VAEGA 22

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 22.

*************************

Ua amata nei le taumafataga o le afiafi a le tamaloa o Tanielu ma lona to’alua o Eseta ma si a la tama o Naomi, ma le latou malo fa’aaloalogia, le alii fomai o Taki.

E le i umi, ae taunuu ia le fanau matutua a Tanielu ma Eseta, le alii o Iakopo ma le tamaitai loia o Ruta.

Ua fa’afeiloai atu le alii fomai i le fanau matutua a le ulugalii, ona saofafai ifo loa lea ma la’ua i lalo i le taumafataga o le afiafi.

O se aiga fiafia a le aiga i lena afiafi ma sa pei le alii fomai o Taki, o se tasi o le aiga na malaga mai i atunu’u i fafo, i le talanoaga ma le a’ai fiafia ma le aiga o Tanielu ma Eseta ma le la fanau, i lea afiafi.

“E a sau tofo i le kuka a lo’u tama?” o le fesili atu lea a Iakopo i le alii fomai.

Ua ea a’e i luga le ulu o Taki ma tilotilo atu i le tamaloa o Tanielu. 

Ua oso mai le teine o Ruta, “Ina ne’i e faapea o lo’u tina e kuka, e leai.  O ia e fesoasoani e tipitipi mea e fai ai le kuka.  Ae o le sifi kuka o lo’u tama.  E a la sau tofo i le lima a la’u sto’e?”

Ua ata le alii fomai ma faapea, “Matagofie mea uma.”

Ua oso atu le teine o Naomi ma faapea atu, “I le taimi na ou a’oga ai, sa toatele nisi o a’u uo sa lotoleaga ia te a’u.  Ona na o a’u lava o le matou vasega, e alu atu lava lona tama i aso uma e momoli atu lau mea’ai.  Ma e to’atele tamaiti ma teneiti o la’u vasega na fia faauo mai ia te a’u, ona o le fia a’ai i le kuka a lo’u tama.”

Ua le iloga se mea e tau mai ai le mimita o le tamaloa o Tanielu i le tala a si ona afafine laititi.

Ae o le taimi lea, ua na o le punou o le alii fomai o Taki, ma e ea ifo i luga, na fa’ateia le aiga ina ua vaaia le mumu o mata o le alii fomai.

“E iai se mea ua tupu?” o le fesili atu lea a Naomi.  

“E leai se mea o tupu,” o le tali mai lea a le alii fomai.

“Oi, ae na ua mu uma ou mata, e pei sa e tagi,” O le tali lea a Naomi.

Sa tu fa’afuasei i luga le alii fomai ma faapea mai, “E iai se tou faletaele faamolemole?”

Ua oso atu nei Iakopo ma taitai atu ia le alii fomai e faasino iai le fale le taua a le aiga.

“Makua’i kaukala kele lou guku,” o le ote lea a Eseta ma tago atu iini Naomi.

Ua mimigi Naomi ma taumafai e sola ese ma le lima a lona tina ae faapea mai, “O le a la’u mea na fai?”

E FAIA PEA!