VAEGA 46

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 46.

***************************************************************

A’o fa’aali atu e le alii fomai o Taki le ata o lona tina ia Tanielu ma Eseta sa iloa mamao mai lava e le teine o Naomi le suia o foliga a le alii fomai, e pei o iai se mea o tu’ufesili ai lona mafaufau.

Ua fa’aauau nei le taumafataga a le aiga ma le alii fomai o Taki ma fa’ata’atia a latou fuafuaga mo le aso e soso’o ai, o le latou aso mulimuli foi lea o le latou tafaoga.

Na toe faamanatu atu e Taki i le ulugalii o Tanielu ma Eseta faapea le la fanau toatolu, o lea e faamoemoe e auai mai lona tina i le latou po mulimuli.

Ina ua mae’a le taumafataga a le vaega lea, ua sauni atu mo leisi vaega o le latou tafaoga, na tuliloaina e Naomi ia le alii fomai, a’o savali ese atu ma ia fesiligia o ia, pe iai se mea o tupu.

Sa le mautonu le alii fomai i le uiga o le fesili a Naomi, ona faapea atu lea o Naomi, “Sa ou vaaia le tulaga faaletonu o lau pupula ina ua e fa’aali mai le ata o lou tina.”

Sa tali le alii fomai o Taki, “Oi e leai, lea e lelei mea uma.”

Ae peitai, na silafia lelei e Naomi le suia o uiga a le alii fomai i lena aso, e foliga mai e le i atoatoa lona fiafia.

Ua o’o i le aso e soso’o ai, o le aso mulimuli foi lea o le tafaoga a le alii fomai o Taki ma le aiga a Tanielu ma Eseta ma ua taltalanoa le aiga i le le toe fo’i i lo latou nu’u, ona o le manaia o le latou tafaoga, ua mafai ona mapu ma malolo ai mai feau masani o le aso.

Ua si’i leisi faafetai, i luga o leisi fa’afetai, a le ulugalii o Tanielu ma Eseta mo le alii fomai, ona o lenei meaalofa ua o latou maua.

Ua uma mai tafaoga o le aso ma ua sauni atu nei le au tafafao mo le taumafataga o le afiafi, lea e faapea, o le a auai mai ai le tina a le alii fomai.

Ae na vaaia lava e Naomi le tele o le suiga i uiga o le alii fomai.  E pei o iai se mea o mamafa i lona mafaufau.  Sa manatu le tamaitai o Naomi, atonu o lo o popole le alii fomai i se manatu a lona tina, i le aumaia o le latou aiga e le alii fomai, i totonu o le latou fale.

Ua lata i le taimi o le taumafataga o le afiafi, lea ua fa’aigoaina e le aumalaga, o le Tausama’aga Mulimuli.

Ua sikaili lava le tagata ia i le mea e gata mai ai lona aulelei, aua lava le sauni atu mo le feiloaiga ma le tina a le alii fomai.

Ua o’o lava fo’i luga o le laulau meaai, ua felanulanua’i i le tele o taumafa eseese, ua folasia ai.

Sa soisoi le alii o Iakopo ma ia faapea atu i ona matua, “Na tatou o mai lava o fa’aofo tatou e le alii lea, ae o lea lava la’a tatou o, ae o lo o fai mea ofo lava”.

Ua talie le aiga lea ua nonofo faalapotopoto i luga o le laulau ‘ai. 

E le’i umi lava ae sau se tasi o tagata faigaluega a le alii fomai ma musumusu mai i lona taliga.

Ua faapea atu nei le alii fomai i ana malo fa’aaloalogia, “Onosa’i mai lava faamolemole.”  Ona tulai lea ma savali ese atu.  E le’i umi ona alu atu i fafo ia le alii fomai, ae toe fo’i mai totonu ma ia ta’ita’I maia se fafine e foliga mai, e tupulaga lelei lava ma le ulugalii o Tanielu ma Eseta.

Ua tau fai laulaututu le aiga ae faapea mai Taki, “O si o’u tina lenei, o Amelia.”

[E FAIA PEA]