogaina o le Malo o Amerika Samoa, ae maise i taimi o savaliga fa’aaloalo i aso o le Sisigafu’a a le Malo Fa’ateritori o Amerika Samoa. O lena fa’ama’ite sa amatalia i le fa’aiuga o le vaitausaga 1990.

 

Ina ua faatula’ia lea fo’i ala e saili taleni ai le fanau i tulaga o musika ma le taina o mea fa’aili, sa ia faliu ma amata le polokalama e a’oa’o ai musika i totonu o le a’oga maualuga  Fa’asao & Marist High. O lona ulua’i faia’oga musika i nei kosi o mea fa’aili eseese o le Ta Kitara lauiloa i fa’aili i le atunuu, Harry Miller.

 

Ae le’i tu’ua e lana auauna Amerika Samoa, o le to’atele o fanau a le atunuu i le Ekalesia Katoliko lea ua avea ma ta’ita’i o le Malo, fai pisinisi ma iloga o latou tofiga i aiga, afio’aga ma Itumalo fa’apea ma le Faigamalo a le atunuu, e tasi lava le Epikopo sa latou silafia mai i lo latou soifua mai, ua na’o Epikopo John Quinn Weitzel.

 

E auai o ia i o latou fa’au’uga uma mai le ECE se’ia oo i vasega 8 ma fa’asolo atu ai i a’oga maualuluga ma le Kolisi Tuufa’atasi a le atunuu.

 

E le gata i lea ae auai fo’i i ta’aloga faitaulia uma e oo i ai se taumafaiga a ‘au fili a a’oga tulaga muamua po’o a’oga maualuluga a le Ekalesia. Ia i latou uma nei, ua iloga le misia o le Tama faaleagaga sa tapua’ia o latou faiva eseese sa tausinio ai i le soifuaga o filifiliga tau le aga’i i luma o le olaga.

 

Mai lona fa’atula’ia ai o le Ofisa o Feso’ota’iga & Va Fealoa’i na mafai ai ona ia fa’atagaina le lomiga o se Nusipepa a le Ekalesia e mafai ona fa’alauiloa ai so’o se mea lava e fa’atino ma ni galuega afuafua ma fa’ataunuu a le Pule’aga Samoa Pago Pago, ma sa ia fa’aigoaina lea lomiga o le “Vaopunimatagi.”

 

O lona suafa Matai lea sa fa’ae’e ia te ia a’o avea ma Epikopo i Falealupe Savaii, Puleaga Samoa Apia, o lana ulua’i Pulega tausi fo’i lea talu ona masi’i mai e tautua i Samoa mai Amerika.

 

Ona o ia o se tasi o ta’ita’i sili ona matua i le atunuu, e masani ona tofia o ia e ta’ita’ia sauniga mamalu mo faigamalo eseese i totonu o le atunuu: lea e aofia ai faigamalo a Kovana UIfa’atali P. Coleman; Kovana A.P. Lutali; Kovana Tauese PF Sunia; Kovana Togiola Tulafono; ma Kovana Lolo Moliga. 

 

Sa ia matua sapaia fo’i le taumafaiga ina ia autasia ekalesia uma i totonu o le atunuu, lea ua tuufa’atasia ai le Ekalesia Fa’apotopotoga Kerisiano, Ekalesia Katoliko, Ekalesia Metotisi ma isi uma e pei ona i ai nei.

 

O le Malumalu tele “O le Aiga Pa’ia” lea ua tutula’i i totonu o le Laumua o le Ekalesia i Fatuoaiga na fausia i le ta’ita’iga a Epikopo Quinn Weizel ma o ia sa ia fa’avasegaina Konekarate eseese e oo lava i le teuteuga i totonu o le Malumalu ma ona ata ua ta ina ia fa’amauina ai lea galuega tele, lea sa ia tuuina lea i le susuga le Ta Fa’atagata lauiloa i Samoa, Sven Ortguist.

 

O le fa’amae’aina ma le fausaga o lea malumalu ma isi galuega e tele i totonu o le Laumua o le Ekalesia Katoliko i Fatuoaiga, sa matele ina foa’i mai ai le tele o pa’aga lima foa’i mai fafo, o nisi e latou silafia lelei Epikopo Quinn ma sa fa’atalosagaina ai, ni a latou fesoasoani. Ua latou va’aia le tupu o le galuega, ma ua fa’amaonia i o latou taofi, e tatau ona atia’e ia mautu galuega uma mo le Pule’aga Samoa Pago Pago.

 

Ina ua tu’ua e lana afioga Epikopo Quinn Weitzel Amerika Samoa i lana pule’aga sa tautua ai se’ia mae’a lana tautua mo le Ekalesia Katoliko, na mua’i nofo o ia i le nofoaga fa’apitoa mo Epikopo ma Katinale o le Maryknoll i Sacramento. Sa to’atele totino o le Pule’aga Samoa Pago Pago sa latou asia ai o ia iina, aua e tulata i nofoaga o lo’o alaala tumau ai. Peita’i na toe suia lona nofoaga e alaala ai i New York, lea ua tu’umalo ai ia Tesema 30, 2022.

 

O lona toe mana’o, ia toe oo i lona aiga, ia moe atu i le nofoaga tumau o i ai ona matua. Lea ua fa’ataunuu ma ua oo atu fo’i lona aiga Ekalesia e faao’o atu valevale alofa i lona aiga, ia iloga lana tautua sa fa’atino aua o se taulaga lava ua ola ma e ola pea lava sa ia faia mo Amerika Samoa ma ona tagata.

Tofa Soifua le ulua’i Epikopo o le Pule’aga Samoa Pago Pago, fa’atofaina oe Epikopo Emeritus Qiunn Weitzel.