Ads by Google Ads by Google

Molia se alii talavou faaoo o manu’a tuga i le uo a lona tuafafine

ausage@samoanews.com

O le vaiaso na te’a nei na pu’e faapagota ai e Leoleo se alii e 19 tausaga le matua mai Vaitogi, ona o tu’uaiga i lona faaoo lea o manu’a tuga i le uo a lona tuafafine e ala i lona fa’aaogaina o se naifi e tui ai o ia.

 

O le vaiaso na te’a nei na tula’i ai le susuga a Solomona Gauta i luma o le Fa’amasinoga Faaitumalo mo lana ulua’i iloiloga.

 

Ua molia e le malo Gauta i le moliaga e tasi o le faaoolima i le tulaga lua, o le vaega D lea o solitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, poo le faasala foi i faasalaga uma ia e lua.

 

E $5,000 lea ua faatulaga e tatala ai i tua Gauta e fa’atali ai taualumaga o lana mataupu.

 

TAGI A LE MALO

 

E pei ona taua e le malo i le latou tagi e fa’apea, o le afiafi o le aso 17 o Fepuari, 2020 na vili ai se Tina i le Ofisa o Leoleo i Tafuna ma talosaga i ai mo se fesoasoani, ona o lana tama ua manu’a sa faaoolima i ai se isi ali’i.

 

E to’atele Leoleo na tali atu i le valaau, ma maua ai le avanoa e fesiligia ai le Tina na ia talosagaina se fesoasoani a Leoleo. Na taua e le Tina i Leoleo e fa’apea, o lana tama e 27 tausaga le matua ua avatu i le ta’avale Falema’i, o lo o aafia lona itu i se manu’a e mafua mai i se naifi.

 

Na maua e Leoleo i a latou suesuega, e to’atasi lava le molimau sa i ai i le taimi o le fa’alavelave, o le tuafafine lea o le alii ua molia. O ia lea sa i totonu o le potu ma le alii ua manu’a i le taimi na ulufale atu ai le ua molia ma faatino loa le fa’alavelave.

 

Na aga’i Leoleo i Vaitogi i le fale o le alii talavou ua molia mo a latou suesuega, peita’i e le i maua atu i ai o ia, ae na mafai ona maua atu i ai lona tuafafine ma maua ai loa le avanoa e fesiligia ai e Leoleo o ia e tusa ai o lenei fa’alavelave.

 

Na taua e le molimau i Leoleo e fa’apea, o laua ma lana uo tama ( lea ua manu’a) sa i totonu o le potu i le latou fale i Vaitogi. A o la talatalanoa ai ma lana uo, na faafuase’i ona tatala atu e lona tuagane (le ua molia) le faitoto’a, ma faafuase’i ai loa ona tula’i mai se fusuaga i le va o lana uo tama ma lona tuagane.

 

Na taua e le tamaitai lea i Leoleo e faapea, e le i i ai i le taimi na faatino ai e lona tuagane le faalavelave, ona ia sa tamo’e mai i fafo o le fale ma tauvalaau solo mo se fesoasoani. Ao tauvalaau mo se fesoasoani, na faafuase’i ona ia toe faliu atu ae fetaui ma le oo mai i fafo o le fale o lana uo tama o lo o uu mai i lona itu ua manu’a.

 

Na fesili Leoleo i le molimau pe sa vaai tino lava i le taimi na faatino ai e le ua molia le fa’alavelave e ala i lona tui o le alii na aafia i le tama’i naifi, na tali le molimau e leai. Na taua atili e le tama’ita’i lea e faapea, na pau lana gaioiga sa faia, o lona taumafai lea e vaovao le fusuaga a lona tuagane ma lana uo tama, ae lei vaai i le taimi na faatino ai le solitulafono.

 

Na maua le avanoa e fesiligia ai e Leoleo le alii na aafia e tusa ai o lenei fa’alavelave, ina ua feololo lona malosi mai le manu’a na aafia ai o ia. Na taua e le alii na aafia i lana fa’amatalaga e fa’apea, o ia sa talanoa i totonu o le potu ma lana uo teine, ae na faafuase’i ona tatala atu e le ua molia le faitoto’a o le potu ma oso atu loa ma amata le la fusuaga.

 

A o la fufusu, na taua e le alii na aafia lona vaaia o le ua molia o loo ia uu se naifi i lona lima. Sa ia taumafai e aveese le naifi peita’i na faateia o ia ina ua ia faalogoina le tui e le ua molia o ia i le naifi. O lona malosi na totoe na mafai ai ona ia se’i ese mai le naifi mai le tuagane a lana uo teine ma ia tamo’e ai loa i fafo o le fale mo se fesoasoani.

 

Ina ua fesiligia e Leoleo le alii ua molia, sa ia taua ai e fa’apea, a o nofo i fafo o le fale, sa ia faalogoina lona tuafafine o loo ee mai i totonu o le potu na te fia mana’omia se fesoasoani. E le i toe faatali i le taimi lea, ae na ia tu loa i luga ma tamoe i totonu o le potu ma la fufusu ai loa ma le alii na a’afia.

 

Na taua atili e le alii na aafia i Leoleo e fa’apea, sa la i ai lava ma lana uo tamaitai i totonu o le potu i le taimi na ulufale atu ai le ua molia ma le tama’i naifi i lona lima ma tui ai o ia.

 

Na teena e Gauta tuuaiga sa ia faaaoga se naifi e tui ai le na aafia. I lana molimau i Leoleo sa ia taua ai e fa’apea, na palasi le na aafia i luga o le Laulau Tioata i totonu o le potu, ma manu’a ai loa lona itu ina ua ta’e le Laulau Tioata.

 

Na toe fesiligia e Leoleo le tuafafine o le alii ua molia e tusa ai o le mea moni sa tula’i mai i le aso o le faalavelave. I lana faamatalaga lona lua i Leoleo, sa ia ioeina ai lona vaaia o lona tuagane o tamo’e atu ma le tama’i naifi i totonu o le potu ma ia osofaia ai loa lana uo tama ma manu’a ai.

 

Na maua le avanoa e fesiligia ai Leoleo le Foma’i sa tiute i le taimi na taunuu atu ai le tino o le alii na manu’a, ma faailoa ai e le Foma’i ia Dr. Oliver e fa’apea, e matuia le manu’a na aafia ai le itu o le alii na aafia, lea na mana’omia ai ni filo se 12 e tapuni ai le lavea pe tusa ma le 7 senitimita le loloto, lea na aafia ai le itu o lona Fatuga’o, peita’i o le alofa o le Atua na mafai ai ona manu’a laititi lea vaega o lona tino.

 

Na faamaonia fo’i e Dr. Oliver i lana ripoti i Leoleo, o le manu’a na aafia ai le itu o le alii na aafia, e mafua mai i se tama’i naifi maai a faaaoga e faaoo ai le manu’a i lona tino.

 

O le taeao nei ua faamoemoe e tula’i ai Gauta i luma o le Fa’amasinoga Maualuga mo le faatulagaina o le aso e valaau ai le faaiuga o le isi mataupu.

 

O le taeao o le aso Faraile na te’a nei na faatulaga e faia ai le ulua’i iloiloga o le mataupu a Gauta i luma o le Faamasinoga Itumalo, peita’i na manatu Gauta e faaagafua ona aia tatau ae tuu sa’o atu loa lana mataupu e faatulaga sona faamasinoga autu i luma o le Fa’amasinoga Maualuga.