VAEGA 126

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 126.

**********************************************************

E le’i saofa’i lelei ifo i lalo ia le teine o Naomi, ae tatagi tulivae o le tamaitai o Salome i luga o le foloa o le potu malolo a le aiga a le tamaloa o Alesana ma lona to’alua o Eseta, ae o le taimi lena ua maligi e pei o se timu to, ia loimata a Salome.

Ua oso atu le fafine o Eseta ma tau fa’atu mai i luga Salome ma faapea atu, “Oi suga Salome, o le a le mea ua tupu.  Tu i luga! Tu i luga e nofo mai I luga o le nofoa.”

Ae peitai, ua le maluelue ia le tamaitai o Salome.  Ae ua na o le saofai o le tamaloa o Alesana ma fa’ataupupula mai ia Salome ma lana to’otuli.

“Alesana ma Eseta, ou te matua’i o’u faato’ese atu ia te oulua o matua.  E le o a’u o se tagata lelei.  E le o a’u foi o se tagata atoatoa.  O a’u o se tagata, e tumu i vaivaiga ma agasala,” o le amataga lea o le faamatalaga a Salome.

Ae e fai lava le lauga a Salome, ae ua tau le manino se faamatalaga i lona tagi ma su su.

“Suga Salome, tu’u loa lena tagi, e nofo mai I luga o le nofoa e tatou te talanoa fa’alelei,” o le faapea atu lea a le tamaloa o Alesana.

Ua tilotilo atu Alesana i lana fanau, ae o le taimi lea ua na o le tu sa ‘o o Ruta ae o Naomi, o lo’o saofai mai i leisi itu o le potu malolo, ma le punou o lona ulu.

Ae ua tu tu malie a’e i luga le alii fomai o Taki ma savali atu i lona potu.

“Ruta, o fea o iai Iakopo? Toe taumafai e valaau Iakopo e sau nei lava i le fale,” o le fa’atonuga lea a Alesana ma lona manatu, ai o se faalavelave na tupu i le va o Iakopo ma Salome.

“Alesana ma Eseta, faamolemole fa’amagalo mai a’u I lo’u talavou na ou iai ma lo’u faamaualuga sa iai,” o le fa’aauau lea o le lauga a Salome.

“O le a foi le mea a le kama faavalevalea lea ua fai, ae lea e mafakia ai si gei keige,” o le ote ote lea a Eseta.

“E leai, e le o Iakopo,” o le toe faapea atu Lea a Salome.  “O la’u mataupu e faatatau ia Naomi.”

Ona liliu loa lea o le to’otuli a Salome aga’i i le nofoa o lo’o nofo mai ai Naomi ma punou, ma ia faapea atu.

“Naomi, faamolemole faamagalo mai lo’u tagata vaivai.”

[E FAIA PEA]